رۆمانەك ل سەر جینوسایدەكا ئێزدییا دهێتە ئاڤاكرنێ

راپۆرت: ئاراز 


لدویڤ لاپەرێن مێژوویی ل دەڤەرێ، زێدەترین فەرمان ل سەر ئێزدییان هاتینە ئەنجامدان كو دبێژن 74 فەرمان بووینە و فەرمانا دووماھیێ ژی یا تیرۆرستێن داعشێ بوو، كو ب سەدان كەسێن سڤیل كۆمكوژ كرن و ب ھزاران كچ و ژنێن ئێزدی رەڤاندن و ژ فەرمانێن ددەمێ بوریدا و دروست ل سەر دەمێ دەولەتا عوسمانی و شەرێ ئێكێ یێ جیهانی، فەرمانا باسییان هەبوو، ئەوا ل 14ی گگولانا 1916ێ روودایی و تێدا 380 كەس هاتینە كۆمكوژ كرن و چەندین كچ و ژنێن ئێزدی ژی هاتنە رەڤاندن. رۆمانا سمۆیێ باپیر كو ل كومەلگەها شارییا ل ھولا لالش ئێڤاریەك بۆ ئیمزاكرنا وێ هاتیە رێكخستن، هەمان بابەتێ ڤێ جینوسایدێ بوو و دڤێ ئێڤاریێ دا كو سێ سمینار هاتنە پێشكێشكرن ل سەر ڤێ كومكوژییا بەری سەد سالان، ئەو ژی ئێك بۆ نڤیسەر و ڤەكولەر (داود مراد خەتاری) ل بن ناڤێ (هندەک ڕوودانێن فەرمانا باسییان) و نڤیسەری بەحسا ڤێ كۆمكوژیێ كر، ئەگەرێن پەیدابوونا روودانێن بەحسا فەرمانا كەزیان كر و پاشی دویڤدا سمینارەك بۆ نڤیسەر (حەسو ھورمی) ل بن ناڤێ (سمۆیێ باپیر و ڕولێ جڤاتا ڕۆحانی یا ئێزدییان د ڤەگەراندنا ڕەڤاندیاندا)كر، كو تێدا رولێ جڤاتا روحانی بەرز نرخاند و بابەت ب رەڤاندیێن كچ و ژنێن شنگالێ ڤە گرێدا ئەڤێن ژلایێ داعشا تیرۆرست ڤە هاتینە رەڤاندن و چاوان بەری زێدەتر ژ سەد سالان بابە شێخ دەستوری بۆ ڤەگەراندنا رەڤاندییان دابوو و پاشی سمینارەك بۆ خودانێ رۆمانێ نڤیسەر (عبدالرحمن بامەرنی) ل بن ناڤێ (بوچی من سمۆیێ باپیر كرە كاراكتەرێ رۆمانا خوە) و تێدا نڤیسەری بەحسا ڤێ روودانا دلتەزینا مێژووی كر و دیار كر، كو ئەركێ رۆمانڤیسی نە بەلگەكرنا مێژوویێ یە، بەلكو تژیكرنا ڤالاتییانە یێن بەرزە ب خەیالێ و داهێنانێ و گوت سێ ئەگەر هەبوون ئەز ڤێ رۆمانێ بنڤیسم و بڤی رەنگی (مرۆڤبوون، فەرمانا كەزییان و رازەمەندییا بابەشێخ بۆ ڤەگەراندنا رەڤاندییان) و پاشی بەحسا سمۆیێ باپیر كر كو پێدڤییا وی ب كەسەكێ وەك وی هەبوو ژبۆ كو رۆمانێ و روودانێ دوبارە ل سەر ناڤێ كاراكتەرێ خوە ساخ بكەت و پشتی هەر سێ سمینار ب دووماھی هاتین، دەرگەهێ دانوستاندنێ هاتە ڤەكرنێ و چەندین پرسیار و تێبینی هاتنە ئاراستەكرنێ و ل دووماھییێ رۆمان ل سەر بەشداربوویان هاتە بلاڤكرنێ و ئیمزاكرن و ئەڤ ئێڤارە چالاكییە ژلایێ نڤیسەر ساكار كامل ڤە دهاتە پرێڤەبرنێ.