دیڤچوون: بادینان
داگیركەرێن كوردستانێ چ شوینەوارێن دێرین بۆ كوردستانێ نەھێلاینە و ئەڤێن ماین ژی، ژبێ خودانی و چاڤنەدانێ بخوە یێ ژناڤدچن. مەدرەسا قوبەهان و گورستانا سولتانان ل ئامێدیێ، كو گورێ سولتان حەسەن وەلی ژی دناڤدایە، ل ھیڤییا پویتەپێدانێ و سەخبێركرنێ نە، سەرەرای سوزێن سەخبێركرنێ، كو دێ بجوانترین شێوە ھێنە نووژەنكرن، لێ نە باران و نە سرۆشت خوە ل وان سوزان ناگرن. نڤیسەرەك گازندەیان دكەت كو ئەڤ شوینەوارە ماینەڤە بێ خودان، ئیسماعیل بادی خودانێ پەرتووكا (مەدرەسا قوبەهان... رۆلێ و د پێشڤەبرنا ئەدەبێ كلاسیكێن كوردیدا)، دبێژیت: «مه‌دره‌سا قوبه‌هان وه‌كو ئێك ژ گرنگترین مه‌دره‌سێن دینی لدە‌ڤه‌رێ كو خه‌لكێ ل زانین و زانستا دگه‌ریان، قه‌ست دكرێ ژ به‌ر كو سه‌یدایێن زیره‌ك و تێر زانین و ب ناڤوده‌نگ لێ هه‌بووینه، وه‌رگرتنا ده‌ستویرییا مه‌لاتیێ ژ وێ مه‌دره‌سێ جهێ باوه‌ریێ بوو، له‌وا فه‌ر بوو، نوكه ئه‌و مه‌دره‌سه هاتبا نووژەنكرن و ببا جهه‌كێ شوینواری و بۆ سه‌ره‌دانا خه‌لكی ژی دا پتر و باشتر لێ هێت و هه‌كه یا دروستبا، رێڤه‌به‌ریا شوینواران دشییا بۆ خۆ وه‌كو داهات مفای ژێ دیتبا». لدوور شوینوارێن دی یێن دەڤەرا ئامێدیێ، بادی گوت: «گۆڕستانا سۆلتانێن ئامێدیێ، ب راستی ئه‌و ژی یا بێ خودانه و مخابن كو دامه‌زرێنه‌ر و ئاڤاكه‌رێ میرگه‌هێ و مه‌دره‌سا قوبه‌هان و گۆڕێ هه‌ڤژینا وی ره‌وشه‌ن خانێ ژی هه‌ر ئێك د بن قوبه‌كێ ڤه‌نه، ل گه‌ل چه‌ند قه‌برێن دیتر، هه‌می كێلی دشكه‌ستی نه‌و و بێ سه‌روبه‌ر بووینه، قه‌بر بێ رێزی لێ هاتینه كرن، دڤیا نوكه ئه‌و وه‌سا ب سە‌روبه‌ر بان كو مروڤ شیابا وان دیمه‌نێن جوان مفای ژێ وه‌ربگریت». تە پەرتووكەك ل سەر مەدرەسا قوبەهان هەیە، ئایا وەك نڤیسەر و دیڤچوون و ڤەكولین ل سەر ڤان شوینواران، یا پێدڤی هاتییە كرنێ؟ ئیسماعیل بادی گوت: «وه‌كو دویڤچوون و ڤه‌كولین، هه‌تا نوكه تشتێ باش ل سه‌ر هه‌ردو جهان هاتییه نڤیسین، لێ جهێ داخێ یه وه‌كو خزمه‌ت و نویژە‌نكرن، نه ل چ ئاستن و ئه‌ڤ چه‌نده وەكو كێماسی بۆ حكومه‌تێ دزڤڕیت..!!
