هه‌وراز كاوه
رود ڤان نیستلرۆی کە ڕاهێنه‌ری كاتی یانه‌ی مانچسته‌ر یونایتد بوو، دانی بەوەدانا کە حه‌زده‌كات بە شێوەیەکی هەمیشەیی راهێنەرایەتیی یانه‌كه‌ی بكات، تەنانەت بەوەش قایلە یاریدەدەری روبێن ئەمۆریم -ی راهێنەری نوێش بێت.
هێرشبەری پێشووی یانەی شەیتانە سوورەکان، هاوینی پێشوو گەڕایەوە بۆ یاریگای ئۆڵد ترافۆرد و پەیوەندیی بە تیمی ئێریک تێن هاگ -ەوە کرد، تین هاگ، 28 ـ ی مانگی رابردوو، لە پۆستەکەی دوورخرایەوە و رود ڤان نیستلرۆی بە شێوەیەکی کاتی ئەرکی راهێنانی تیپه‌كه‌ی گرتە ئەستۆ. نیستلرۆی رۆژی یەکشەممەی رابردوو، بۆ جاری چوارەم و کۆتایی راهێنەری یانەکە بوو، 3-0 لە لیستەر سیتیان بردەوە، دوای ئەم یارییە، ئەمۆریم -ی ڕاهێنەری نوێ دێته جێگه‌كه‌ی.
یانه سوورپۆشه‌كان بە سه‌رپه‌رشتی ڤان نیستلرۆی، دوو بردنەوە و یەکسان بوونێکیان هەیە، لە یۆرۆپالیگیشدا، بە دوو گۆڵ بەرامبەر بە گۆڵێک لە پاڵەوانی یۆنان، یانه‌ی پاوك سالۆنیکایان برده‌وه، دوای نزیکەی ساڵێک، ئەمە یەکەم بردنەوەی یانەکە بوو لە خولەکانی ئەوروپادا.
کاتێک پرسیاری ئەوەی لێکرا کە ئایا حەز دەکات وەک راهێنەری یانەک بمێنێتەوە، ڤان نیستلرۆی وتی: بەڵێ بێگومان، هه‌رچه‌نده باش بیرم لەوە کردۆته‌وه وەک یاریدەدەری راهێنەری نوێ بمێنمه‌وه نەک راهێنەر، له راستیدا ئاواتێکی گه‌وره‌م هه‌یه ببمە راهێنەری یانه‌یه‌ك، ئێستا گرێبەستێکی دوو ساڵەم وەک یاریدەدەر ئیمزا کردووە و تا ئێستاش لەو پۆستەدام.
له‌سه‌ر ئاستی تیپه‌كه‌شی ناوبراو وتی: تا ئێستا ئاستێکی زۆر باشمان پێشکەش کردووە، یاریزانەکان کاردانەوەی زۆرباشیان لە یارییەکاندا هەبووە.
گرێبەستی ڤان نیستلرۆی لەگەڵ یانەکە، تا ساڵی 2026 دەبێت، بەڵام دڵنیا نییە لەوەی کە ئایا لە مانچستەر بەردەوام دەبێت یان نا، چونكه پێدەچێت ئەمۆریم ستافی خۆی لە یانەی سپۆرتینگ -ەوە بهێنێت، ئەگەر ئەمۆریم بڕیاربدات تیمەکەی لەگەڵ خۆی بهێنێت، رەنگە رۆژی یەکشەممەی رابردوو دوا رۆژی نیستلرۆی بووبێت .
