نەوزاد ئامێدی
ئەڤ مەتەلە من ژ هەڤالەکێ هوزانڤان گوهـ لێبوو و من پیچەک وەخت پێڤەبر، دا بشێم لێکدەم و شرۆڤەکەم و بزانم مانا وێ چییە و بەحسێ چ دکەت؟ لێ دەمێ من زانی، کەیفا من هات و سەرسام بووم ب گوتنێت کوردی و وان مانایێت کویر، ئەوێت دڤان مەتەلادا هەین.
بهەر حال، ئەڤێ مەتەلێ دوو پرسێت جودا د سەرێ مندا ئازراندن:
یا ئێکێ، زمانێ بچویکا بوو، ئەم کورد مللەتێ ئێکانەینە یان یێت گەلەک دکێمین، کو مە زمانەک تایبەت ب بچویکاڤە هەیە؟ دەمێ من ئەڤ پرسە بەری گەلەک ساڵا دگەل هندەک شارەزایێت نەرویجی گەنگەشەکری، بۆ وان پرسەک نووی بوو. هەرچەندە تشتەک باڵکێش بوو، لێ ئەو هەمی د رژد بوون لسەر هندێ، کو ئەڤ چەندە دێ کارتێکرنەکا خراپ لسەر بچویکی هێلیت. چۆنکە پێدڤییە هەکو مەزنتر لێدهێت، ئەو فێری زمانەکێ دی بیت و دێ کارتێکرنا زمانێ بچویکاتیێ مینیت، تا راددەکێ مەزن و ماوەیەکێ درێژ، بتایبەت لدەف خودان پێداویستیێت تایبەت، یان ئەو بچویکێت ئاست نزم ژلایێ مێشکیڤە.
ئەز نزانم کا شەرەزایێت مە یێت دەروونی و دکتور چ دبێژن لسەر ڤی بابەتی، لێ ئەز باوەرم پێتڤی ب دیڤچونێ هەیە.
خالا دووێ، بابەتێ مەتەلێت کوردی. هەر چەندە گەلەک کەس هەنە دڤی لایەنیدا کار کرینە و رابووینە ب کۆمکرنا مەتەلا. لێ ئەز باوەرم ئەڤ مەتەلە پێدڤی ب کارەک ئەکادیمی بەرفرەه هەنە. چۆنکە هەر مەتەلەک فەلسەفەک جودا و بەرفرەه بخۆڤە دگریت. وەکی ئەڤا مە ل سەری گوتی، چۆنکە بۆ من بەرامبەر گوتارەک هزار پەیڤی ییە و هەڤال و هوزانڤان شەمال دوسکی د كومێنتەكێدا ئەڤ مەتەلە ل سەر بابەتێ من ئینا، ئەوێ من تێدا بەحسا ترامپی و ئەمریکا و رۆژئاڤا کری. لڤێرە ئەمریکا هاتە بەراوردکرن دگەل پشیکێ و چاوا خەما پشێ هەر ژژە ئانکو گوشتە، خەما ترامپی و ئەمریکاژی هەر گازو و ئابوورەکێ باشترە.
