ئەڤ گوتنە چەندین جاران كەفتییە بەرگوھێن من و گەلەك جاران دھێتە دوبارەكرنێ، ئەو ژی پەشیمانییا ددویف هەڤژینیێ دا، لڤێرە پرسیارا ئەڤەیە ئایا راستە دەما كور ژنێ بینیت یان كچ شوی دكەت، هەر دوو پەشیمان دبن؟! رەنگە هەبن، تایبەت دڤان قەیرانێن ئێك لدویڤ ئێك یێن نە دامەزراندنێ، بێكاریێ، بێ موچەییێ و گرانییا بازاری و گرانییا كرییا خانی و ئەڤێن هەنێ هەمی بارگرانینە، كو كورۆ و كچ ڤێ چەندێ بێژن و شویینا ژیانا وان یا نوی خۆش ببیت، ئاسودە بژین و ئایندەكی بۆ خوە دروست بكەن، دكەڤنە بەرامبەری چەندین بەرپرساتییا و ژیانا وان گەلەك ئالوز دبیت و نزانن دێ چاوان خوە ب خودان كەن و پێدڤیێن خوە یێن رۆژانە پەیدا كەن. لێ لڤێرە من دڤێت بێژمە وان كور و كچان ئەڤێن دڤێن هەڤژینیێ پێك بینین، بەری ڤێ چەندێ بكەن ھزرا خوە ل چەند تشتان بكەن، ئایا وە چ جورە هەڤژینی دڤێت، هەڤژینیەك ل سەر بنەمایێ زەلام بەرپرسیارە ژ ئینانا داهاتی و ژن بتنێ بەرمالییە و دڤێت پێدڤیێن وێ بۆ بەرهەڤ بكەت، هەكە خو ژكیڤە بینیت یان ژی هەردوو تەمامكەرێن ئێك و د خۆشی و نەخۆشیێن ئێكدا دگەل ئێكن؟ ئەگەر خوشی و نەخوشیێن وان ئێك بن، دڤێت هەر ژ دەستپێكێ هەردوو ھندەك رێكەفتنان بكەن، ھندەك پلانان بۆ خوە دانن، خوە ژ چاڤلێكرنێ بدەنە پاش، ئەو پارێ ل بەر دەستێ وان هەی یان دەیبابێن كوری بۆ ل شەھیانا وی دمەزێخن، بلا بزانن دێ چاوان سەرەدەریێ دگەلدا كەن، بتنێ ئەگەر ب قەلەم و دەفتەران حساب بكەین، پارێ سالونێ و پارێ كرێكرنا جل و بەرگان و خازگینییا و هەتا دووماھیێ بزانن چەندە و وان پاران هەلگرن، دێ بەفرگرەك و تەلەفزیون و جل شوو و چەندین تشتێن دییێن ناڤمالیێ بۆ پێھێن، ئەرێ ئەڤ تشتێن مالێ فەرترن یان ژی پارە مەزاختن دا خوە لدەف هەڤالێن خوە بینە پێش؟! بھزرا من دڤێت كور و كچ ڤان خواندنا هەمیان بكەن، ھینگێ دێ ژیانا وان خوشتر بیت، كور دێ ب ژن كەڤن و دێ شێن ژ چنەیێ دەستپێكەن و كچ ژی ل مالێ نابنە قەیرە ئەگەر دەستان ژھندەك داخوازیێن خوە بەردەن.
