كاهین كەرەم ئەحمەد
بەری هەر تشتی، پێدڤییە تەخ و چینێن مللەتی گرنگییا هەلبژارتنان بزانن، كو هەلبژارتن چارەنڤیسێ مللەتان دیار دكەت و پشكداریكرنا وان ئەركەكێ نەتەوەییە و بتایبەتی ژی تەخا گەنجان. جوانێن مە چاوان و ب چ رەنگی بەشداریێ دڤێ پرۆسەیێدا بكەن، ئەو یا گرنگە، بەرپرسایەتی بەرامبەری پرسێن ناڤخویی و یێن نەتەوەیی و دڤێت گەنج ب زانین قەستا سەر سندوقێن دەنگدانێ بكەت و بەهایێ دەنگێ خوە بزانیت، كو دەنگێ وییە دێ گوھورینەكێ دروست كەت.
ئەرێ گەنج چاوان بۆ خوە لیستەكێ هەلبژێریت؟ ئەڤە ئێك ژ پسیارانە، یێن گەنج بەردەوام ژخوە دكەن، ئەو دەنگێ خوە بدەنە كێ و ل سەر چ بنەما دەنگێ خوە بدەن؟ یان كی هەژییە ببیتە نوینەرێ وی ل پەرلەمانێ كوردستانێ و ئایا ئەڤ كەسێ هەنێ دەما دەربازی پەرلەمانی دبیت، دێ شێت چ كەت؟ ئایا بتنێ دێ بیتە دەستبلندكەرێ حزبەكێ بیت یان دێ خوە ل كێشێن وی كەتە خودان و دێ بیتە بەرگریكارێ هەمییان و یا گرنگ، ئەو كەسێ دبیتە نوینەرێ وی د پەرلەمانیدا دێ ب سەر چ لیستا سیاسی ڤە بیت و دێ هەر كێشێن وی یێن خزمەتگوزاری، نەبوونا موچەی و نەبوونا كارەبێ و گازێ دێ هەر ھوسان مینن، ئازادیین تاكی دێ هەر ل بەر گەفا مەترسیێ بن یان ژی ئەو پێدڤی دەست نیشانكرنا كاندیدەكییە و ئەو كاندیدە دگەل لیستەكێ بیت و ئەو لیستە دێ شێت گوھورینان دروست كەت؟
وەك ئەم دزانین سەدان دەرچووین زانكویێ دمالێن خوەڤە دروونشتینە، بێكاری یا زورە و خزمەت نینن و ژلایەكێڤە ھندەك پاران ب سەر سەرێ خوەڤە دهاێژن و گەندەلی ب وانڤە دیارە. پێدڤییە گەنج ڤان هەمی پرسیاران ژخوە بكەت و بزانیت كو گەنج ھێزا هەمی مللەتانە، ئەڤرو گەنجێ مە نەشێت خوە برێڤەببەت تا بشێت ھزرێ د هەڤژینیێ و ئاڤاكرنا خێزانێ و ئایندێ خوەدا بكەت. لەو دبێژم دڤێت گەنج بێ دوودلی و ب هزرمەندانە ل رۆژا هەلبژارتنا قەستا بنگەهێن دەنگدانێ بكەت و وژدانا خۆ ئارام بكەت, چونكی هندەك كەس تنێ ل بەرژەوەندیێن تاكە كەسی دگەرن، كا دێ لدەف كیش لایەنی بدەست خۆڤە ئینن, لەورا ئەم دبێژین گەنجێن وەلاتێ خۆ خیانەتێ ل دیتنا خۆ نەكەی و بەرژەوەندییا تاكە كەسی ب سەر بەرژەوەندییا گشتی و چارەنڤیسێ وەلاتی نەئیخێ.
