ھونەرمەند (بەشیر بوتانی) پارچە موزیكەك ب ناڤێ (سوریا نوی) بەرهەمئینایە و دەما مە ژێ پرسیار كری، بوچی سوریا نوی؟ گوت: «ژبەركو سوریا كەڤن چوو و ھیڤیێن مە كوردان ل رۆژئاڤا دگەل سوریا نوینە». سەبارەت ڤێ پارچە موزیكێ، چاوان ھاتیە درۆستكرن و ئاوازا وێ و چاوانیا توماركرنا وێ، بەشیر بوتانی گوت: «ئەڤ مۆزیكە ل كوردستانێ من چێكریە و من دابەشكرنا مۆزیكێ ژی ژبۆ دانایە و نوتە لڤێرە من نڤیسین و من شاندییە ئەمریكا ل تومارگەهێن وێرێ تومار بكەن و ئەڤ پارچە موزیكە ژ سێ ئاوازان پێكدهێت، دگەل ئاوازا ئێكێ، ئامیرێ ژەنینێ یێ بناڤێ (سیتار) دپرسیت و ئامیرێ (پیانۆ) بەرسڤێ ددەت و مللەت گوھداریا هەردووكان دكەت و سەمایێ دكەت و د ئاوازا دوێ دا، ئامیرێ سەكسفوونێ ژەنینێ دكەت و ئامیرێن دی یان كو مللەت بەرسڤێ ددەت و سەمایێ دكەت و د ئاوازا سیێ دا، بلوور دپرسیت و گیتارا كەھرەبایی بەرسڤێ ددەت و مللەت ل بەر سەمایێ دكەت». بوتانی ئەو چەندە ژی نەڤەشارت كو ئارەزوویا وی چێكرنا گوڤەند و سەمایانە و لدوور جوداھییا دناڤبەرا دیلانێ و گوڤەندێ دا، گوت: «رەنگە گەلەك جوداھیێ دناڤبەرا ڤان هەردوویاندا نەكەن، دگەل گوڤەندێ دەھول و زۆرنا، (ددك یان دودۆك) و ب سورانی دبێژنێ (بالەبان) و كەمانجە هەنە و دگەل دیلانێ بتنێ سترانێن دەنگی هەنە». بەشیر بۆتانی بەحسا ھندەك كارێن خوە د بوارێ موزیكێ و تایبەتی ژی موزیك بۆ تابلۆیێن ھونەری كر و گوت، من موزیك بۆ گەلەك تابلۆیێن كوردی دروستكرینە و نە بتنێ كوردی، بەلكو بۆ توركییێ و عەرەبیێ ژی.
