سەعدون یونس: كاتێك لە ئەوروپا دەگەڕێمەوە بۆنی هەولێری جاران ناكەم

ئا: رەوەست نەوزاد

لە ئێستادا ئەو شارە لە خراپترین دۆخی مرۆڤایەتی و كۆمەڵایەتی و سیاسییدایە

سەعدون یونس، یەكێكە لە هونەرمەندە دێرینەكانی شاری هەولێر، لەرابردوودا بەشداریی لەچەندین كاری هونەری لە بواری شانۆ و درامادا كردووە، رۆڵی سەرەكی لە شانۆگەری(هەبوو نەبوو) هەبووە، هەر بەهۆی ئەو بەرهەمە كە رۆڵی(رەجەب)ی بینی، لەناو خەڵكدا ناسرا، لەكاتی وەڵامدانەوەی پرسیارەكانی كوردستانی نوێ، رایدەگەیەنێت دوای تەمەنێك لە كاری هونەری، لەسەرەتای نەودەكانی سەدەی رابردوودا، روو لە هاندەران دەكات، هۆكاری ئەو كۆچكردنەشی بۆ هەڕەشەی گروپە توندڕەوەكان دەگەڕێنێتەوە، بەوپێیەی لە ساڵی 1994 لە هەولێر لە هەوڵێكی تیرۆركردن رزگاری بووە.
سەرەتا لە بارەی هەوڵی تیرۆركردنی وتی: بەڵێ لە هەوڵی تیرۆركردن رزگارم بووە، سەرەتا هۆكارەكەم نەدەزانی، بەڵام دواتر بۆم دەركەوت مەبەستی توندڕەوەكان لە تیرۆركردنم ئەوە بوو، كە من هاوسەر و كچەكانم هێناوەتە ناو كاری هونەرەوە، ئەوەش بەبۆچوونی ئەوان، كارێكی حەرام بووە. هۆكارێكی تریش بۆ پێشكەشكردنی چەند كارێكی هونەری دەگەڕێتەوە، دیارە ئەوەش بەلای ئەوانەوە پەسەند نەبووە.
لە بارەی ژمارەی بەرهەمەكانی وتی: ژمارەی كارە هونەرییەكانم بە شانۆ وTVزیاتر لە 100 بەرهەمە، یەكەم بەرهەمم وەكو ئەكتەر لە ساڵی 1967 شانۆیەك بوو بە زمانی عەرەبی بەناوی(الحل الاخیر)، واتا(چارەسەری كۆتایی)، بەرهەمێكی تریشم هەر لەوكات بوو كە (التجربة فقط) بوو، بەمانای(تەنیا تاقیكردنەوە) كە هەردووكیان لە دەرهێنانی هونەرمەندی خوالێخۆشبوو هونەرمەند سەفوەت جەڕاح بوون.
بەرهەمەكانم كۆمەڵگای دەهەژاند
باسی لەوەشكرد: دوا بەرهەمیشم  لە ساڵی 2014 لە بواری سینەمادا فیلمی(ئەمریكانۆ) لە دەرهێنانی حەسەن عەلی بوو، لەگەڵ بەشی دووەمی درامای(كەونە دەركە)، ئەوەیش لە ساڵی 2015 بەشێوەی زنجیرە بەرهەمهێندرا، لە هەموو ئەو كارانەی ئەنجاممداوە پەشیمان نیم، چونكە خاوەن بیروڕا و قسەی خۆم بووم، كە بەرهەمەكانم كۆمەڵگای دەهەژاند.
سەبارەت بەدۆخی ئێستای شاری هەولێر ئەو هونەرمەندە وتی: لە ئێستادا ئەو شارە لە خراپترین دۆخی مرۆڤایەتی و كۆمەڵایەتی و سیاسییدایە، كاتی خۆی كە دەچوویتە ناو گەڕەكەكانی بۆنی چێشتی ماڵەكانت بۆ دەهات و دەرگاكانیش كراوە بوون و بچووبایتە هەر ماڵێك دەتتوانی نانێكی لێ بخۆیت، بەڵام ئێستا هەموو دەرگاكان داخراون و خەڵكێكی زۆری بێگانە لە هەولێرن، هەركاتێك لە ئەوروپا دێمەوە بۆنی هەولێر ناكەم.
هەرگیز سەمیرە خانی هاوسەرم لەبیر ناکەم
لە بارەی ژیانی ئێستای كۆمەڵایەتی خۆی مامۆستا سەعدون وتی: من دوای كۆچی دواییكردنی خێزانی یەكەمم، هاوسەرگیریم لەگەڵ ژنێکی مەغریبی كرد تائێستا بەیەكەوە دەژین، بەڵام من وتوومە دوای سەمیرە خانی هاوسەرم هەر شتێك بێتە ناو ژیانم جێگای ناگرێتەوە، كاتێك تووشی نەخۆشی شێرپەنجەش بوو لە ئەڵمانیا، ماوەی 10 مانگ لەگەڵی بووم یەك چركەش جێمنەهێشت، تا وەسیەتەكەشم بۆی جێبەجێكرد، ئەویش ناشتنی بوو لە زێدی خۆی لە شاری هەولێر، دوای ئەوەی كۆچی دوایی كرد، ئێستاش هەر ئەو دایكی منداڵەكانمە و قەت لەبیری ناكەم، بەڵام ئەو كۆچی دوایی كردووەو من دەژیم، ژیانیش ئەوەیە دەبێت نان بخۆی و بخەویت و هاوژینێكت هەبێت.
ئێستا وەك ئامێرێك كار دەكەین
لەبارەی نزمی ئاستی ئێستای هونەر لە كوردستان، سەعدون یونس وتی: لەڕابردوودا هەر كەسێك بەر لەوەی ببوایە بە ئەكتەر، هەستێكی نەتەوایەتی هەبوو، بەڵام ئێستا هەست بە هەموو شتێك دەكەیت تەنیا بە كوردبوونی خۆمان ناكەین، بۆیە ئێستا وەك ئامێرێك كار دەكەین، من لەو ماوەیەی ئەڵمانیا دەژیم، ئەو توانا و هەستەی بۆ كاری هونەر لە سەردەمی ئێمە هەبوو، هیچ شتێكی كەمتر نەبوو لەو توانایەی كە هونەرمەندە ئەڵمانییەكان هەیانە.