نەوزاد ئامێدی
ژبەركو جڤاكێ مە پێدڤی ب بابەتێن ھزری و ھشیاركرنێ و پێگەهاندنێ یە و ئەگەر ب ئازادانە و ب وێرەكانە بابەت نەهێنە گەنگەشەكرن، دێ چاوان تاك شێت مفای ژ دیتنێن جودا وەرگریت؟
لڤێ دووماھیێ، لڤینەكا رەوشەنبیری یا بەرچاڤ یا كەفتییە دەڤەرا دهۆكێ، ئەڤ لڤینە ژی دبابەتێن چاپ و بلاڤكرنێ و سمینار و چالاكیێن ئەدەبی و ھونەری ب گشتییدا دهێتە دیتنێ. بێگومان ئەڤە كارەكێ باشە، بەلكو كارەكێ پیرۆزە ژی و یا گرنگ نینە كی پشتەڤانیێ لڤان چالاكی و بزاڤان دكەت، یا گرنگ بەردەوامی بۆ هەبیت و لێ دگەل ڤێ ژیدا، بەردەوامییا ڤان بزاڤان، هندەك ئاستەنگ یان بەربەست پەیدا دبن، ژ سەنگا ڤان بزاڤان كێم دكەن و بەرۆڤاژی رەنگە ب خرابی ژی بزڤرن و ئەز دێ وەك نموونە بەحسا هندەك خالان كەم:
ژبەركو ئەم ل دەرڤەی وەلاتینە و برێكا سوشیالێ و راگەهاندنێ مە ئاگەھی ژڤان چالاكییان دبیت، بوویە ئەز دێ بەحسا ئێك ژ وان بەرنامەیان كەم و وەك نموونە بەرنامێ (تەڤن) بۆ بابەتێ خوە وەرگرم. دەما ئەم دبێژین بەرنامەكێ زانستی و ھزری، ئانكو دڤێت ھیچ سانسۆرەك و ڤەشارتنەك دگەل بەرنامەی نەبیت، خوە دۆر ئێخستن ژهندەك پرسان یان نخافتنا وان، بدیتنا من كارەساتە و نابیت ھیچ فشارەك ل سەر پێشكێشكاری یان مێھڤانێن وی هەبیت و دڤێت ب ئازادانە بابەت بهێنە گوتوبێژكرن، چ ئەو بابەت ئاینی بن یان سیاسی یان جڤاكی بن. ژبەركو جڤاكێ مە پێدڤی ب بابەتێن ھزری و ھشیاركرنێ و پێگەهاندنێ یە و ئەگەر ب ئازادانە و ب وێرەكانە بابەت نەهێنە گەنگەشەكرن، دێ چاوان تاك شێت مفای ژ دیتنێن جودا وەرگریت؟ دڤێت پرسێن بەرنامەی كویرتر و د راستەوخۆ بن، دا مفا ژێ بهێتە وەرگرتنێ و نە بنە ئامرازەك بۆ نڤستنەكا درێژتر و مانا وی تاكی د تاریێ دا.
خالەكا دی، ھیڤیا من ژلایەنێن پەیوەندیدار ئەوە، پیتەكێ زێدەتر بدەنە سەر بلاڤۆك و بەرنامێن ھزری و زانستی، ئانكو ب شێوەیەك دی دەرفەتێ نەدەنە هەر كەسەكێ بڤێت و پارە هەبیت ڤی كاری ئەنجامبدەت، تایبەت دبابەتێن ئەكادیمیدا، دڤێت ئازادیا رادەربرینێ بۆ ماموستا و رەوشەنبیران یا پاراستی بیت و نابیت بكەڤنە بەردەڤێ هەر كەسەكێ بڤێت وان بشكێینت و ژبیرنەكەین، دا كەس نەبێژیت تو خودانێ ڤێ گوتارێ بخوە دژی ئازادییا رادەربرینێی، دەمێ تو دبێژی دەرفەتێ نەدەنە هەر كەسەكی! یا ئەز دبێژم هەمیان وەك ئێك مافێ دەربرینێ هەبیت و لێ كەس نەكەڤیتە بن گەفان سەرا وان دیتن و دەربرینان و دێ بێژم ئەڤە نەبەس یاسایە، بەلكو ئەڤە گوپیتكا دیموكراسیەتێ یە، ژبەركو تێكدانا راستیێ یان دورخستنا رەوشەنبیری یان ھزرمەندی ژ دیاركرنا راستییان، مەبەست ژێ هەرفاندنا خەلكییە و تێكدانا جڤاكییە و ئەڤێن ژڤی رەنگی دبنە ئەگەرێ كوشتنا كەسێن ئەكادیمی و دڤێت بزانین ئەون یێن وەلاتی ئاڤادكەن و پێش دئێخن.
