پاڵەوانێتییە گرنگ و بەهێزەكانی تێنسی سەرزەوی كوڕان و كچان، بە تایبەتی ماستەرز و گراند سلامەكان دوا هەنگاوەكانیان دەنێن و وەرزی ئەمساڵی ئەم وەرزشە گرنكەی جیهان دوا هەنگاوەكانی دەنێت.
پاڵەوانێتیی كۆتایی ساڵ كۆتاییهات
پاش ئەوەی سەرجەم ماستەرز و گراند سلامەكانی ئەمساڵی كچان كۆتییانهات، لە ریازی پایتەختی سعودیە، دوا پاڵەوانێتیی گرنگی كچان كە پاڵەوانێتیی كۆتایی ساڵ بوو دەستیپێكرد و شەوی شەممەی رابردوو یاریی كۆتاییشی كرا.
ئەم پاڵەوانێتییە تەنیا 8 كچە یاریزان بەشدارییان تیادا كرد، كە یەكەم تا هەشتەمی ریزبەندیی گشتیی بوون و زۆرترین خاڵەكانیان لە گراند سلام و ماستەرزەكاندا كۆكردبۆوە.
ئەم هەشت كچە یاریزانە بەسەر دوو گروپدا دەبەشکرابوون:
* گروپی ئەرخەوانی (ئارینا سابالینكا، چین وین چینگ، جاسمین پاوڵینی، ئالینا ریباكینا).
* گروپی پرتەقاڵی (ئیگا شیڤیۆتیك، باربۆرا كریچكۆڤا، كۆكۆگۆف، جیسیكا پیگۆلا).
پاش چەندین یاریی لە نێوان ئەم كچە یاریزانانەدا، لەگروپی ئەرخەوانی (سابالینكاو چین وین چینگ) بۆ دوو یاریی پێشكۆتایی سەركەوتن، لەگروپی پرتەقاڵیشدا (كۆكۆ گۆف و كریچكۆڤا گەیشتنە دوو یاریی پێشكۆتایی.
رۆژی هەینی 8/11 دوو یاریی پێشكۆتایی كران و ئەنجامەكانیان بەمشێوەیە بوو:
* چین وین چینگ 2 × 0 كریچكۆڤا.
* كۆكۆ گۆف 2 × 0 سابالینكا.
بەمشێوەیە چینگ و گۆف بۆ یاریی كۆتایی سەركەوتن، شەوی شەممەی رابردووش یاریی كۆتایی كراو كۆكۆگۆفی ئەمریكی 2-1 لە چین وین چینگی چینی بردەوەو جامی پاڵەوانی ئەم پاڵەوانێتییە گرنگەی بەرز كردەوە.
