ئا: كوردستانێ نوێی بادینان
ئێك ژ رۆژنامەڤانێن ل دەستپێكا دەركەفتنا رۆژناما كوردستانی نوێ ل رۆژا 12/01/1992ێ كاركری، بۆ كوردستانی نوێی بادینان بەحسا سەربورا خوە دگەل دەركەفتنا وێ دكەت و دبێژیت: «من چەندین كار دناڤ رۆژناما كوردستانی نوێ دا كرینە، ل دەستپێكێ وەك بەشێ بادینی هاتمە دامەزراندن و پاشی پەیامنێرێ بەشێ ریپورتاجا و بەلێ دگەل ڤان ژی من هەمی ئەركەكێ دی ئەنجامددا». شێخ غیاسەددین نەقشەبەندی، كو هەر ژ ژمارە سفر دگەل رۆژنامێ كاركریە، زێدەتر گوت: «هەر دگەل ژمارە سفر ئەز دگەل دەستەیا دامەزرێنەرا رۆژناما كوردستانی نوێی بووم و تا سالا 2004ێ ئەز دگەل رۆژنامێ مام و پاشی ئەز بەرەڤ ئوسترالیا چووم». نەقشەبەندی بەحسا چەند گوشەیەكێن رۆژنامێ دكەت و دبێژیت: «من چەندین گوشە و ستوون درۆژنامێ دا دامەزراندن و گرنگترینێ وان (بۆمبا) بوو، كو گوشەكا رۆژانەبوو و من ب نازناڤێ (زێرەڤان) دنڤیسی و دیسان (من و تۆ) گوشەكا كورتبوو و ئەڤ گوشە یا تەرخانكری بوو دگەل ھونەرمەندێن گەنج و دیسان مە چیرۆكە هەوال دامەزراند، كو تایبەت بوو ژبۆ كەیسێن دادگەهێ و ب تایبەت دادگەها جینایاتان و ئەڤ چیرۆكە هەوالە ژی من ب شێوازەكێ ئەدەبی دنڤیسین و من ناڤ و رویدان دگوھورین، بۆ وێ كو پێزانین و ناڤێن كەسان د بەرزە و نخافتی بن». لدوور پێشنیار و رەخنەیێن وی ئەگەر هەبن، نەقشەبەندی گوت: «بەردەوامییا دەرچوونا كوردستانی نوێ وەكو رۆژنامەكا كاغەزی بخوە بخودا جالنجیەكا مەزنە، ژبەركو گەلەك رۆژنامە و گوڤاران نەشیاینە بەردەوامیێ بدەنە دەركەفتنا خوە و ب بەهانەیێن جودا، وەك (تەمویل نینە، رۆژناما كاغەزی ناهێتە خواندن و بۆ خەلكێ گرنگ نینە وووو هاتد)، ئەز بخوە ژبلی تەمویلێ ئەڤێن دی چییان ب بەهانە نزانم، ژبەركو ئەگەر رۆژنامە یا باش بیت، خەلك لهەمی دەمەكی دێ وێ خوینیت و تشتێ باش، كوردستانی نوێ گرنگییێ ب میدیا ئەلەكترۆنی ددەت و ئەڤە ژی پێنگاڤەكا باشە، كو رۆژنامە بشێت مفای ژ تەكنەلوجیایێ وەربگریت و خالەكا دی یا من دڤێت بڤێ هەلكەفتێ ئەز باس بكەم، دەركەفتنا كوردستانی نوێی بادینانە و بلاڤبوونا ڤێ پاشكۆیێ ل هەمی باژێر و باژێركان و ئەڤە ژی بخوە پێنگاڤەكا باشە بۆ تێكەلكرنا شێوەزاران و ئەڤە پێنگاڤەكا باشە كوردستانی نوێ هاڤێتی و دڤێت پێشڤە ببەت».
