بێری غەریب رەحیم
بدرێژاهیا دیرۆکێ، ژنان رۆل و کاریگەریەكا بەرچاڤ درێڤەبرنا وی ئەرکێ ب وان هاتییە سپاردندا هەبوویە. ژن بەشەكێ گرنگ و كاریگەرن دناڤ جڤاكیدا و ب تایبەت دناڤ سیاسەتێ و حوكمرانیێدا. ئەگەر ل دیرۆکێ ژی ڤەگەرین، هەر ژ سەردەمێ میرنشینان بگرە، ژنان ب شێوازێن جوداجودا پێگەهەکێ خورت هەبوویە و ب ئاوایەکێ سەرکەفتیانە رۆلێ خۆ گێرایە و هەتا نها ژی، رۆلێ ژنان دبیاڤین جودادا دیار و بەرچاڤە.
ژبلی سەرکەفتنا ژنان د مەیدانا خەباتێدا، ئەو یەك ژی هاتیە سەلماندن، کو ژن دەستپاکترین کەسن د برێڤەبرنا ئەرکێن خودا. لەورا ئەگەر مە بڤێت دەولەتدارییەکا مودێرن و حەکیمانە و دادپەروەریانە درۆست بكەین، دڤێت دكابینەیا نوو یا حكومەتا هەرێما كوردستانێ دا، رۆلەكێ زێدەتر ب ژنان بهێتەدان و د سەرۆبەندێ نوكە یێ هەرێم تێدا دەرباز دبیت، باشترە ئەگەر ئەڤ رێژەیە بهێتە بلندكرن و ژنێن خودان شیان و خودان ئەزموون بهێنە پێش و دەما ئەم رولی ب ژنان ددەین و دەستهەلاتێ و بەرپرساتیێ دئێخینە بەر دەستێن وان، ئەم یێ گرەنتییتا رێڤەبرنەكا باشتر و مسوگەر فەراهەمدكەین و ژنان سەلماندییە، كو ئەو دڤێ چەندێدا د سەركەفتیینە و مە گەلەك نموونە ژی هەنە و ئەم دشێین نموونا خانم (هێرۆ ئیبراھیم ئەحمەد) بینین، كو هەڤژینا رەوانشاد سەرۆك مام جەلال بوو و تاكە ژن بوو ل سەر دەمێ شورەشا چەكداری دئێك دەمدا هەڤژین و دایك و رۆژنامەڤانەكا چالاك و خودان شیان ژی بوو و نە بتنێ دناڤا شورەشێ دا، بەلكو ل پشتی سەرھلدانێ ژی و دەما حوكمرانیا هەرێما كوردستانێ كەفتیە دەستێ كوردان، ئەو شییا دبیاڤێ رۆژنامەڤانی و كەلتوری و مافێن مرۆڤی و خزمەتكرنا زارۆكان ژیدا، رۆلێ خوە بگێریت و چەندین نموونێن دی یێن ژنێن زیرەك مە هەنە و نە بتنێ نوكە، بەلكو د مێژوویا كوردی ژیدا مە چەندین ژنان رۆلێ سەركردایەتیێ گێرایە، وەك (حەبسەخانا نەقیب، مەیان خاتوونێ... ھتد) و ئەگەر ئەم بەرێخوە بدەینە رۆژئاڤایێ كوردستانێ، كو ژنا كورد هەیبەت و ناڤ و دەنگییا خوە ل جیهانێ هەمیێ بلاڤكرییە و جیهان ب چاڤەكێ مەزن ل وان دنێریت و خەباتا وان یا چەكداری و بەرخودانێ دژی تیرۆرێ بلند دهێتە نرخاندن.
