لە میدیای سورییەوە

سورییەكان كە لە لوبنانەوە دەگەن، رۆژانێكی سەخت بەسەر دەبەن

دەزگای ئاژانسی (سانا)ی سوریا بەدواداچوونی لەگەڵ ئەو سورییانە كردووە كە لە لوبنانەوە  دەگەنە سوریا، دەركەوتووە كە رووبەڕووی دەرئەنجامێكی قورس دەبنەوە بەهۆی جێهێشتنی كارەكان و ناچاربوونیان بە هەڵهاتن. لێكۆڵینەوەكە ئاماژە بەوە دەكات ئەو سورییانە هەموو شتێكیان جێهێشتووە و ناتوانن بگەڕێنەوە بۆی و مەودایەكی دووریان بەپێ بڕیوە لەژێر دەنگی تۆپ و ساروخدا كە لە ناوچەكانی لوبناندا كەوتوونەتەخوارەوە.
بەو بۆنەیەشەوە تیمێكی مانگی سووری نێودەوڵەتی لەگەڵ تیمی كاری یەكگرتوو، بەشدارن لە پێشكەشكردنی هاوكاری تەندروستی و پزیشكی بۆ ئەو ئاوارانەی كە لە لوبنانەوە و لەڕێگەی بەندەری (یابووس)ەوە دەگەنە سوریا، چونكە زۆربەی ئەو كەسانەی دەگەنە ئەو بەندەرە تووشی نەخۆشیبوون.

وەفدی راگەیاندنی سوریا سەردانی تاران دەكات

رۆژنامەی (الثورة) بەدواداچوونێكی كردووە لەبارەی سەردانی وەفدی رۆژنامەنووسان و راگەیاندنكاران لە یەكێتیی رۆژنامەنووسانی سوریی بۆ تارانی پایتەختی ئێران كە زیاتر وەك گەشتێكی میدیایی و سیاسیی ناویبردووە.
رۆژنامەكە ئاماژەی بەوەشكردووە، ئەو وەفدە لە كەناڵە جیاجیاكانی سوریا پێكدێن و سەرەتای سەردانەكەشـــیان بەســەردانیكردنی دامەزراوەی رادیۆ و تەلەفزیۆنی ئێران دەستپێدەکات، لەو بارەیەشەوە بەڕێوەبەری بەشی هەواڵەكانی تایبەت بە كاروباری سیاسی (حەسەن عابدینی) ئەوەی پشتڕاستكردۆتەوە: ئەو دامەزراوەیە لە 136 كەناڵی رادیۆیی و تەلەفزیۆنی پێكدیت لە 31 پارێزگادا و هەر پارێزگایەكیش رادیۆ و تەلەفزیۆنی تایبەت بە خۆی هەیە، لەسەر ئاستی ئەو كەناڵانەش كەناڵی «خبر»ی ئێرانییە، هەروەها ئەو وەفدەی سوریا سەردانی ئەنجومەنی راوێژكاری ئێرانیش دەكات.

میلیشیاكان 300 داری زەیتونیان بڕیوەتەوە

لای خۆشیەوە رۆژنامەی (الوطن) راپۆرتێكی بڵاوكردۆتەوە دەربارەی بەردەوامبوونی میلیشیاكانی سوریای سەربە توركیا بەهۆی بەزاندنی سنوورەكانی شاری عەفرینی كورد كە داگیركراوە، ئەوەش لەكاتێكدایە كە ئەو میلیشیایانە 300 داری زەیتونیان بڕیوەتەوە لە نزیك گەڕەكی ئەشرەفییە لە شاری عەفرین.
بەپێی سەرچاوە راگەیاندنەكانی ئۆپۆزسیۆنی سوریاش دیارترین ئەو چەكدارانە كە ئەو 300 درەختەیان بڕیوەتەوە لە (گروپی موعتەسم)ن، بەپێی زانیارییەكانیش ئەو زەیتونانە تایبەتە بە هاووڵاتیانی گوندی قیبارە كە یەكێكە لە لادێكانی عەفرین، بەڵام ئەو ناوچانە كەوتوونەتە دەست چەكدارەكانی نزیك لە توركیا و تەواوی بازرگانییەكانی ئەو ناوچانە لەژێر ئاگایی راستەوخۆی ئەنقەرەدان.