دیدار: مهاباد
ناڤێ وی (ئەنوەر دێریشكی)یە و ئامیرێ سازێ دژەنیت. د ئەنفالێن رەشێن سالا 1982ێ وەكی سەدان كوردان بەرەڤ سنورێ وەلاتێ توركیا كۆچدبن و دناڤ كەمپا مێردینێدا بیر ل دامەزراندنا تیپەكا ھونەری دكەت و چەندین چالاكیێن ھونەری ئەنجاممدەن. ل سالا 1989ێ و ب هەلكەفتا جەژنا نەوروزێ، ئاهەنگەكێ سازدكەن و خەلكێ كەمپێ هەمیێ ل وێ ئاهەنگێ ئامادە دبن و ژوان سترانێن دڤێ ئاهەنگێدا هاتینە گوتن وەك بەرسڤەك بۆ رژێما بەعسا وی دەمی، سترانا (ئەم نەشكەستینە و ناشكێین). دڤێ دیدارێدا دێ هەولدەین هندەكێ ژ چالاكیێن وی یێن ھونەری یێن وی سەردەمی بینینە زمان.
كوردستانی نوێی بادینان: ئەگەر بەحسا ژیانا خوە دگەل سازێ بكەی؟
ئەنوەر دێریشكی: ئەز ئەنوەر یاسینم، خەلكێ دێریشكا ناڤ بەرواریا مە و ل سالا 1971ێ ل باژێرێ مووسل هاتیمە سەردنیایێ. د تەمەنێ 10 سالیێدا ل سەر دەستێ هەر ئێك ژ (لیون ئیسحاق دێریشكی، كازم سەعید دێریشكی، بژار محەمەد بێدوهی) ئەز فێری ژەنینا سازێ بوویمە و تا سالا 1982 و دەما ئەنفالێن رەش ب سەر گەلێ كورددا هاتین، ئەم وەكی سەدان كوردێن دی مە شییا خوە بگەھیینە سنورێ دەولەتا توركیا و ئەم ل كەمپان دابەشكرین و ئەم برینە كەمپا مێردینێ و لوێرێ ژی من برێكا برادەرەكی، بۆ خوە داخوازا بزقەكێ كر و بۆ من ژ بازاری پەیدا كر و دگەل ژەنینا سازێ و ئاوازێن خەمگین و یێن شورەشگێری، بۆ ئەڤێن كەس و كارێن وان ب بەر ئەنفالان كەفتین، مال و حال بۆ نەماین و ژبیرنەكەین ل ناڤ كەمپێ ژی ژیانا خەلكی یا نەخوش بوو، كێمترین پێدڤیێن ژیانێ تێدا نەبوون و دا كو خەلك بشێت خوە ل سەر پێن خوە بگریت، سازا من ببوو هەناسەیەك بۆ خەلكێ كەمپێ هەمیێ.
كوردستانی نوێی بادینان: چ ئەگەر بوون تو بیر ل دروستكرنا تیپەكا ھونەری بكەی؟
ئەنوەر دێریشكی: دەما ساز گەھشتیە ناڤ دەستێن من، من سازا خوە كرە دكۆشا خوەدا و من پشتا خوە ئێخستە ستینكا چادرێ و من دەست ب ژەنینا وێ كر، دگەل وێ ژەنینێ من هەست ب بێهنا ئازادیێ كر، جیرانەكێ مە بناڤێ (محەمەد مەسیحا) ب دەنگەكێ بلند گوت تە دڤێت ب وێ سازێ زارۆكێن مە كافر بكەی؟ من گوتێ: خالێ محەمەد بڤێ سازێ ئەم دێ دەنگێ شورەشێ شارینین و ل وێرێ ھزرەك بۆ من هات، بوچی ئەم كارەكێ ھونەری نەكەین و من خوە گەهاندە چەند كەسێن سەرپەرشتییا كەمپێ دكر و ئەو بوونە هاریكار مە (تیپا شورەش) دامەزراند و ئێكەم كەسێ دناڤ تیپێدا بوویە ئەندام خالد سەرئاڤكی بوو و پاشی هەڤالێن دی هاتن و دناڤ تیپا مەدا شەش كچ ژی هەبوون و ژوانا رۆندك بوو كچا شەھید خسرۆ بامەرنی و وێ سترانەكا مەلا عەلی شرتی یا بناڤێ (كچا كورد بندەستم) گوت و دناڤ تیپێدا زارۆك ژی هەبوون.
كوردستانی نوێی بادینان: چالاكیێن وە یێن ھونەری دناڤ تیپێدا چبوون؟
ئەنوەر دێریشكی: بهاریكاریا ڤان هەڤالان تیپ پێشئێخست و مە خولەكا ھونەرێ فێربوونا سازێ بۆ 30 كەسان ڤەكر و چەند ژوان شیان سازێ بژەنن، وەك (نیهاد موستەفا بامەرنی و سالم تاھر مایی و عەدنا ئەلكیشكی) و تشتێ جهێ دلخۆشیێ، ئەو بوونە سازڤانێن زیرەك ژی. هەر ل سالا 1989ێ ئەم شییاین ئاهەنگەكا مەزن ب هەلكەفتا جەژنا نەوروزێ رێكبێخین و چ مرۆڤ دكەمپێدا نەمان و هەمی هاتنە ناڤ ئاهەنگا مە، پشتی سرۆدا ئەی رەقیب و مە سترانا (ئەم نەشكستینە و ناشكێین) یا ھوزانڤان فەیسەل موستەفای گوت و پشتی ڤێ چالاكیێ و ئەم بووینە گەلەك ئەندام، ئێدی تیپا هەلەبچە ژی هاتە دروست بوو و ئەم ل سەر چالاكیێن خوە د بەردەوام بووین تا سەرھلدانا سالا 1992 و كوچا ملیونی و پشتی ھینگێ ئەم ڤەگەریاینە زێدێ باب و باپیرێن خوە. ل كوردستانا ئازاد ژی مە دەست ژ تیپا خوە بەرنەدان و مە مولەت ژ وەزارەتا رەوشەنبیری یا حكومەتا هەرێما كوردستانێ وەرگرت و چالاكیێن مە هەر د بەردەوام بوون، تا هاتنا داعشا تیرۆری ل سالا 2014ێ و دروستبوونا قەیرانێن ئابووری.
