ئیحسان چەلکی
ئێدی گەنجان حەز ل سەر بابەتێن نەتەوی و جڤاکی و پێشڤەبرنا کەساتییا خۆ نەماینە، ئەڤەژی خالەکا گەلەکا نەرێنییە کو گەنجێ مە کەفتییە تێدا، چۆنکی ئاگەهــ ژ هیچ بابەتەکێ ژیانێ نەمایە ژ بلی حەزێن خۆ
کورد وەکو ئێک ژ میللەتێن دێرینێن کوردستانێ، ل سەرانسەری جیهانێ د بەلاڤن. ئەڤ بەلاڤییا هەژی ژ لایەکیڤە باشیێن خۆ هەنە بۆ ناساندنا میللەتێ کورد ل ناڤ گەنج و لاوێن میللەتێن دیدا، لێ پڕ ب مخابنیڤە ئەز ئەڤێ چەندێ دناڤ گەنجێن کورد دا نابینم تایبەت ل باشۆری، دبینین ئەڤ گەنجە بەڕەلایی بوونە و ب ساناهی دکەڤنە ژێر کارتێکرنا کەسێن ڤالا و بێ پەیام، ئەگەر چاڤ خشاندنەکێ ل ناڤ ماڵپەرێن تۆڕێن کوردی بکەین، دێ باش خۆیا بیت تا چ رادە گەنجێ مە یێ هۆشیارە، ئەڤ بەڕەلاییەژی تا رادەکێ باش بۆ خەمسارییا دەیک و بابان ڤەدگەڕیت، گەلەک جاران من ئاماژە ب ڤێ خالێ کرییە، دەیک و باب دبێژن: ((ما ئەم دشێن ببینە کامیرە ل هنداڤ سەرێ وان! )).
هەلبەت بەلێ پێدڤییە تو ببیە کامیرە ل هنداڤ سەرێ زارۆکێن خۆ، چۆنکی ئاڤاکرنا ئەڤان زارۆکان ل ستۆیێ تەدایە، شڤێدی من ڤییا تەماشەیی سۆشیالا کوردی بکەم، من دیت گەلەک ب ساناهی یاری ب نامیسا ئێک و دوو، یاری ب ئاینێن ئێک و دوو..هتد دکەن، کچ و کۆڕ ب ساناهی دکەڤنە ژێر دەستهەلاتا ئێک و دوو، ئەڤەژی دبیتە ئەگەر کو گەنجێ مە بتنێ هزر د ئێک بابەتیدا بکەت ئەوژی حەزێن ویێن تایبەتن! ئێدی گەنجان حەز ل سەر بابەتێن نەتەوی و جڤاکی و پێشڤەبرنا کەساتییا خۆ نەماینە، ئەڤەژی خالەکا گەلەکا نەرێنییە کو گەنجێ مە کەفتییە تێدا، چۆنکی ئاگەهــ ژ هیچ بابەتەکێ ژیانێ نەمایە ژ بلی حەزێن خۆ، دیسان دیڤچوونا گەنجان لدویڤ هندەک کەسان کو ب راستی تاوانە ئەڤ کەسێن هە ب شێوەیەک ئازاد ل سەر سۆشیالێ د ئاخڤن! یا ژ ئەڤێ نەخۆشتر رێکلامانژی دکەن بێی کو هیچ باوەرنامەیەک یان شارازییەک ب ڤی کەل و پەلی هەبیت! گەنجێن مەژی بێی دوو دلی ئێکسەر ئەوان بەرهەمان دکڕن و گۆهدارییا وان دکەن!
ل دوماهیێ من دڤێت بێژم گەلی دەیک و بابێن خۆشتڤی پەروەردەکرنا زارۆکێن هەوە ل ستۆیێ هەوەدایە، جار ب جاران تەماشەی مۆبایلا زارۆکێن خۆ بکەن، بزانن ل دویڤ کێ دچن و تەماشەی کێ دکەن، چۆنکی باوەر ژمن بکە ئەو دێ ئەوان رەفتاران کەت یێن ئەو دبینیت، گەلەک جاران دەما ئەز ڤیدویێن هندەک کچ و کۆڕان دبینم، ئەز هزر دکەم کو ئەڤ کەسێن هە بێ سەمیانن یان بێ خۆدانن!
دیسان پەیامەک بۆ جڤاتا نڤیسەرێن مە پێدڤییە هوینژی راببنە سەر خۆ و مەیدانێ بۆ ئەڤان کەساتیێن ڤالا نەهێلن و گەنجێ مە مژویل بکەن ب هندەک تشتێن کو د بەرژەوەندی و مفایێ واندا بیت، دا کو جڤاکەکێ پێشکەفتی و سەر بلند بهێتە هەبوونێ، ل دزماهیێ ژی داخوازا ڤەگەڕیان و پێشکەفتنا هەر لایەکی دخوازم و هیڤیخوازم ئەم هەمی ببینە پاڵێن پێشکەفتن و پێشڤەبرنا نڤشێ لدویڤ خۆدا..
