راپۆرت: ئاڤدۆ
ئامارێن دەست ب سەرداگرتنا ماددێن ھشبەر د زێدەبوونێ دایە و بەردەوام كەسێن بازرگانییێ بڤان ماددان دكەن، دهێنە دەستەسەركرن و دهێنە دادگەھكرن و دگەھنە سزایێ خوە. یا دمینیت ئەڤ كەسێن بهەر رێكەكێ تۆش بووین، چاوان سەرەدەری دگەلدا دهێتەكرنێ، كو دوبارە ئەڤ كەسێن ئالۆدەبووی ببنە كەسێن ئاسایی و ڤەگەرنە ناڤ جڤاكی و ژیانا خوە یا ئاسایی ڤە؟
ئێك ژ رزگاربوویێن ماددێن ھشبەر، برێكا (كوردستانێ نوێی بادینان) داخوازێ ژ دەزگەهێن ئەمنی یێن كوردستانێ دكەت و دبێژیت: «ئالوودەبوونا ب (ماددێن ھشبەر)، نەخوشیەکا دومدرێژ یا مێشکی و جەستەیێ یە و دەمێ کەسێ ئالوودەبوویی رزگار دبیت و هاتە سەلماندن کو دەروون و جەستەیێ وی ژ ڤێ ژەهرێ پاڤر بوویە، زور گرنگە دەمێ دەرفەتێن کاری دهێنە پێش، رێگری ل ڤان جورە کەسا نەهێتەکرن». (دلگەش شوكری نێروەی)، زێدەتر گوت: «دڤێت پالپشتی و پشتەڤانی و هاندانا كەسێن رزگاربووی بهێتە كرنێ و تایبەتی ژی دەزگەهێن ئەمنی، ژبەركو ئەو كەس بۆینە قوربانی و یێن د قوناغەكا نەخۆشدا دەرباز بووین و یێن ژ مرنێ ڤەرەسیایین، نابیت ب كەسێن خودان رابردوو (سەوابق) بهێنە ل قەلەمدان و كەس سەرەدەریێ دگەلدا نەكەت و كار پێنەهێتەدان و ئەز ڤێ چەندێ دروست نابینم». دلگەشی زێدەتر گوت: «ئەگەر تاوانبارەك هەبیت بازرگانێن ڤی ماددەینە و دڤێت ئەو ب دژوارترین سزا بهێنە دادگەھكرن و ئەو نە وەكی وان كەسانن یێن ئالودەبووین، ژبەركو ئەو بخوە یێن ژ خوە بێھیڤی بووین و ئەگەر مە دەلیڤێن كاری و تێكەلیێ ژی ل بەر گرتن، رەنگە ئەو كەسە ژ ژیانا خوە بێزار بیت و دوبارە بەرەڤ بكارئینانێ ڤە بچیت و برێكا وی چەندین كەسێن دی ژی فێر ببن و كارێن خرابتر و نە یاسایی ژی بەرەڤ زێدەبوون بچن و ژبیرنەكەین ژی، بێكاری ئەگەرەكێ دەردەكێ ترسناكە و ئێك ژ ئەگەرێن ئالودەبوونێ یە.
لدویڤ ئامارێن ل دەزگەهێن راگەهاندنێ ژی هاتینە بلاڤكرن، بۆ سالا 2014ێ ل پارێزگەها دھوكێ400 دادگەھكری و 200 راگرتی هەنە و هەر لدویڤ وان ئاماران، رێژا دەستەسەركریێن بازرگانییێ بڤی ماددەی دكەن 60 % ێیە بەرامبەر 40 % یا بەكارهێنەران.
