زوهێر كورەماركی
دەما نوژدار ژ هەر ئەگەرەكی بەرێ نەخۆشێ خوە ددەتە دەرمانخانەكا تایبەت چ یا دناڤ كومەلگەها نوژداری دا بیت یان ئێكا نزیكی كلینیكا وی و ئەڤە ژی گومانەكێ ل سەر كوالیتا وی دەرمانی و بهایێ وێ دروست دكەت و نەخۆش ژی چ ژ دلساخیێ بیت چ ژ نەزاینا خوە بیت
ئه‌رێ هوون دزانن بۆچی خه‌لكێ مە تۆشی گه‌له‌ك نه‌خۆشیا دبن و تۆشی نه‌خۆشیێن دۆمدرێژ دبن؟ ژبەركو ئەو نەخۆشیێن مە لڤێرە هەین، ل وەلاتێن چەند جاركی هندی مە ئەو نەخۆشی لێنینن و ئەگەر زێدەتر ل سەر ئەگەران ژی راوەستین، خالا سەرەكی: ئەم مللەتەکین هێشتا دناڤ دۆزەخا نەزانینێدا دژین و مە خواندن و نڤێسین بۆ خۆ نەکریە کەلتۆر، داکو ئەم ژی فێر ببین و لبەر تەندروستیا خۆ راوەستین و گرنگیێ پێ بدەین، تشتێ باش و خوارنا تەندروست بخوین و کەرب و کین و نەڤیانێ ژ دلێ خۆ بهاڤێژین.
خالا دوویێ: ئەم بەردەوام بەحسا نوژداران و كەرتێ تەندروستیێ دكەین، ئەم نابێژین نوژدارێن مە دزیرەك نینن، لێ ئەو دەرمانێن دهێنە بەردەستێ وان، زوربەیا وان سەختەنە و دەرمانێن باش نینن و دەهان نموونە دهێنە بلاڤكرنێ، دەما نوژدار ژ هەر ئەگەرەكی بەرێ نەخۆشێ خوە ددەتە دەرمانخانەكا تایبەت چ یا دناڤ كومەلگەها نوژداری دا بیت یان ئێكا نزیكی كلینیكا وی و ئەڤە ژی گومانەكێ ل سەر كوالیتا وی دەرمانی و بهایێ وێ دروست دكەت و نەخۆش ژی چ ژ دلساخیێ بیت چ ژ نەزاینا خوە بیت، دێ هەم دەرمانەكێ كوالیتا وی نەباش كریت و هەم ب بهایەكێ گران ژی و ئەڤ نەزانینا هەنێ، دوو زیانان ڤێدئێخیت. خالەكا دی یا گرنگ، چاڤ پێنەرابوونێن مە، دێ بەرێخوەدەینە كەسەكی ژ مە دەولەمەندترە، شوینا ئەم ژی چاڤلێكرنێ بۆ بكەین و شیانێن خوە بدەینە كاری و پەیسكان ب سەركەڤین، دێ لایەنێ زكرەشیێ هەلبژێرین و دەڤێ گازندێ هێلینە ڤەكری و ئەڤە ژبلی كەرب و كینێ و ئەم ژبیردكەین، گل و گازندە كرن بخوە چەكەكێ دوو سەرە، دەما بەردەوام چاڤێن مە مانە ل خەلكی، ژیان و ژیارا وان، ھینگێ بتنێ ئەم دێ ژیانا خوە نەخوش كەین و دێ خرابیێن وێ ل سەر دەروونێ مە و ساخلەمییا مە زڤرن. دیسان خالەكا دی یا گرنگ دناڤمەدا هەیە و ئەز دكەمە ماكا پاشدا زڤرین و نەزانینا مە، ئەو ژی خوە مەزنكرن، ژخوە نەگرتن، مە دجهێ مەدا دهێلن و زیانێ بمە دگەھینن، دێ بینی گەنجەك دەرچوویێ زانكویێ یە و دێ دەرفەتا كارەكی بۆ دروست بیت، چ پیشە بیت بازرگانیەكا بچیك بیت، هەر كارەكێ بیت، دێ بێژیت ئەز ژخوە ناگرم ڤی كاری بكەم، ژبەركو دەرچوویێ زانینگەهێ یە، ئەڤە ژبلی بابەتێ عەشایری و ئەز ژبەر رەخ و دوورێن خوە شەرم دكەم یان ژخوە ناگرم، دێ بینی ھزار دینارەك د بەریكێدا نینە، لێ یێ بەرهەڤ نینە كارەكێ بكەت ژیانا خوە و پێدڤیێن خوە یێن ژیانێ پێ پەیدا بكەت.
یا من دڤێت بێژم، ئەڤ نەزانینا مللەتێ مە و خەلكێ مە دناڤدا دەرباز دبیت، ئەگەرێ سەرەكییێ پاشڤەمانا مەیە و دەردە سەریێن مەیە، ئەگەر مە بڤێت ئەم خوە ژڤان دەردەسەرییان رزگار بكەین، دڤێت شیانێن خوە زێدەبكەین و بەرسینگا نەزانینێ بگرین.
