دیدار: ھونەر
رۆمانا سۆفینامە یا نڤیسەر (كەوسەر شەوكەت) ژبن چاپێ دەركەفتییە و ئەڤە رۆمانا وێ یا چارێ یە دەردكەڤیت و وەك پەرتووك ئەڤ رۆمانە خوە داناڤ 360 لاپەرێن قەبارێ ناڤیندا دبینیت و بزانین بوچی كەسەر بەرەڤ مژارێن عرفانێ و ئیشراقێ ڤەچوویە، مە ئەڤ دانوستاندنە دگەل رێكخستییە.
* بەری بەحسا رۆمانا تە یا بناڤێ (سوفینامە) بكەین، تو د پوستەكێ خوەدا دبێژی: (ب دڕێژیا سەردەمان (خودێ، مرۆڤ و جیهان) ئەو سێ ستوونێن سەرەکینە، یێن زانست و فەلسەفە و ئاین بەردەوام ل دۆر دزڤرن و نێرینێن خۆ ل گۆرەی جوداهییا هزر و دەم و جهان دیار کرین و دیار دکەن و ب سەدان بیرۆکەیێن جودا داڕشتینە. لێ ئەڤ سێ ستوونە، بۆ عارفان قیبلەیا کەشف و موشاهەدێنە و هەر ئەڤەیە جوداهی)، پرسیارا مە ژی هەر لدوور ڤێ جوداھیێ یە، ئایا تە رۆمانا خوە دكیژ بەرەییدا نڤیسییە، بەرەیێ زانست و فەلسەفەیی و ئاینی یان ژی بەرەیێ عارفان؟
- بلا ل دەستپێکێ ئەز وی مافی و وێرەکییێ بدەمە خۆ و بێژم عرفان جودایە ژ سۆفیگەرییێ، هەلبەت ئەز ڤێ چەندێ دبێژم پشتی دوڤچوون و خواندن و لێگەریانا بەردەواما چەند سالان. رۆمانا من یا بناڤێ (سۆفینامە)، گرێدای عرفانێ یە، ئەوا عرفانێ جودا دکەت ئەوە کو ئەم پەیڤا (فەلسەفە) بۆ مەعریفا رۆژئاڤای بکاردئینن و بلند دکەین، هەلبەت دەمێ فەلسەفە ژ حیکمەتێ جودا بووی، هەم چارچووڤەبوو و هەم ژی دابەشبوو، لێ عرفان هەر حیکمەتە و نە جودابوویە و نەژی چارچووڤە بوویە.
* ئەگەر ئەم پرسیارەكا سادە بكەین، ئایا مە (عرفان) ل كوردستانێ هەبوویە یان نە؟
- عرفان حیکمەتا رۆژهەلاتییە. ب رەنگەکێ دیتر بێژم، مەعریفا رۆژهەلاتی ل دۆر پرسێن گرێدای بوونێ و خودێ و مانێ و مرنێ و ژیانێ و سروشتی و مرۆڤی و جیهانێ و پەیوەندیا هەر تشتی د گەل ئێکدا. هەلبەت هەگەر ئەم بچینە د ناڤ داستان و شعر و چیرۆک و پەندێن کوردی دا، دێ بەرسڤا وان پرسیاران بینین.
*دەما خواندەڤایەكێ بڤێت رۆمانا سۆفینامە بخوینیت، دێ چ تێدا بینیت؟ ئەگەر كورتیەكێ بەحس بكەی.
- دبیت هەر خواندەڤایەک تشتەکی بینیت، ل هەقیقەتێ بگەڕیت و پرسیاران ل دۆر نهێنیا رۆناهییێ بکەت و دگەل میراتگرێ ئیشراقێ بزاڤێ بکەت، دوبارە حیکمەتا رۆژهەلاتی کوم بکەت و جوداهییێ د ناڤبەرا جەوهەرێ دینی و سەرەدەریا دینداران بکەت. لێ یا گرنگ ئەوە، کو مرۆڤ ستوونا بوونێ یە و ئێکانە بوونەوەرە کو دناڤ ویدا روویێ دیار و نەدیارێ خالقی تێدا دکۆم، بۆ ڤێ ژی ل دەرڤەی مرۆڤی بەرسڤا چ پرسان ناهێتە دیتن.
*د کومەلگەهێ کوردیدا، چەندین تەریقەت هەنە و تێدا بابەتێن هەبوونگەرای روحانیەتێ دخوینن، تو چەند شیایە مفای ژێ وەربگری یان بکەیە ئێک ژ بابەتێن رۆمانا خوە.
- من مفا ژێ دیتییە، لێ نە ب وی لایی کو ببینم تێدا بابەتێن رۆحانی یان هەبوونگەرای بخووینم. بەلکی ب وی رەنگی کو تەریقەت یا پێگیرە ب کومەکا یاسا و رێسایان، ژ لێڤەگەرەكی دەردکەڤن بۆ مەرەمەکێ، ئانکو د تەریقەتێدا پێگیرە د چارچووڤەیەکێ دیارکریدا بزڤریت، دا ژ مەقامەکی بۆ ئێکێ دی دەرباز بیت، بۆ ڤێ ژی ئەز ب خۆ نەشێم وەسان تەئوویل بکەم کو تەریقەتەک شیابیت مرۆڤی بگەهینیتە بەرسڤا پرسیارا جەوهەری کو هەقیقەتە! من د پەنجەرەیەکا گرنگدا مفا ژڤێ چەندێ وەرگرت، کو هەر ئەڤەیە جوداهییا وێ د گەل عرفانێ، لێ پرسەکا دی خۆ زاڵ دکر، بۆچی دەستهەلاتان ئێک لدویف ئێکێ پشتەڤانیا تەریقەتان کریە و عرفان ب گەف و مەترسی ل سەر خۆ زانییە؟ ئەڤ مەترسییە بۆ یە سەدەم كو تەریقەت وەسان موکم جهێ خۆ بگریت، ئێدی عرفانێ ب حەلینیت و خەلک وەسان بزانن، كو عرفان و تەریقەت هەردو ئێکن!؟
