دیڤچوون: شەڤین
د سوشیال مێدیادا، دەھان پوست و بابەت دكەڤنە بەرچاڤ، ھندەك پشتەڤانییێ ل نەهێلانا سەیێن بەرەڵڵا دكەن و دوور ئێخستنا وان ژ ناڤ باژێری ب پێتڤیا دزانن و د بەرامبەردا ھندەكێن دی دبێژن دڤێت رێگە چارەیێن دی هەبن و دڤێ راپۆرتێ دا، دێ ھندەك ژوان پوستان بەرچاڤ دانین:
(لاوین سلێڤانەیی)، دبێژیت: «ئەگەر سە بهێنە کوشتنێ، بەلانسا ژینگەهێ دی هێتەگوهارتن و زەرەر و زیان ژ لایێ کشتوکالی ڤە دێ هەبن. ئەگەر سە لناڤ باژێری زێدەبن، دی زیان ل خەلکی و ئارامییا وی بت و پێدڤییە ئەڤ سە بهێن خەساندن (تلقیح)کرن و بهێن هنارتن بۆ دەرڤەی باژێری و نابیت بهێنەکوشتنێ، دا خەلک و سە هەر دوو د پاراستی بن». ئومێد سەگڤان دبێژیت: «قەتلکرنا سەیان، نە ژبەر زیان و تێکدانا ژینگەها باژێری یە. حەقیقەتا سایدیزما جڤاکی و تۆندرەوییا وی دیار دکت. کوشتن دوماهی چارەسەرییە، دەما هیچ چارەسەریەک نەبت. د دەمەکێدا چ هەوڵێن وەسا نەهاتینەدان چارسەریا ئەڤان سەگان بهێن کرن. حەلالکرنا قەتلێ سەگان ب دیتنا من، گوتارەکا دەستپێکێ یە بۆ تۆندرەوییا جڤاکی و نە ئێکدو قەبیلکرنێ. فەتوایا زانایێن ئاینی د ئەڤی بابەتیدا وەکی تاقیکرنەکێ ل بەر چاڤێن من دهێت دیتن، کو دێ د رۆژێن داهاتیدا ل سەر مرۆڤان ژی هێت تەجریبەکرن و ئەڤە ژی لێدانا زەنگا مەترسیێ یە.
ژ نفشێ خوە یاخی بوون
ژ بیر نەکن، سەگ تاکە گیانەوەر بوون، کێر مرۆڤایەتیێ هاتین و ژ نفشێ خوە یاخی بوون، ملێ خوە دان ب ملێ مرۆڤان». ئیبراھیم دێرگژنیكی دبێژیت: «سەبارەت کێشا سەیێن بەرەلا.. جەوهەرێ بابەتی یێ هاتیە ژبیرکرن، دڤێت بزڤرنە ئەسلێ ئاریشێ، کو هەبوونا سەیێن بەرەلا و مەترسیا وان ل سەر مرۆڤان د جڤاکیدا، چ زارۆک یان مەزن، ئاریشە ب لێدوانا و فەتوا و داخویانی و کونگرێن رۆژنامەڤانی چارە نابیت، دڤیا ئالیێن بەرپرس کوم ببن ول چارەیان بگەرن، ب دانوستاندن و داتا و پاشی داخواز ژ حکومەتێ و جهێن بەرپرس بهێتەکرن ئەوا پێدڤی ژ بودجە و تشتێ پێدڤی دابین بکەن و هەمی بژاردە دگەل لایەنێن ئەرێنی و نەرێنی بهێنە بەرچاڤکرن و بگەهنە بریارەکێ».
