ئیسرا موسلیح: لە هەولێر، كچانی فۆتۆگرافەر و كامێرامان دەرفەتی كاركردنیان لە كوڕان زیاترە

ئا، ئیمان فەرهاد

ئیسرا موسلیح، ماوەی زیاتر لە پێنج ساڵە لە كاری فۆتۆگرافەری و كامێرامانی بەردەوامە، باس لە ئەزموونی خۆی لەو بوارە دەكات و بە كوردستانی نوێی راگەیاند: ماوەی زیاتر لە پێنج ساڵە كاری فۆتۆ و ڤیدیۆ دەكەم، لە ئاهەنگەكانی خێزانی وەك دەستنیشانكردن و خەنەبەندان و مارەبڕین و بووك گواستنەوە و یادی لەدایكبوون و چەندین بۆنەی دیكە كاری وێنەگرتن دەكەم.
باسی لەوەش كرد: هەرچەندە فۆتۆگرافی و كامێرامانی پێویستیی بە وزەو توانایەكی زۆر هەیە، بەڵام لەبەر خۆشەویستیمان بۆ پیشەكە، دەتوانیین بەباشی كارەكان ئەنجامبدەین، ئەمەش دەریدەخات كە ئێمە توانایەكی زۆرمان هەیە، ئەگەر بمانەوێت بەكاریبهێنین.
وتیشی: هەستیاری كارەكەی ئێمە لەوەدایە، نابێت بچووكترین هەڵە و كەموكوڕییمان هەبێت، بۆیە كاتێك لە بوونی ئاهەنگێك ئاگادار دەكرێینەوە، چەند رۆژێك پێشتر ئامادەكاری بۆ دەكەین، تا لە كەرەستە و پێداویستییەكانی ئەو ئاهەنگە دڵنیابین، چونكە كەمترین كەموكوڕی ستافی وێنەگرتن، دەبێتە هۆی دروستبوونی گرفت بۆ بۆنە و ئاهەنگەكە.
پێشیوابوو: كچان هاوشێوەی رەگەزی بەرامبەر پێویستییان بە داهاتی خۆیانە، تا بتوانن سەربەرزانە بژین، بۆیە لە كاتی ئێستا رێژەی كاركردنی كچان لە هەولێر لەزیادبووندایە، بەتایبەتیی لە 10 بۆ 15 ساڵی رابردوودا دامەزراندن لە فەرمانگە حكومییەكان نییە، بۆیە دەرچووانی زانكۆ، هەوڵی فێربوون ‌و دۆزینەوەی پیشەیەك بۆ خۆیان دەدەن.