فەوزی بەهجەت عەبدوڵڵا
ئەگەر حكومەتێ شیانێن دابینكرنا مووچەیەكێ گرەنتیكری یێ هەیڤانە نەبیت و نەشێت خەلكی دامەزرینیت، دڤێت ل رێكێن پێگوھور بگەریت و هاولاتیێ خوە نەكەتە بەشەك ژ قەیرانان، بەلكو ل چارەسەریێن دی بگەریت.
ل كوردستانێ ترسا خەلكی یا بوویە بلاڤكرنا مووچەی، ئایا دێ ڤێ هەیڤێ مووچێ خو وەرگریت یان نە؟ ئەوژی ئەگەر حكومەتا عیراقێ بریار ل سەر ھنارتنا وێدا و بڤی شێوەی هەمی هەیڤان ئەڤ سیناریۆیە و ئەڤ مەترسیە لدەف خەلكی دووبارە دبیت. رەوشا هاولاتیێن هەرێما كوردستانێ گەلەك خراب بوویە و هەتا وی ئاستی بازار ب شێوەیەكێ گشتی د لاوازیێ دایە و مووچەخوور كەفتییە بن و قەرزێن دوكانا و كریێ.... هتد و ژیانا وان گەلەك ب زەحمەت كەفتیە. پێدڤییە حكومەتا هەرێما كوردستانێ هندەك پێنگاڤێن دی بگریتە بەر، داكو هاولاتیان ژ گیرۆبوونا مووچەی و قەیرانێ رزگار بكەت و چاڤێ وان ل سەرێ هەیڤێ نەبیت، وەك ئێك: ئاسانكاریا بۆ كەرتێ كشتوكالی و جوتیاران پەیدا بكەت و ئامیرێن پێشكەفتی و سەردەمیانە بۆ دابین بكەت و جوتیار پێدڤی ب چ كەل و پەلان هەیە بۆ دابین بكەت، ژبەركو پێشكەفتنا مللەتان 75 % ب كشتوكالی و بەرهەمێن وێ یە. دو: ئاسانكاریان بۆ گەنجێن خودان شیان بكەت و دا كو گەنج پتر گرنگییێ بدەتە شیانێن خو و خزمەتا وەلاتی بكەت و وەلاتی بەرەڤ ئاستەكێ باشتر ببەت دهەمی كەرتاندا و حكومەت نەبیتە بارگرانی بۆ وان گەنجان یێ كارێ سەربەخوو دكەن، بەروڤاژی ببیتە پشتەڤان. سێ: پێدڤییە حكومەت پشتەڤانییێ ل كارێ سەربەخو و ناڤخویی بكەت و پتر گرنگییێ بدەتێ، داكو چاڤێ خەلكی و گەنجان و دەرچوویان ژ مووچەی و دامەزراندنێ بدەتە پاش و پتر گرنگییێ بدەتێ و كارێن وان ئاسان بكەت و ب هەمی رێكان پشتەڤان بیت. چار: هەر كومپانیەكا بیانی و د هەر بیاڤەكێ دا كو كار ل هەرێما كوردستانێ بكەت، پێدڤییە 75% كارمەندێن وێ كومپانیێ ل هەرێما كوردستانێ بن، لێ ئەگەر كومپانی بڤێ چەندێ رازی نەبیت پێتڤی یە حكومەتا هەرێمێ رێگربیت و نەهێلیت ل هەرێمێ بكەت. ئەڤ خالێن من دەستنیشانكرین، بەشەكن ژدیتنێن بەرچاڤ یێن كێشا هاولاتی و مووچەی كێم بكەت و ژبلی ڤان گەلەك پێنگاڤێن دیتر هەنە و پێدڤییە حكومەت كاری ل سەر بكەت ب هەمی شیانانڤە و ئەگەر حكومەتێ شیانێن دابینكرنا مووچەیەكێ گرەنتیكری یێ هەیڤانە نەبیت و نەشێت خەلكی دامەزرینیت، دڤێت ل رێكێن پێگوھور بگەریت و هاولاتیێ خوە نەكەتە بەشەك ژ قەیرانان، بەلكو ل چارەسەریێن دی بگەریت.
