دیدار: عەبدولڕحمان بامەڕنی
ستپێكر و بزانین، ئەڤ بانگەشەیە چاوان پرێڤەدچیت؟ ئێكەتی نیشتیمانی كوردستان تا چ راددە خوە بەرهەڤ كریە و بوچی درویشمێ دێ گوھورین هەلبژارتییە و چەندین پرسێن دی دگەل بەرێز (جەمال یوسف) بەرپرسێ مەلبەندێ 4ێ دھوكێ، دێ بابەتێ ڤێ دانوستاندنێ بن.
بانشگەشا هەلبژارتنان بۆ پەرلەمانێ كوردستانێ دە+ ئەڤە چەند رۆژە بانگەشا هەلبژارتنان دەستپێكری، پەیاما تە وەك بەرپرسێ مەلبەندێ 4ێ دھوك چ تشتە؟
جەمال یوسف: ئومێدەوارین بانگەشا هەلبژارتنان بۆ خولا شەشێ یا پەرلەمانێ كوردستانێ ب ھێمنی و رەنگەكێ جوان و شارستانی برێڤەبچن، بێی دروستبوونا گرژیێ و دراندنا وێنێن كاندیدان و تایبەتی ژی وێنە و پوستەرێن یەكێتی نیشتیمانی كوردستان، كو مخابن وەك ئەم دبینین، ل دھوكێ و دەوروبەران گەلەك وێنە و فلكسێن كاندیدێن مە هاتینە دراندن و شێواندن و ئەڤ كردارێن ژڤی رەنگی، دویرن ژ بابەتێن ئازادیێ و دویرن ژ بابەتێن دیموكراسیێ و رەنگڤەدانەكا خراب و نەباش دكەنە سەر ڤێ پرۆسا دیموكراسی هەمیێ و ئەڤە ددەمەكیدا، چاڤدێرێن نیڤ دەولەتی دیڤچوونا پرۆسەیێ دكەن و ئەڤە نە شیرینكرنا روویێ هەرێما كوردستانێ هەمیێ یە.
+ ئێكەتی نیشتیمانی كوردستان دبێژیت (دێ گوھورین)، مەبەست ژڤی درۆشمی چ تشتە؟
جەمال یوسف: دەما ئێكەتی نیشتیمانی كوردستان دبێژیت دێ گوھورین، دگوھوریت و ب كردار ڤێ چەندێ دكەت، بارۆدوخێ كەركوكێ گوھوری، پارێزگارەكێ ئێكەتیێ بۆ كەركوكێ هاتە دانان، ل كەركوكێ و باژێرێن دی یێن ڤەقەتیایی بۆ لیستا ژمارە ئێك. دەمێ ئێكەتی دبێژیت دێ گوھورین، سیستەمێ هەلبژارتنان ژ سیستەمەكێ سەقەت هاتە گوھورین و نوكە ژ بازنەكێ هەلبژارتنان، بوونە چوار بازنە و زێدەتری (200) ھزار ناڤ ژ ناڤ تومارێن دەنگدەران هاتنە دەرئێخستن و ئەڤ دەنگێن زێدە و یێن دوبارە و سێ بارە و ئەڤ خەلكێ دەرڤەی هەرێما كوردستانێ دەنگێ خوەددا. دەما دبێژین دێ گوھورین، ئەو كوتایا بەری نوكە بتنێ پارتەكێ مفا ژێ وەردگرت نوكە گوھورین ب سەردا هاتن و دەما دبێژیت دێ گوھورین، ئەڤە جارا ئێكێ یە كومسیۆنا عیراقێ كو بێلایەنە دێ سەرپەرشتییا هەلبژارتنان كەت. دەما دبێژیت دێ گوھورین، ئێكەتی نیشتیمانی كوردستان ئەو شیان یێن هەین سیستەمێ حوكمرانیێ ل هەرێمێ بەرەڤ پێش ببەت، دەما دبێژین سیستەمێ حوكمرانیێ، یانكو ھندەك