ئەمین شێخكی
ئەم هەمی ل بەندا دەمەكێ دەستنیشانكرینە، كو تێدا كۆمسیونا بلندا سەربەخۆیا هەلبژارتنان دیاركری. هەمی ژی یێ بەرهەڤیێن خوە دكەن بۆ ڤێ هەڤركییا مەزن و ئەم و ئەڤێن مایی ل بەندێیینە، كا دێ ئەڤ هەلبژارتنە چ رێگە نەخشەیێ نوی دروست كەن، تایبەتی ژی ل هەرێما كوردستانێ گەلەك گوھورین دوست بووینە، چ ل سەر ئاستێ ژین و ژیارا هاولاتی یان ژی سیاسی یان ژی ل سەر ئاستێ ناڤخۆیی یان ل سەر ئاستێ پەیوەندیێن دگەل هەرێمێ بەغدا و پەیوەندیێن نیڤ دەولەتی ژی؟ ئەڤانە هەمییان ژی، شوینجھیێن خوە ھێلاینە یان كاریگەریێن وان ل سەر ژیوارێ هەرێمێ هەنە و زێدەباری ناكوكیێن دەرگەھـ ل سەر هاتینە گرتنێ، ئەڤێن دناڤبەرا هەمی حزبێن سیاسی یێن هەرێما كوردستانێ ژلایەكی و پارتی دیموكراتی كوردستانێ ژ لایەكێ دی، لێ لدووماھیێ هەر دەنگدرە وەك دادوەر دناڤبەرا ڤان ناكوكییاندا بریارێ ددەت و هەر ئەوە دشێت ڤان هەڤركییان ئێكلابكەت، ئەو ژی ب دەستنیشانكرنا راستترینێ و باشترینێ و دووماھی ئینانێ بڤان ناكوكییان و دڤێت دەنگدەری، دیتنێن خوە یێن سیاسی و بەرچاڤرۆنیەك بۆ هەلویستێ هەمی حزبان هەبیت و ب تایبەتی ژی حزبێن سەرەكی یێن دەستەلاتدار، ژبەركو سیاسەتێ شوونەوار و كریار دڤێن، دیسان بارۆدوخێ ژیارێ یێ هاولاتیان و نابیت دڤێت رەفتارەكا جوداتر هەبیت و ئەو رەفتارێن هەنێ ب قەبارەیێ وان نەخوشی و دەردەسەرییان بن.
بوویە داخوازییا مە ژ هەمیان، ژ خەلكێ مە و ژ گەلێ مە و خویشك و برایێن مە ل هەرێما كوردستانێ، تایبەتی ژی باژێرێ دھوكێ پرا شەھیدان ژ هاولاتیان تا سیاسییان. نابیت پرۆسا هەلبژارتنان بتنێ رێكارەكا سیاسی یان كردارەك بیت و بتنێ ددەمێن دەستنیشانكریدا بچینە سەر سندوقێن هەلبژارتنان، بەلكو دڤێت كردارەكا راست و دروست بیت و تێدا بەرهەڤی بھێنە كرنێ، ژبۆ كو هاولاتی رۆلێ خوە یێ دروست بگێریت ب كریار و ب وژدان و ئەو لایەنێ پێدڤی سزادانێ وی سزا بدەت و دگەل وی راوەستیت یێ پێدڤی پێهەیی و هەمی خەلكێ هەرێمێ دڤێت بزانن، كو دەنگێ وی دشێت گوھورینێ دروست بكەت و دشێت ب وی دەنگێ، گەندەلیێ و دزییا دستهەلاتداران نەھێلیت و بێژیتێ ئێدی بەسە.
بوویە دەما ئەم دچینە سەر سندوقێن دەنگدانێ، دڤێت وژدانا خوە ئارام بكەین و بیرا خوە بینین، دەما مە نیشتیمان بڤێت و مە نان بڤێت و مە كەرامەتا خوە بڤێت و یا گرنگ دەما مە بڤێت هەرێما مە هەیبەتا خوە هەبیت، دڤێت ئەم یا راست هەلبژێرین و ئەو كەسێن بووینە ئەگەرێ بەردەوامیبوونا نەهامەتیێن مە ، دڤێت ل رۆژا دەنگدانێ ئەم وان بدەنگێ خوە سزا بدەین و نەھێلین ئێدی ل سەر حسابا مە ئەو بەردەوامیێ بڤێ نەدادیێ بدەن.
