سیامەند هاریكی
تێکهەلکرنا گەلەک مژاران د یەک مژارا تایبەت دا، ئەوا مێهڤان بۆ ئینای، ئەوی دەمی بێزاری و تەڤلهەڤیەک د بەرنامەی دا خویادبیت، بینەر و خاندەڤان ژی ژێ دڕەڤن و چ مفای ژێ نابینن
چەمک و تێگەهێن رێزگرتنێ بۆچی هەتا نۆکە د مێدیایێن کۆردی دا بگشتی ناهێنە بکارئینان؟ دیارە میدیاکارێن مە وەسا دزانن، ئەڤ پەیڤ، چەمک و تێگەهە د زمانێ مە دا نینە، یان مە هزر تێدا نەکریە، ب بەرنامە نزیکی ئەڤێ پڕسێ نەبووینە؟!. دەولەمەندیا زمانێ کۆردی دڤی بیاڤی دا، چ جۆدایی لگەل زمانێن ئەڵمانی و رووسی نینە، بتایبەتی ئەگەر مرۆڤ هەردوو زاراڤێن سەرەکیێن زمانێ کۆردی، کو (سۆرانی و کرمانجی)نە باش بزانیت.
دەمێ چاڤپێکەفتنێن رۆژنامەڤانی د تەلەفزیۆن و رۆژنامەیێن کوردی دا دبینم و دخوینم، ئەز هەست ب بێزاری و شەرمزاریەکێ دکەم، دەمێ دبینم: رۆنامەڤانی چ ژن یان مێر، مێهڤانەکێ ئینای دکتۆرە، پڕۆفیسۆرە، دانعەمرەکە، یان هەر چ پلە و پایەکا هەبتن، گرنگ ئەوە ((مێهڤانە))، بلا نزیکترین کەسێ تە بیت، گەلەک گرنگە ب ئەتیکێتێن رۆنامەڤانیێ دانوستاندن و سەرەدەری لگەل بهێتە کرن.
بۆ نموونە دەمێ ژێ دپڕسیت: پەیڤا ((تۆ )) بۆ بکار دئینیت، هەر وەکو ل کۆلانەکێ لگەل هەڤاڵەکێ یان ژی هەڤالەکا خوە دئاخڤیت.
ب نێڕینا من: ئەم زۆر بسناهی دکارین زمانەکێ بلندێ رێزگرتنێ بڤی شێوێ خارێ بکاربینین.
*جها پەیڤا (تۆ) ، پەیڤا هۆن، یان ئێوە بکاربینین، واتە ئەڤ دوو پەیڤە بۆ (کو و رێزگرتنێ) هەردوویان وەکو پەیڤا ( Sie، ڤی ) د زمانێ رووسی و ئەلمانی دا، کو هەم بۆ ( مێ، کو و رێزگرتنێ ) بۆ هەموویان بکاردهێن، ئەم ژی د زمانێ کۆردی دا بکاربینین. یان پەیڤا: هێژا، بەڕێز، رێزدار ، ئەڤان پەیڤان ژی بێی کێشە دکارین بۆ ئەستێتیک/ جوانی و رێزگرتنێ دکارین بکاربینین.
*بۆ زاڕکان یان لگەل زاڕۆکان هیچ کێشە نینە، زمانەکێ سادە و هەتا کۆلانکی ژی مرۆڤ بکاربینیت، چونکو پتر بالکشاندن و شێوازێ گەهاندنا رامانێ رۆلی دبینیت لگەل زاڕۆکان، بۆ ئەوان شێواز و خەملەکا تایبەتی دڤێت.
*پێشکێشکار و بێژەرێن کۆرد بگشتی، رەگەزێ مێ بتایبەتی گەلەک جاران پتر ژ مێهڤانان دئاخڤن، ئەڤە ژی کارەساتە، چونکو تشتێ نوی و گرنگ خەلک ژ مێهڤانی چاڤەڕێدکەن، پێشکێشکار و بێژەر دکارن پتر هزر لسەر ناڤەڕۆکا پڕسێن خوە بکەن، چەند هەموو ئالیێن مژارێ ب هویری و کویری بخوەڤەدگرن و داگرتینە.
*ژ مژارێ دەرکەفتن، یان تێکهەلکرنا گەلەک مژاران د یەک مژارا تایبەت دا، ئەوا مێهڤان بۆ ئینای، ئەوی دەمی بێزاری و تەڤلهەڤیەک د بەرنامەی دا خویادبیت، بینەر و خاندەڤان ژی ژێ دڕەڤن و چ مفای ژێ نابینن.
