ئا: كوردستانی نوێی بادینان
نڤیسینگەها جڤاتا روحانی یا بلند یا ئێزدیان لدۆر نەختێ كچا ئێزدی كۆمبوونەكا تایبەت ئەنجامددەن و بریارێ ددەن، داخوازكرنا نەختێ كچا ئێزدی ژ (40) گرامێن زێری دەرباز نەبیت. هاولاتییەكێ ئێزدی ژی پەسنا ڤێ بریارێ دكەت و دبێژت: «بریارەكا گەلەك دجهێ خوەدایە و یا گونجایە دگەل بارێ ئابووری یێ نوكە». ناسر حەسەن زێدەتر گوت: «بەری نوكە داخوازیێن كچا ئێزدی 75 گرامێن زێری بوون و وەك ئەم دزانین بهایێ گراما سەد ھزار دینار دەربازكرینە و دبوو بارگرانیەك بۆ مالا بابێ زاڤای». نڤیسەرەكێ ئێزدی ژی، لدوور ڤێ بریارێ دبێژیت: «ب دیتنا من بڕیارا جڤاتا رۆحانی یا ئێزدییان بڕیارەکا د جهێ خودا یە، دێ بتە جۆرە بارسڤکییەک بۆ کوڕێن کو بڤێن خێزانێ پێک بینن، ب تایبەت د ڤی وەختیدا». ساكار كامل زێدەتر گوت: «نەختێ گران، رەنگە ئێک ژ ئەگەرێن نەپێکئینانا خێزانێ بت و ئێزدییێن ل عیراقێ و کوردستانێ دێ رێزێ ل ئەوێ بڕیارێ گرن، ژبەر كو ئەو د جوگرافییەکا بچووکدا نە، لێ یێن دەرڤەیی وەلاتی رەنگە جێبەجێ نەکەن ژ بەر کۆنتڕۆل ل سەر ناهێتەکرن و د بەربەلاڤن د گەلەک وەلاتێن جیهانێدا». وەك دهێتە زانین، بەری نۆكە وەرگرتنا نەختێ كچان (75) گرامێن زێری بوونە و لدویڤ ئامارێن هاتینە راگەهاندن، ل سالا (2022 تا 2024) رێژا ئەنجامدانا پرۆسا هەڤژینییێ دناڤ گەنجێن ئێزدیدا زێدەبوویە و هەر سالەكێ زێدەتر ژ (3000) گرێبەست ژ لایێ جڤاتا روحانیڤە هاتینە ئەنجامدان و دگەل ئەرزانكرنا نەختی، پێشبینی دهێتەكرنێ ئەڤ رێژەیە هێشتا زێدەتر لێبهێت.
