سەروان کامیران نێروەیی
گەنج و لاو ژ هەژی ژیانەکا باشترن، ئەو دخوازن باشتر بژین و بهیڤینە ژ بۆ ئایندەیەکێ گەش، بەلێ ب گلە و گازندە و رەخنە گرتن ل هزر و بیرێن کەڤن و دویر ژ رۆژگارا ئەڤرۆ ل پشت شاشەیان، ئەو گوهورینا پێویست یا رازیکەر ژ بۆ گەنجی بجهناهێت. پێویستە گەنج و لاوی ئەو هشیاری یە لدەڤ دروست ببیت و بزانیت کو دوهی ئەڤرۆ یا درۆست کری و ئەڤرو دێ سبەهیێ دروست کەت. بوویە یا پێدڤیە ژبۆ پاراستن و بەرقەرارکرنا خواست و داخوازیێن خوو، گەنج و لاو د ھەولێن خوە گوھورینێ دا بن، یێن شیانێن كاری ھەبن و دەرفەتێن كاری ل بەر دەست ھەبن، خوە بكار بێخیت و یێ كار نەبیت، نابیت خوە بەردەت، بەلكو ل سەر وی پێدڤییە خوە پێبگەھینیت، خوە ب سەنتەرێ رەوشەنبیری و پێگەھاندنێ ڤە گرێبدەت، ل دیڤ رۆژگارا ئەڤرو یا جیهانگیرییێ، ژ بۆ هندێ دا کو گەنج خۆ دڤان بواراندا ببینیت، بکارخستنا چەکێن سەردەم و کارکرن لسەر هەمی جومگەیێن ژیانێ و جڤاکی و گرێدانا وان ب زیرەکییا تەکنولوژیایێ و جیهانا بلەزڤە دێ پتر کار ئاسانییێ ژ بۆ گەنجی بەردەست كەت، ئەڤە ژی ھەمی ژ پێخەمەت ژیانەكا خوشتر و شایستەتر بۆ گەنجان و دنوكەدا پرانیا گەنجان بێكارن، بەردەوام داخوازییا دامەزراندنێ و ژیانەكا خۆش دكەن، ئەڤە ژی مافێ وانە، لێ دڤێت گەنج ژی بزانیت ئەو ھێزا كارییە و مللەت پێدڤی وییە و خێزان پێدڤی وییە و سوبەھی ئەو دێ خێزانەكا جودا و سەربەخۆ پێكئینن و دیسان ھندەك بەرپرساتیێن دی دێ كەڤنە سەر ملێن وی، لڤێرە دڤێت ئەڤ گەنجێ ھەنێ چ كور بیت یان ژی كچ بیت دەھان پرسان ل بەر سینگا خوە دانیت، ئایا گلە و گازندەیێن وی، دێ ژیانا وی گوھورن؟ نەخێر، ژبەر رێژا بێكاریێ و یا ھەژاریێ گەلەك یا زێدەیە و تایبەتی ژی ئەڤ گەنجێن زانكۆ پەیمانگەھـ ب دووماھی ئیناین و نەھاتینە دامەزراندن و خەما وان كارەكێ لدویڤ ئاستێ وان بدەست بكەڤیت و لڤێرە من دڤێت ھندەك ھەڤالێن خوە بكەمە نموونە، ئێك ژوانا دەرچوویێ پەیمانگەھێ یە بەشێ كومبیوتەری و بتنێ برێكا فوتوشوبی یێ شیایی خوە بەرنیاس بكەت و تابلۆییان بۆ دكانان و جھێن فرۆشتنا دروست دكەت و دەما من پرسیار ژێ كری، تە چاوا ئەڤ كارە بدەست خوە ئێخست؟ گوت: برێكا وانێن كومبیوتەری و ل سەر تورا یوتیوبی، تا ئەز باش فێری كومبیوتەری بووم و بتنێ من لابتوبەكێ دەستێ دوویێ بۆ خوەكری و ئێدی من شیانێن خوە دانە كاری، نوكە ئەز ل جھێن كاری و یێن بازرگانی دگەرم و ئەگەر كەسەكی تابلۆیێ دكانێ نەبیت ئەز بۆ پێشنیار دكەم و ب بھایەكێ گونجای بۆ دروستدكەم و ھەر كەسەكێ بڤێت شیانێن خوە دەربێخیت، دڤێت ھیڤی و حەز ھەبن و بۆ وان ھیڤیان كار بكەت و چەند ئەم بێژین كار نینن، د بەرامبەردا كار یێن ھەین و ئەم دشێین بدەست خوە بێخین.
