ئا: سیڤان سامان
ژمارەیەك خوێندكاری قۆناغە جیاوازەكانی ئەمساڵ، سەردانی مۆزخانە و ئەرشیفی پەروەردەیی هەولێر دەكەن، بەسەرسوڕمانەوە دەڕواننە كەلوپەلەكۆنەكانی بواری پەروەردە و وێنەی مامۆستایان و تەختەڕەش و تەباشیر و چەندین پێداویستی تری سەردەمی رابردووی بواری خوێندن بووە.
وەك سەرپەرشتیارانی مۆزەخانەكە ئاماژەی بۆ دەكەن، ئامانجی مۆزەخانەکە، بریتییە لەئاشنابوونی خوێندكاران بە شێوازی وانەوتنەوە و كەلوپەلی خوێندنگاكانی سەردەمی پێشوو. هەروەها زەمینەساز دەكەین، تا هەرجارێك ژمارەیەك لە خوێندكارانی قۆناغە جیاوازەكان، سەردانی مۆزەخانە و ئەرشیفی پەروەردەی هەولێر بكەن، كە پێشتر شوێنەكەی یەكەم خوێندنگای هەولێر بووە بەناوی(ئەربیل ئولا).
هونەر ئەسكەندەر، سەرپەرشتیار لە مۆزەخانە و ئەرشیفی پەروەردەی هەولێر بە كوردستانی نوێی راگەیاند: لەرێگای ئەنجامدانی چالاكییەكانی مۆزەخانە و ئەرشیفی پەروەردەی هەولێر، خوێندكاران لە قۆناغە جیاوازەكان بەهاوكاری مامۆستایانی بەرێز، سەردانی ئەو مۆزەخانەیە دەكەن و بەشەكانی بەسەردەكەنەوە.
وتیشی: ئامانج لەو جۆرە چالاكیانە ئاشنابوونی خوێندكارانی ئەم سەردەمەیە بە شێوازی وانەوتنەوەی ساڵانی رابردوو و پەیوەندیی نێوان خوێندكاران و مامۆستایان، كە بێگومان ئەوكات جیاواز بووە، بەجۆرێك خوێندن بایەخی زیاتری پێ دەدرا و رێزی مامۆستایان و سەرپەرشتیارانی پەروەردەیی لە ئاستێكی بەرزدا بوو، نەوەك تەنیا لەناو خوێندكاران، بەڵكو لە نێو تەواوی كۆمەڵگا.
ئاماژەی بەوەشكرد: لەكاتی سەردانی ئەو خوێندكارانە، كەلوپەلەكانی سەردەمی پێشووی پەروەردە و خوێندن دەبینن، كە لە مۆزەخانەكە نمایشكراون، وەك تەختەڕەشە و تەباشیر و جلوبەرگی مامۆستا و خوێندكار و چەندان تایبەتمەندیی تر.
ئەوەشی خستەڕوو: هەروەها ئاشنای هەموو ئەو مامۆستا و بەڕێوەبەرانە دەبن، كە رۆژێك لە رۆژان لەخوێندنگاكان وانەیان بە خوێندكاران وتۆتەوە و لەسەر دەستی ئەوان سەدان كەس پێگەیشتوون و ئێستا پۆستی باڵایان هەیە، لەوێوە دەزانن كە ئەركی مامۆستا چەندە پیرۆزە و چیان كردووە بۆ پێگەیاندنی تاكەكانی كۆمەڵگا.
