ئەڤا ل سەری گوتنێن بێژەر و پێشكێشكارا كەنالێ عەسمانیێ (گەلێ كوردستان) ھیڤی بەرواری بوون، دەما مە ژێ پرسیاركری، ئەو چ تشت بوو تو راكێشاییە ناڤ راگەهاندنێ؟ ھیڤی یێ گوت: «ئەڤە بۆ ماوێ (20) سالانە ئەز دناڤ راگەهاندنێ دا و ئەز یا بەردەوامم و دەستپێكا من دگەل بەرنامێ زارۆكان بوو و من بەرنامێ زارۆكان پێشكێشدكر». د بەرسڤا پرسیارەكا دی دا، ئایا كارێ راگەهاندنێ بۆ تە ل پشت شاشێ خوشترە یان تو د شاشێ دا دەربكەڤی؟ ھیڤی بەرواری گوت: «وەك من گوتی دەما ئەز هاتیمە ناڤ كارێ راگەهاندنێ، خەونا من وەكی هەر زارۆكەكی ئەو بوو ئەز ل سەر شاشێ دەركەڤم و من بۆ ڤێ حەزێ كار كر، من هەولدا شیانێن خوە زێدە بكەم و ئەز بشێم دكارێ خوەدا یا سەركەفتی بم و هەر سەركەفتنەكێ ژی، حەزكرن و كاركرن و ماندیبوون بۆ دڤێت و من ئەڤە كرن». ئەوا تە بەحسكری ھینگێ تو زارۆك بووی و ئەو قوناغەكا جودا بوو، نوكە تو بەرنامێن مەزنان پێشكێشدكەی، تە هەست كریە جوداھی دگەل قوناغا بەرێ هەبیت یا تە دناڤ بەرنامێ زارۆكاندا كاركری؟ ھیڤی یێ گوت: «مانا من و حەزا من بۆ كارێ من و دگەل مەزنبوونا من، ئێدی ئەز ژ بەرنامێ زارۆكان دەربازی كارێ بێژەریێ بووم و من چەندین بەرنامە پێشكێشكرنە، چ بەرنامێن جڤاكی بن یان سیاسی یان گشتی بن و لێ ئەگەر تو من پرسیارا بەراوردیێ دناڤبەرا هەردوو قوناغاندا ژمن بكەی، دێ بێژمە تە هەر قوناغەكێ ژوان تایبەتمەندی و خۆشییا خوە بۆ من هەبوو». بوچی پێشكێشكرنا دەنگ و باسان، ئەڤێ چ تایبەتمەندی بۆ ھیڤی یێ هەیە؟. ھیڤی بەرواری گوت: «ئەز دێ بێژمە تە بۆ من پێشكێشكرنا دەنگ و باسان خوشترە، ژبەركو ئەڤە دبیتە هاندەرەك كو رۆژانە ئەز دیڤچوونا دەنگ و باسێن رۆژانە بكەم، بزانم چ دھێتە رویدان و لڤێرە ئەز دشێم كونترۆلەكا باشتر ل سەر پێشكێشكرنا دەنگ و باسان بكەم وەك كارێ خوە، ژبەركو ب ھزاران كەس یێن بینەرییا مرۆڤی دكەن و ئەگەر مرۆڤی پێزانین هەبن، دێ كونترولكرن ژی ددەستێ مرۆڤی بخوەدا بیت و ژلایەكێ دیڤە، دیڤچوونا من بۆ دەنگ و باس و رویدانان، پێزانین لدەف من زێدە دبن و ئەڤە ژی باشە برێكا وێ رەوشەنبیرییا گشتی لدەف مرۆڤی زێدە دبیت».
