ئا: رۆنیا هێمن
خانمێكی رۆژهەڵاتی کوردستان، ئێستا لە هەولێر دەژی، دەف دەكاتە باشترین هاوڕێی ژیانی و تێكەڵ بە دونیای رۆحی خۆی دەكات، ئەو دەڵێت: دوای هەڵبژاردنی ئەو ئامێرە لە نێو ئامێرەكانی تری موزیك، توانیویەتی مژارێك لە سەر«مێژووی ئامێری دەف و فەلسەفەی بازنەی دەف» بنووسێتەوە.
سارا تەڵایی، شاعیر و هونەرمەندی شێوەكار لەبارەی هەڵبژاردنی ئامێری دەف بۆ كوردستانی نوێ وتی: هەر ئامێرێكی مۆسیقا چێژی تایبەت بە خۆی هەیە، بەڵام لەبەرئەوەی دەف بۆ من زیاتر وزە بەخشتر بوو و لەگەڵ دونیای رۆحی مندا زیاتر دەگونجا.
ئەو كە بۆ ماوەیەك لە زانكۆی جیهان مامۆستا بووە لە هەولێر، وتیشی: لە تەمەنی شانزە ساڵیدا یەكەم ریتمەكانی ئامێری «دف»م گوێ لێ بوو، ئەو كات كۆمەڵێك میوانی نێو دونیای دەروێشی و سوفیگەریمان هەبوو، كە لەگەڵ بیستی دەنگی ئەم ئامێرە، هەستم دەكرد شتێك لەو دەنگ و ریتمەی دایە كە بە یەكمان دەبەستێتەوە، هەر ئەو كاتە بوو ئامێرێكی دەفم كردە میوانی هەمیشەیی ژیانم، جار نا جارێك، كە هەستم بە بێ تاقەتی دەكرد، بۆ ئارامی خۆم، ناشارەزایانە زرینگەم لێوە دەهێنا.
ئاماژەی بەوەشكرد: وەرزی دووەمی ژیانم لە ناسینی دەف، كاتێك 22 ساڵ بووم، لەگەڵ گروپی چل دەفی تاران ئاشنایەتیم دروست كرد، ئەمە وایكرد كە بتوانم بەشێوەیەكی ئەكادیمی پەرە بە ژەنینی ئەو ئامێرە بدەم و لە مێژوو و رەسەنایەتی ئەو ئامێرە زیاتر بكۆڵمەوە، هەرئەوەش وایكرد مژارێك لە سەر «مێژووی ئامێری دەف و فەلسەفەی بازنەی دەف» بنووسمەوە.
لەبارەی پێویستی هێزو توانا لە ژەنینی دەف وتی: ژەنینی هەموو ئامێرێك دەبێ لە رۆحەوە سەرچاوە بگرێت، ئەوە وا دەكات كە تەواوی جەستە لە دەربڕینی ئەو هەستە بەشدار بێت، بۆیە دەف لەبەرئەوەی لەسەر دەست راگیر دەبێت، هێز و وزەی زیاتری پێویستە، سەبارەت بە ئامێرەكانی تر.
ئەوەش هۆنراوەیەكی سارا تەڵاییە لەبارەی دەفەوە.
بە لیوی چەڕخی گەردانت، دەهاژێنێ دڵ و گیانم
بە پەنجەی سیمی خاراوت دەلەرزێ عەقڵ و عیرفانم
لە ڕیزی دایرەی گەردوون، بە دەف چەرخێ بنەخشێنە
لە ڕیزی دایرەی تەوحید، فەنا كە دین و ئیمانم
لە شانەی زوڵفی ئاڵۆزت، هەزاران نەغمە بەرپایە
بە هەر نەغمە دەلاوێنێ، بە وێنەی سەروی بوستانم
ئەسیرت بووم شەهیدت چەم، بە چەرمت ئاڵو گۆڕم كە
ئیشارەت كە لە سینەی من، كەوا پەخشە و پەرێشانم
دەفی من ئایەتی ئەشقە، نەوای مەحشەر دەخوڵقێنێ
دەسا مەحشەر بكە سارا خەرامانی خەراما
