مەڵبەندی ٣ـ ی هەولێری یەکێتیی نیشتمانیی کوردستان لە راگەیەنراوێکدا ئاماژە بۆ ئەوەدەکات، هەموو ئەوانەی تێکدراوە و شێوێندراوە چاكی دەکەنەوە و هەولێر دەکەنەوە بە پایتەختێك، کە هەولێرییەکان شانازی پێوە بکەن.
دەقی پەیامەکە :
پەیامی ئەمڕۆی ھەولێر .....
ھەمـوو ئەوانەی تێکدراوە، شێوێندراوە چاکی دەکەینەوە .
لەگەڵ خەڵکی ھەولێر پێکەوە، ھەموو ئەو بەھا جوانانەی ھەولێریان زیندوو دەکەینەوە، کە ئێستا تێکدراون و شێوێندراون، ھەناسە و ژینگە و خاکی ھەولێر پاک دەکەینەوە لە چڕەدوکەڵی پاڵاوگە قاچاخەکان، شار دەکەینە شاری سەرکەوتن بۆ داھێنانی گەنجان و لاوان.
ھەولێرییەکان بێ سنوور دڵساف و سادە و بێ بوغزن، لۆیێ ئاشتی کۆمەڵایەتی و پێکەوە ژیان و دەریا مەند و سەنگینەکەی ھەولێریان لەپێناو پاراستنی نان و ئازادی، نەک ھەر بۆ ھەولێر بەڵکو بۆ ھەموو کوردستان جۆش دەدەینەوە.
لەجیاتی موخبیر و جاسوس، ھەولێر پڕ دەکەین لە چاودێر و پارێزەری ژینگە و پاکەوانی جادە و گۆڕەپان و کۆڵانەکان.
ھەولێر دەکەینەوە بە پایتەختێک، کە ھەولێرییەکان شانازی پێوە بکەن و شەرمیشیان پێی نەبێت کە میوانێک سەردانی دەکا.
سڵاو ھەولێر گلێنەی چاوی کوردستان.
سڵاو شاری سوڵتان موزەفەر، شارەکەی کاک کۆسرەت.
یەکێتیی نیشتمانیی کوردستان
راگەیاندنی مەڵبەندی ٣ ـ ی ھەولێر