کێ بەرسڤا جیرانێ مە ددەت؟
كاوین جیهاد تەحلاڤی، دبێژیت: «ژدل ئەڤە پرسیارا جیرانەکێ منە بۆ هندەک کەس و ئالیان، د گەنگەشا مەدا لسەر کۆشتن، ب خودانکرن و نەرازیکرن و رازیبوون و بریارا ل سەر کۆشتنا سەیێن بەرەللا بوو. جامێری گەلەکێ مجد بۆ و گۆت: ئەرێ جهەک هەیە ئەز ژ دل سکالەیێ لسەر وان کەسان تۆماربکەم، ئەڤێن دبنە رێگر بۆ نەمانا ڤان سەیێن بەرەلا ل دهۆکێ، چنکۆ جامێری دگۆت زارۆکێن من تووشی هێرش و بریندارییا ڤان سا بووینە و من دڤێت سکالەیێ ل وان بکەم، ئەڤێن دبێژن نە، بلا لسەر جاددەیا بن و د ئازاد بن، کی هەیە بەرسڤا جیرانێ من بدەت؟».
نەچاری و شەرمزارییە
حسێن تاھا ھرۆری دبێژیت: ل بەراهییێ دبێژم، کوشتنا سەیان نەچارەیە، شەرمزاری یە! و ئەز ڤێ دبێژم، نەکو ئەوە هندی حەز ژ سەیان دکم، لێ وژدانا من قەبوولناکت و نەشێم هەمبەری کارەکێ هندە کرێت و خراب بێدەنگ بمینم. ئەرێ باشە کارێ پەرلەمانی چ یە؟ بۆچی یە مە پەرلەمان هەی، هەکو بریار و قانوون هەر نەهێن دان؟ کانێ رێکخراوێن مافێ گیانەوەران دپارێزن، کانێ رێکخراوێن ژینگەهێ دپارێزن؟ بۆچی دبێ دەنگن؟ ئەو پارێ بۆ رێکخراوێن وە دهێت خەرجکرن، هوون چ لێ دکن؟ ئەو رێکخراو بۆ چ نە، هەکو هوون نەشێن بەرەنگاری رەفتارەکا هندە کرێت ببن؟ ڤی سەردەمی دەولەت ب حەلال و حەرامکرنا تشتی ناهێن بڕێڤەبرن، دەولەت ب جوداکرنا باشی و خرابییێ دهێن بڕێڤەبرن. کوشتنا سەیان گونەهە و کارەکێ دوورە ژ شارستانیەتێ و ب هیچ رەنگی د گەل ڤی سەردەمی ناگونجت.». رێدیر عەبدوللا، دبێژیت: « دیر ژ بابەتێ دینی و هەروەسا کا کی دگەل کۆشتنا گیانەوەرایە یان نە.. بەلکو تنێ مرۆڤ پیچەک مەژییێ خوە بدەتە شولی بەسە.. ئەڤە سەرێ سالەکە و دبیت پتر ژی خەلک ب گشتی و هەر تاکەک ژلایێ خوەڤە ب جوانی و دلۆڤانی یێ گازندا ژ هەبوونا سەیێن بەرەڵا دکەن و داخوازێ ژ لایەنێن پەیوەندار دکەن، چارەیەکێ ل ڤان سەیان بکەن و جهەکێ باشتر و ژینگەهەکا باشتر بۆ وان دابین بکەن و هەر تشتێ پێدڤی بۆ بهێتەکرن. ژبەرکو د ناڤ تاخ و کۆلانێن باژێران دا ب هەمی قەزا و ناحییێن خوەڤە یێن زێدەبووین و ب شێوەیەکێ راستەوخۆ یێن بووینە جهێ مەترسییێ ل سەر ژیانا وان و زاڕۆکێن وان، هەتا کو د ناڤ حەرەمێ زانکۆیێ کو جهێ هەرێ بلند یێ سەقافەتێ یە، هێرشی قوتابییەکا کچ کری.. و گەلەک روودانێت دی.. هەمی خەلک یێ پێ ئاگەهە.. لێ چ تشتێ پێدڤی نەهاتەکرن، هەروەسان ئەڤ مرۆڤێن نوکە ب ناڤێ سەیان ژی دئاخڤن، کەسەک ژ وان یێ دیارنەبوو و کەسەکێ نەگۆتی ئەڤە ئەزێ حازرم بۆ هەر تشتەکێ پێدڤی..».
