ئەندرسۆن تالیسكا ئەو یاریزانە بەرازیلییەیە کە لە خولی رۆشەنی سعودی ئاستێكی باش پێشكەش دەكات و گۆڵی گرنگ و بەنرخ لەگەڵ كریستیانۆ رۆناڵدۆ بۆ یانە سعودییەكە دەكەن.
تالیسكا لە یاریی دێربی ریازی سعودییەدا كە یەكێك بوو لە یارییەكانی هەفتیە نۆیەمی ئەم خولە و نەسر و هیلال 1-1 یەكسان بوون، گۆڵی یەكەمی یارییەكە و یانەی نەسری لە دەقیقەی یەكەمی یارییەكەدا پاش تێپەڕ بوونی تەنیا 23 سانییە تۆمار كرد، ئەم گۆڵە:
*سێیەم خێراترین گۆڵە لە مێژووی دێربی ریازدا تۆمار دەكرێت.
*دووەم خێراترین گۆڵیشە لەم خولەدا تۆمار دەكرێت پاش گۆڵەكەی ئۆتاڤیۆ كەوەرزی رابردوو لە سانییەی 23 دا تۆماریكرد.
شایانی باسە تالیسكا و كریستیانۆ رۆناڵدۆ لە یانەی نەسر، سێیەم گۆڵكەری ئەم خولەن و هەریەكەیان 6 گۆڵیان تائێستا كردووە، یەكەم گۆڵكەر ئەلیکسەندەر میترۆڤیچ -ە لە یانەی هیلال بە 10 گۆڵ و كەریم بنزیمەش لە ئیتیحاد دووەم گۆڵكەرەو 8 گۆڵی كردووە.
