ئا: بامەرنی
دگەل بەرفرەهبوونا باژێرێ دهۆكێ، تاخێن نوی هاتینە ئاڤاكرن و ژمارا ترۆمبێلان ژی دگەلدا زێدەبوویە و ئێك ژ جاددێن دهوكێ یێن قەرەبالغییەكا زێدە یا ترۆمبێلان لێ دروست دبیت و هاولاتی و شوفێر بەردەوام گازندان ژێدكەن، جاددا ئالۆكانە، هاولاتیەك دبێژیت: «دەما مە بڤێت قەستا مالێن خوە بكەین، دڤێت نیڤ دەمژمێرێ بۆ ڤێ قەدا رێكێ دانین، ژبەركو گەلەك خەتمین دكەڤیتێ». لدوور قەرەبالغییا ڤێ جاددێ ئەندازیارەك دبێژیت: «راستە بەری سالەكێ جاددە هاتیە بەرفرەهكرن، لێ ئەو بەرفرهەكرنا جاددێ تێرا وێ قەرەبالغییێ ناكەت، نوكە كومەلگەها پیشەسازییا ترۆمبێلان (سیناعە) هاتیە وێرێ و دیسان كومەلگەها دومیز و كەمپا ئاوەریێن سوریا و ناحییا فەیدییێ و گوندێ قەسارا و دیسان كومەلگەها شاریا و ئەو گوندێن دەوروبەر دكەڤنە سەر ڤێ جاددێ و ژبیرنەكە ئەڤ جاددەیە رێكەكا سەرەكییە بۆ باژێرێن دی یێن عیراقێ ب دەروازێ برەهیم خەلیلا و توركیا ڤە گرێددەت». ئەندازیار محەمەد زێدەتر گوت: «قەرەبالغییا جاددێ ژ چەند ئەگەرەكانە، ئەو ژی ترۆمبێل ژ دهوكێ و دیسان ژ رێكا زاخو ژی دهێنە سەر ڤێ جاددێ و ئەڤ جاددە رێكەكا نێڤ دەولەتییە و بتنێ پرەكا ئاسنی یا كەڤن ڤان هەردوو ئالیان پێكڤە گرێددەت و ئەو ژی گەلەك یا كەڤنە، دەما ترۆمبێل دەربازی زالگەهێ دبن بۆ رێكا دومیز، دڤێت ئەو جاددە بهێتە بەرفرەهكرن و دەرفەتا بەرفرەهكرنێ ژی یا هەی، چەند ماركێت درێكێدانە دڤێت بهێنە راكرن، دیسان رەخێن جاددێ بهێنە زێدەكرن، ژبەركو پترییا جاران دەما ئەڤ خەتمینە دروست دبیت، ئەگەرێ وێ ژ كاركەفتنا ترۆمبێلەكێ یە و چ جهەك نینە ئەو ترۆمبێلە لێ بمینیت بتنێ جاددە نەبیت و دیسان خالەكا دی، ل دانێ ئێڤارێ دەما خەلك قەستا مالێن خوە دكەن، بلا رێ ب ترۆمبێلێن بارهەلگر نەهێتەدان كو بهێنە سەر وێ جاددێ، ژبەركو ئەو ژی ئەگەرەكێ ڤێ قەرەبالغیێ نە».
