باڵیۆز د.محەمەد سابیر سەرۆکی دامەزراوەی سەرۆک جەلال تاڵەبانی، یاداشتنامەی لێکتێگەیشتنی لەگەڵ پ. د.ئومێد رەفیق سەرۆکی زانکۆی جیهان-سلێمانی ئیمزاکرد، ئەم لێکتێگەیشتنە ئەزموون و پڕکردنەوەی کەلێنەکان لەبوارە جیاوازەکاندا بۆ پێشکەشکردنی خزمەتگوزارییە پێویستییەکان و دابینکردنی ژینگەیەکی گونجاو بۆ خوێندکاران دەستەبەردەکات و دامەزراندن و بەهێزکردنی هەماهەنگیی لەنێوان دامەزراوەی سەرۆک جەلال تاڵەبانی و زانکۆی جیهان - سلێمانی لەبواری بەشداریکردن لە چالاکییەکان، هاوکاریی گەشەپێدان، ئاڵوگۆڕی زانیاری، ئەنجامدانی توێژینەوە و ئاشناکردنی زیرەکی دەستکرد دەبێت.
سەرۆکی دامەزراوەی سەرۆک جەلال تاڵەبانی وتی: ئامانج لەم یاداشتە پەرەپێدانی هاوبەشیی ستراتیجییە لەنێوان هەردوو لایەندا، هەروەها پ.د.ئومێد رەفیق باسی لەوەکرد: زانکۆی جیهان هەماهەنگ دەبێت لە پەرەپێدانی پرۆژە و چالاکییە هاوبەشەکان لەگەڵ دامەزراوەی سەرۆک جەلال تاڵەبانی دا.
