عەزیز یاوەر
ئەم سپێرانە كە هیچ لێكۆڵینەوەیەكی ورد دەربارەی ساڵ و مەبەستی دروستكردنیان نەكراوە، باس لە قوناغێكی هەستیارو گرنگ دەكات كە تێیدا حكومەتی ناوەند كاری رەگەزپەرستانە و ناڕەوا بەرامبەر دانیشتوانی خانەقی و دەوروبەری ئەنجام داوە، بۆیە دروستكردنیان زادەی بیركردنەوەیەكی رۆژو دوو رۆژ نین بەڵكو دەگەڕێتەوە بۆ مەبەستێكی نەتەوەیی ئانی و دوور مەودا دژ بە كورد و ئەو نەخشە رێگەیە كە بەكر سدقی خەونی پێوە دەبینی بۆ دامەزراندنی كوردوستانێكی سەربەخۆ و پاراستنی بە هێڵێكی بەرگری كۆنكرێتی لە زاخۆوە تاكو دەگاتە خواروی خانەقی بەڵام بە شێوەی بنكە بنكە نەك دیوار.
ئەوەی میژووی رووداوەكانی عیراق عەسكەریی و سیاسی بە وردی بخوینێتەوە بۆی دەردەكەوێت چۆن سەڵاحەددین سەباغ پاش تیرۆركردنی بەكر سدقی خۆی دەكاتە خاوەنی سپیرەكان و زەمینەی بۆ خوشدەكرێت و كەرەستەشی بۆ دابین دەكرێت لەپێناوی دروستكردنیان، بەڵام بۆ ئامانجێك پێچەوانە و دژ بە ئامانج و ئاواتەكانی بەكر سدقی
ناوی سپێرەكان كە ژمارەیان دەگاتە نزیكەی 80 دانە لە وشەی (SPIRE)ی ئینگلیزییەوە سەرچاوەی گرتووە كە بەواتای برج یان قەڵا دێت. بۆیە لەسەر بەرزاییەكانی دەوروبەری شار دروست كراون بە پێچەوانەی (ملجأ) كە لە نزمایی و پێچوپەنادا دروستدەكرێت. مەبەست لە دروستكردنی سپێرەكان كونترۆڵكردنی چەند هۆزیك لە شەریحەیەكی كوردی دیاریكراوی شارەكە بووە وەكو سەرەتایەك بۆ گوڕینی دیمۆگرافیی ناوچەكە بەگشتی.
هەڵسوكەوت و رفتارەكانی سەباغ دژ بە كوردی ناوچەی خانەقی دەگاتە ئاستێك جەلال بابان لە پەرلەمانی عیراق روو بە رووی ببێتەوەو بە توندی ئیدانەی بكات، سەباغیش لەو بارەیەوە وەكو لە لاپەری 23 بیرەوەریەكانیدا هاتووە وەڵامی دەداتەوە و دەڵیت: جگە لە عەشیرەتی عزە و كرویە چەند عەشیرەتێكی دیكەی عەرەب لە راستاییەكانی خانەقی تا پاش جەنگی یەکەمی جیهانی ژیاون، بەڵام كە ئاگری شۆڕشی بیستی عیراقییەكان هەڵگیرسا ئینگلیز دەستیكرد بە گواستنەوەیان و بە كوردی عەشیرەتەكانی سنجاوی ئێرانی شوێنەكانیان پڕدەكردەوە سەرەڕای ئەوەی هیچ پەیوەندییەكیان چ لەگەڵ عەرەب و چ لەگەڵ عیراق نەبووە، چونكە ئەجناسێكی جیاوازن و هیچ كارێكیان نەبووە جگە لە (تەهریب و تەجەسوس) و خزمەتكردنی بێگانە و ئینگلیز و گەیاندنی زیان بە عیراق و ئێرانی هاوسێ. ئەمانەن هێشتن حوكمەكانم بەسەریاندا بسەپێنم و رەگو ریشەیان دەربێنم... تۆش جەلال بابان هاوار دەكەی قەومەكان كورد چەوساوەدەكرێت و لە جێگای خۆیان دوور دەخرێنەوە تەنانەت بۆ دەرەوەی عێراقیش رەوانە دەكرێن)) بەڵام سباغ باس لە بەڵگە حاشا هەڵنەگرەكان ناكات كە پێچەوانەی ئیدعاتەكانیانە و بەرپەرچیان دەدەنەوە، گرنگتریانیش ئەو ناسنامانەن كە بە سەر سەرۆك هوزو عەشیرەتەكانی كوردی ناوچەكە سەپاندبوی و دەبوایە پیشانی دارو دەستەی سباغی بدەن تاكو چەند كاتژمێریك لە نیو بازاری شار بمێننەوە بۆ ئەنجامدانی كارەكانیان و كڕینی پێداویستییەكانیان و دروستكردنی سپێرەكان پاش تیروركردنی بەكر سدقی لە ئابی 1937 دەستپیدەكات و لە سالی 1940 كوتایی دێت .
