مهاباد تاجەددین عیسا
گرنگیا هەر هیڤیەکێ بزاڤە، بێگومان ئەو کارێن تو دکەی بێ دەستکەفت نینن و ئەو دەستکەفتە دێ کەڤنە دخزمەتا مرۆڤایەتیێدا
د کومەلگەها مرۆڤایەتیێدا، هژمارەکا زێدە یا کەسان بووینە قارەمان و دەستکەفتێن زێرین ب دەست ئێخستینە، ئەڤجا ئەو دەستکەفتە د بەرژەوەندییا تاکی بخو دابیت یان ژی بۆ کومەلگەهێ هەموویێ بیت و ئەو دەستکەفتە هەتا نها ژی کومەلگەهێن مرۆڤایەتییێ مفای ژێ وەردگرن. بوچی تو ژی نەبییە ئێک ژ وان کەسان؟ کو تو و کومەلگەها تە و هەروەسا کومەلگەهێن مرۆڤایەتیێ ب گشتی مفای ژ کریارێن تە وەبگرن؟ بلا ئەو کارە چەند یێ بچیک ژی بیت، لێ یا گرنگ ئەوە تو هەر یێ بهیڤی بی و بەردەوام بزاڤان بۆ پێشکەفتنێ بکەی. گرنگیا هەر هیڤیەکێ بزاڤە، بێگومان ئەو کارێن تو دکەی بێ دەستکەفت نینن و ئەو دەستکەفتە دێ کەڤنە دخزمەتا مرۆڤایەتیێدا.
یا پێدڤیە ئەم هەمی هەول بدەین، بکارێن خویێن بەردەوام جڤاکەکێ دروست ئاڤا بکەین و مفای بگەهینینە جڤاکێ خوە و هەروەسا مرۆڤایەتیێ هەموویێ. سەرەرای ڤێ چەندێ، نابیت بێ کار بمینین و هەر خەونان ببینین، بەلکو دڤێت ئەو خەون ببنە کار و کار پێ بهێتەکرن. بێگومان هەر کەسەکی خەونەک یا هەی و دڤێت وێ خەونێ بجهبینیت، لێ ئەگەر ئەو خەون بدەست نەکەڤیت، دڤێت دەملدەست هەموو خەونێن خو دئاڤێدا بەرنەدەت، بەلکو دڤێت هەردەم بزاڤ بۆ باشترکرن و چالاککرنا خەونێن خو هەبن و وان خەونان بکەتە راستی.
ب هیڤی بوون ژ کارێن گرنگە، چونکە ئەگەر بێ هیڤی ماین، ڤێ ژیانێ چ واتایێن راستی بۆ نامینن، بۆ نمونە: کەسەکی زانکۆ یا تەمامکری و دامەزراندن نینە و خەونا وی یا هەرە مەزن ئەو بوو ببیتە ماموستایەکێ ژێهاتی یان دبیاڤێ نڤیسینێدا کار بکەت و ببیتە نڤیسکارەکێ زیرەک. دڤی دەمیدا، دامەزراندن یا کێمە و دبیت نەبیت ژی، ئەو کەس دڤێت هەر یێ بەردەوام بیت و چەندین کاران ئەنجام بدەت و بێکار نەمینیت. دڤێت حەزا خو یا نڤیسینێ بدەتە کاری و کارێ نڤیسینێ بکەت و بزاڤێ بکەت بهەر رێیەکا بیت خو پێشبێخیت. هەروەسا کەرتێ تایبەت ژی تا راددەکێ باش یێ پێشکەفتییە و بمفا وەرگرتن ژ کاودانێن دەوروبەران و جڤاکێ خو، دشێن بڤێ رێکێ بگەهیننە هیڤیێن خو. یا ژ هەموویێ گرنگتر، بزاڤ و کارکرنە و ئەو کار خو چەند یێ بچووک ژی بیت، خو ئەگەر دلۆپەک ژ دەریایەکا مەزن بیت، یا گرنگ ئەوە مە ڤالاهیەک یا تژی کری و ب تژیکرنا ڤێ ڤالاهیێ مفای بگەهینن و بڤێ رێکێ ببینە گولەکا گەش دناڤ باخچێ گولێن بێهنخوش و بێهنا خوش بگەهینن دەوروبەرێن خو.
