بەیار سادق
ئێكەمين بەرهەمێ (كۆلن وێڵسن) ب شێوەيێ پەرتووك (ژ دەرڤەى هەبوونێ)یە و ئەو بیرمەندەكێ مەزن و قەلەم بدەست و رەوشەنبيرەكێ بریتانی یه. دناڤبەرا سالێن (1931 تا2013)ێ ژیایە.
وەك كورداندن و كورتاندنەك لسەر ڤى بەرهەمێ ناڤبرى بابەتێ (بوون)ێ، دئينيته هەبوونێ و دبێژيت: پێدڤیيه تاك شەرێ بوونا خو بكەت، چونكو هەبوون وەهمە، ئەڤ چەندە ژى پێدڤی ب ئازاديێ يه. ل سەر مرۆڤی پێدڤییە هەبوونا خوە وەك چيايەكێ مەزن ب پارێزيت، كا ئەو چیا چەند لسەر عەردی ديار دكەت، دوو جار ھندی وێ دبن عەردی ژی دایە، دا يێ موكم بيت، داكو كاريگەريا رەشەبايا لسەر نەبيت و دناڤ خوياتيا خودا يێ مەزن بيت. دیسان دبێژیت: دەمێ تو دناڤ بيروباوەرەكێ دا دحەلهی، ل وى دەمى بوون و نەبوونا ته وەكی ئێكه و خو رزگاركرن ژ ئارەستەكرنێ و كونترولكرنێ ژ لايێ گوند و عەشيرەت و گرۆپ و حزب و كەلتوور و دياردێن جڤاكى و گوتارا سياسى و ئاغا و بەگ و سيستەمێ کوێلايەتيا سەردەم و هەمى ئەو قەرەبالغيیا هەی، د ئەنجامدا كەسەكێ ياخى ب بوونەكا راستەقينه دێ ژ دايكبيت.
بدیتنا (كۆلن وێلسن)ی، دوو جوورێن مرۆڤان هەنه، ئێك: مرۆڤێ مەزن كری، وەك وان مرۆڤێن خەلك مەزن دكەن بناڤێ نڤێسەر و رەوشەنبير و قارەمان و سەركرده و فەيلەسوف و هتدد...» و دوو: مرۆڤێ مەزن، ئەو مرۆڤەيە يێ د كەتوار و هزرا خودا يێ مەزن بيت و هەلگرێ هزرەكا ديربین بیت و ئەڤە مەزناهیيەكا راستەقينەيە و پێتڤى ب پەسنا خەلكێ عەوامى نينه و جاڤەرێ سوپاسيا نينه.
كولن دبێژیت: دوو جوور ياخى بوونێ هەنه، ئێك: ياخى بوونا سەخته بتنێ خو جودا كرنه و خو دەرئێخستنه و پالنەرێ دەروونى لسەر زاله، خودان گوتارەكا رەق و توند و تيژە. يا دوويێ: ياخى بوونا راستەقينەيه كو بابەتەكه گرێدايه ب هزرا كەسێ ياخى ڤه و هەست ب گومانێ دكەت دناڤ جڤاكێ خودا و نه ب بتنێ دمينيت، بەلكى دژايەتيا وی ژى دهێتەكرنێ. سەبارەت هزركرنێ ژی دبێژیت: ھزركرنێ چ پەيوەندى ب ج باوەرناما و ئاستێن خاندنێ ڤه نينه، جونكه بابەتەكێ ذاتى يه.
