لەزیزا جەلالەددین
ئەرێ بوچی شوینا ئەم دەمێ خوە یێ ڤالا ل سەر ئەنترنێتێ و ڤان توران دەرباز بكەین، بوچی ئەم مفای ژێ وەرناگرین و بوچی ئەم برێكا بسپوریێن خوە مفای ناگەھینین ژی؟!
سوشیال میدیا دەرگەهەكێ نوییێ خوە پێگەهاندنێ یە، دەرگەهەكێ بلاڤكرنا ئاگەھیانە و چ ئەو ئاگەھی بۆ ژیانا تاكەكی بتنێ یان گشتی دگرنگ بن چ ژی بۆ دەمبوراندنێ بن و چ بۆ پەرژوەندیێن كومەلایەتی بن و ئەز دێ بەحسا بابەتێن پێگەهاندنێ كەم، ئەم دشێین سوشیالێ بۆ خزمەتا ھشیاركرنێ و خوە ئاڤاكرنێ تەرخان بكەین، رەنگە بێژن چاوان؟ بەلێ ئەم دشێین و هەر كەسەك ژمە دبوارەكیدا شارەزایە، یێ هەی ماموستایێ زانكویێ یە و یێ هەیی نوژدارە و یێ هەی شارەزایێ كشتوكالییە و یێ هەی ھونەرمەندە و رەوشەنبیرە و یێ هەی بابە و یا هەی دیكە و ئەگەر هەر ئێك ژمە د بیاڤێ بسپورییا خوەدا سوشیالێ یان ھندەك ژ دەمێ خوە بۆ سوشیالێ تەرخان بكەت و وێ شارەزاییێ چ ب رەنگێ پویت بیت چ ب دەنگ بیت چ ژی ب ڤیدیوو، ئەرێ ھین دزانن ئەم دێ شێین چ تاك ئاڤاكەین یان پێگەھینین.
جارەكێ من و هەڤالەكا خوە ل سەر بابەتێن خوارنێ سوحبەت دكرن، هەڤالا من بەحسا جورەكێ خوارنێ كر و راستی ژی رێكێن ب ساناھی گوتن، دەما من پرسیار ژێ كرین تو ڤان كاران چاوان فێر بووی؟ گوت برێكا سوشیال میدیایێ و من گوتێ چاوان؟ گوت سوشیال میدیا و تورێن كومەلایەتی بتنێ ئەو نینن ئەم پەیوەندیێن دانوستاندنێ دگەل ئێك دروست بكەین و ھندەك وێنێن خوە بلاڤ بكەن و كانێ چ خوارن لێنایە و چووینە كیرێ گەشتێ، ژبەركو دەهان پەیچ و لاپەر یێن هەین تشتێن بمفا بلاڤدكەن و من بخوە گەلەك مفا یا ژێ دیتی. راستی ژی هەڤالا من دروست گوت و من بخو ژی گەلەك مفا ژێ دیتییە و ئەڤە پرسیارا من بوو برێكا ڤێ گوتارێ دەنگێ خو بگەھینم، ئەرێ بوچی شوینا ئەم دەمێ خوە یێ ڤالا ل سەر ئەنترنێتێ و ڤان توران دەرباز بكەین، بوچی ئەم مفای ژێ وەرناگرین و بوچی ئەم برێكا بسپوریێن خوە مفای ناگەھینین ژی؟!
