پەرتووكا وی یا سیێ یە ژبن چاپێ دەردكەڤیت و د سوشیالێ دا یێ چالاكە و نڤیسینێن وی دھێنە خواندن. پەرتووك بناڤێ (یار و یارا.. بەردەوامیا داستانا ئەڤینداران)، ژ قەبارێ ناڤین و 304 لاپەران بخوەڤەدگریت. سەبارەت پەرتووكا خوە، نەوزاد ئامێدی گوت: «ئەڤ پەرتووكا من یا نوی ب شێوازێ چیرۆكێت كلاسیك و سیناریۆیێ دھێتە نڤیسان و ئەڤ كارێن بڤی رەنگی بۆ تەلەفزیونێ گەلەك د گونجایینە و دڤێ پەرتووكێدا من ڤییایە چیرۆكا كوردی یا كەڤن ساخ بكەمەڤە، ئەو ژی ب درۆستكرنا پرەكی دناڤبەرا كەلتورێ كوردی و كەلتورێ ئەورۆپیدا و ئەڤە ژی برێكا چەندین پرسێن گرنگ چ یێن نەتەوەیی بن یان ئاینی و كوچبەریێ و توندرەویێ». سەبارەت زمانێ پەرتووك پێهاتیە نڤیسین، نەوزادی گوت: «گرنگترین و ب جورئەترین خال دهزرا مندا، پرسا زمانییە و شێوازێ نڤیسینیێ. من هەوڵدا چیرۆکێ ب زمانەکێ سادە بنڤیسم، کو هەمی کەس د هەمی ژیەکیدا بشێت بێ ماندیبوون بخوینیت و رەنگە ئەڤە دێ بیتە جهێ رەخنا نڤیسەرێت چێرۆک و رۆمانێ، لێ ئەز وەک کەسەک نڤیسەر و حەز ژ خواندنێ دکەم، خواندنا گەلەك رۆمانێن كوردی ئەز ماندیدكرم تا من دخواندن و رەنگە گەلەكان چەند جاران ئەز لێ زڤریبامە تا ئەز شیابام بزانم نڤیسەرێ وێ ڤییایە چ بێژیت و ئەو شێوازێ نڤیسینێ، دگەل ئەڤرویا سوشیال میدیایێ نا گونجیت، ژبەركو د سەردەمێ نۆكەدا و ئەڤ هەمی نڤیسین و پەرتووكێن دكەڤنە بەردەستێ مە، ژبلی ئەڤێن بدەنگ و رەنگ، ئێدی خواندەڤایی ئەو دەمە نامینیت بچیت هەر پەرتووكا بیت بخوینیت، ژبەرڤێ چەندێ د پەرتووكا خوەدا من یا ڤییای خوە د سەر ڤێ چەندێ را بهاڤێژم و دەما خواندەڤا ڤێ پەرتووكێ دخوینیت، دێ ڤێ چەندێ بینیت و ئەز باوەرم ئەو ژی، دێ دگەل بوچوونا من بیت».
