ڕاهێنه‌ری شه‌یتانه سوورە‌كان چۆن گواسترایه‌وه‌؟

12:44 - 2024-11-12
وەرزش
208 جار خوێندراوەتەوە

ئیمان کاوە ‌

یانه‌ی مانچستەر یونایتد، لە کۆتایی وەرزی ڕابردوودا، ئامادەبوو تین هاگ لە پۆستەکەی دووربخاتەوە، دوای ئەوەی تیپەکە پلەی هەشتەمی پریمەرلیگ -ی بەدەستهێنا، بەڵام بردنەوەیان له‌ یانه‌ی مانچستەر سیتی 2-1 لە یاری کۆتایی جامی یەکێتیی ئینگلیزیدا، تێن هاگ -ی له‌ تیپه‌كه‌دا هێشته‌وه‌.
ئیداری یونایتد کۆتایی وەرزی ڕابردوو، لەگەڵ چەند ڕاهێنەرێک قسەیان کردبوو، لەوانە؛ تۆماس توخێل، ماوریسیۆ پۆچیتینۆ، ڕۆبێرتۆ دی زێربی و کیران مەکێنا و گاریس ساوسگەیت، کە ئەوکات ڕاهێنەری هه‌ڵبژارده‌ی ئینگلتەرا بوو، سه‌ره‌تا ساوسگێت پشتگیرییەکی بەهێزی ناوخۆیی هەبوو، بەڵام له‌ هێنانی بۆ مان یو، دوورخرایەوە،  دواتر یونایتد هه‌وڵیاندا لەگەڵ توخێل بگه‌نه‌ رێكکه‌وتن، به‌ڵام ئه‌و پێی وتبوون کە ئامادە نییە بگەڕێته‌وه‌ سه‌ر كار، تا پایزی ئه‌مساڵ، ئه‌وه‌بو توخێل مانگی ئۆکتۆبەر، وەک ڕاهێنەری هه‌ڵبژارده‌ی ئینگلتەرا دەستنیشانکرا.

بۆچی ڕوبن ئەمۆریم؟
 ئەمۆریم کۆتایی وەرزی ڕابردوو، لە ناو لیستی ئیداره‌ی مانچسته‌ردا نه‌بوو، بەڵام سەرچاوە ئاگادارەکان ڕایانگەیاندووە، کە ئه‌نجامه‌كانی ناوبراو وایكرد لەلایەن یانه‌ی مان یونایتدەوە وەک جێگره‌وه‌ی  تێن هاگ دیارییبکرێت، سه‌ره‌تا بۆ ساڵێك گرێبەستی تین هاگ درێژکرایه‌وه‌، كه‌چی نەیتوانی تیمەکە بەرەو پێش ببات. 
یونایتد لە کۆتایی مانگی ئەیلولدا لە یاریگای خۆیدا به‌ یانه‌ی تۆتنهام 3-0 دۆڕا، به‌په‌له‌ سه‌رانی ئۆڵد ترافۆرد لێکۆڵینەوەکانیان لەسەر ئەمۆریم و  چەند ڕاهێنەرانێکی دیکە، لەنێویاندا (چاڤی و ئیدین تێرزیچ)ـی ڕاهێنەری پێشووی بروسیا دۆرتمۆند،  چڕکردەوە تا جێگه‌ی تین هاگ بگرنه‌وه‌.
یارییەکەی سپێرز زەنگی ئاگادارکردنەوەی لەناو یونایتددا لێدا، لەوکاتەشدا بڕیاری دەرکردنی تین هاگ نەدرابوو، لەبری ئەوە تیپەکە بڕیاریدا پاش ده‌رفه‌تێكی دیكه‌ ئاموریم جێگەی تین هاگ بگرێته‌وه‌، ئه‌گه‌ر ئه‌نجامه‌كانی به‌وجۆرەی  پێشوو‌ بن.
 سەرچاوەکانی نێو  تیپەکە دەڵێن، عومەر بێرادا، بەڕێوەبەری جێبەجێکاری یانه‌ی مان یو کە وەرزی ڕابردوو لە مانچستەر سیتیه‌وه‌ ڕویكرده‌ قه‌ڵا سوورەکە‌، جەختی لە هێنانی ئەمۆریم دەکردەوە، زۆر زوو بوو بە بژاردەی دڵخوازیان، ئەمەش بەهۆی پێشینەی ده‌ستكه‌وته‌كانی له‌ خولی پورتوگالدا، هەر ئه‌وه‌ش وایكرد پاش شكسته‌كه‌ی یەکشەممەی پێشووی مان به‌رامبه‌ر به‌ وێستهام 2-1، ‌ تین هاگ دووربخرێتەو‌ە و ئامۆریم به‌فه‌رمی جێگه‌ی بگرێته‌وه‌.
سه‌ره‌تا یونایتد نزیکەی 11 ملیۆن دۆلار دەدات بۆ ئەوەی ئەمۆریم  گرێبەستەکەی له‌ یانه‌ی سپۆرتینگ لشبۆنه‌ هه‌ڵبوه‌شێنێته‌وه‌، لەگەڵ ئەوەشدا مووچەی ئەمۆریم دەدەن، هه‌روه‌ها ئاماده‌ن قه‌رەبووی گرێبه‌ستی یاریده‌ده‌ره‌كانیشی بكه‌نه‌وه‌، جگه‌ له‌و بڕە پاره‌یەی دیكه‌ کە ده‌بێت بیده‌ن به‌ ئیرك تین هاگ، هۆكاری سه‌ره‌كیی هێنانی ئامۆریم ئه‌وه‌یه‌ ناوبراو خاوه‌نی ستایلی یاری تۆتاڵ فۆتبۆڵه‌ و شێوازه‌كه‌ی سه‌ركه‌وتنی هێناوه‌ و لە سەرجەم نه‌یاره‌كانی  له‌ پورتوگاڵ بردۆتەوە، چونكه‌ ناوبراو توانی پاش 19 ساڵ چاوه‌ڕوانی، دوو نازنازی خولی پورتوگال بۆ یانه‌ی سپۆرتینگ لیشبۆنە بباته‌وه‌.

#ســتادیـۆم

بابەتە پەیوەندیدارەکان