كارێن دھێنەكرنێ نە دبەرژەوەندا خەلكێ كوردستانێدانە و پێدڤییە ئەم دگەل حكومەتا ناڤەندی هەماهەنگیێ بكەین و ڤێ ئێمناھیێ ب پارێزین و ئارامییا خەلكێ خوە و گوندێن خوە ب پارێزین و بابەتێ موچەی كو مافەكێ رەوایێ هاولاتییە و موچە هات و موچە نەهات و ھندەك جاران 60 رۆژان گیرۆببیت و ببیتە پاشەكەوت، پاشی بێژن ئەم پاشەكەوتی ژی نادەین و دڤێت لیستا موچی بھێتە پاقژكرنێ، ئەو لیستە ببیتە لیستا راستەقینە و ددەمێ خوەدا پارە بھێتەخەرجكرنێ و دەما ئەم دبێژین موچە بھێتە رێكخستن، دڤێت ئەم نەھێلین گاز ب قاچاخی ژ هەرێما كوردستانێ دەركەڤیت و كەس نەزانیت داهاتێ وی كیڤە دچیت، دڤێت ئەم بزاڤەكا جدی بكەین، كانێ داهات چاوان دھێت و داهات چاوان دھێتە خەرجكرنێ.
+ دبێژن ئێكەتی نیشتیمانی كوردستان نزیكی 20 ھزار موچەخوران ل دھوكێ هەنە و ھندی موچەخورێن خوە دەنگان نائینیت؟
جەمال یوسف: چ بنەما ژڤێ پرۆپاكندێ نینن و ئەو پێزانینەكا نەیا دروستە، بۆ زانین ئەو ژمارا دھێتە گوتن، مە چارێكا وان ژی موچەخور نینن؟
+ تو چەند یێ گەشبینی كو ئێكەتی نیشتیمان كوردستان، دەنگێن پێدڤی بدەستڤەبینیت؟
جەمال یوسف: ئەز ڤێجارێ ژ هەمی گەرێن هەلبژارتنێن دەرباز بووی گەشبینترم، كو ئێكەتی دێ دەنگێن خوە گەلەك زێدەكەت، ژبەركو ئێكەتی ب رێكخستن و ب پلان یا كارێ خوە دكەت و هەلویستێن ئێكەتیێ چ یێن نیشتیمانی بن یان درویشمێن ئێكەتیێ و ئازادییا ئێكەتیێ و هەلویستێن نەتەوەیی یێن ئێكەتیێ و پەیوەندیێن وێ یێن دەرڤە و تا ل ناڤخوە ژی، هەمی ئاماژەنە كو ئێكەتی نیشتیمانی كوردستان دخەما گەلێ خوە دایە و ئێكەتیێ گەلەك گوھورین یێن كرین، یا خوە رێكخستی، بریارێن مەركەزیەتا وێ باشترن و بریارێن وێ دھێنە جێبەجێكرن و ئەڤە هەمی كەرەستەیێن باشن، كو دەنگێن مە نە بتنێ زێدە ببن، بەلكو ببینە لیستا ئێكێ و ڤی مللەتی ژ نەهامەتییان رزگار بكەین، ژ نەهامەتیێن خزمەتگوزاری یێن كارەبێ یێن ئاڤێ یێن ژینگەھێ و ژلایێ چاندنێڤە و ژلایێ گەشت و گوزاریڤە و ب دەهان ھزار گەنج ئەڤرو بێ كارن و ئێدی ترس دناڤ خەلكیدا نەمینیت، چ دبوارێ ئازادیێن رۆژنامەڤانی و یێن رادەربرینێ و نەھێلین كەسەك سەرا نڤیسینا كومنێتەكێ بھێتە زیندانكرن و دڤێت وێ باوەریێ بۆ خەلكی دروست بكەین، كو هەست بكەت حكومەت حكومەتا وییە و ئێدی دڤێت بێژین بەسە بەسە.
