کوردستانی نوێی خانەقی - تایبەت
هاووڵاتیانی سنووری ناحیەكانی مەیدان و قۆرەتوو بەهۆی دووریی رێگە و دروستبوونی گرفتەوە بۆیان، داوا دەكەن، فەرمانگەی كارتی نیشتمانییان بۆ بكرێتەوە.
سێ ساڵە خەریكم
نەوزاد ئەحمەد کە هاووڵاتیەكی دانیشتووی ناحیەی قۆرەتووە لەبارەی كێشەكانیان بۆ دەرهێنانی كارتی نیشتمانی بۆ كوردستانی نوێی خانەقی وتی: سێ ساڵە بەهۆی یەك پیتەوە زیاتر لە 20 جار چوومەتە خانەقی و دیالە و بەغدا و نەمتوانیوە كارتی نیشتمانی دەربكەم.
وتیشی: رێگەی دوور و تێچووی زۆر و قەرەباڵغی و دواتر رۆتین بەتەواوی بێزاری كردووین.
رێگەی دوورمان بۆ نزیك بكەنەوە
هەر لەوبارەیەشەوە نەشمیل عەلی هاووڵاتیەكی دانیشتووی ناحیەی مەیدان بە كوردستانی نوێی خانەقی راگەیاند: رێگەمان دوورە، كێشەی هاتوچۆ و تێچووی وەرە و بڕۆمان بۆ دروست دەبێت. زۆربەی خەڵكی گوندەکانی مەیدان داهاتیان سنووردارە، ناتوانن هەموو رۆژێك بچنە خانەقی یان بەعقوبە.
جەختیكردەوە: رێگەی دوورمان بۆ نزیك بكەنەوە، فەرمانگەیەكی كارتی نیشتمانی كێشەكان چارەسەر دەكات.
هەوڵدەدەین و داواكاری پێشكەش دەكەین
هەر سەبارەت بەو بابەتەش ئەندامێكی ئەنجومەنی نوێنەرانی عیراق جەخت لەسەر ئەوە دەكاتەوە، کە ئەو هاووڵاتیانە مافی خۆیانە، سەردەمانێك ناوچەکەیان لانكەی خەبات و پشتیوانی شاربوون، دەبێت هەوڵی زیاتریان بۆ بدرێت.
سۆزان مەنسور ئەندامی ئەنجومەنی نوێنەرانی عیراق بە كوردستانی نوێی خانەقی وت: داواكارییەك پێشكەش بە وەزارەتی ناوخۆ و لایەنە بەرپرسارەكان دەكەم، چونكە ئاگادارم لە گرفتەكانیان و كێشەی زۆریان بۆ دروست كراوە.
ئاماژەشی بەوەدا: بەوردی چاودێریی ئەو دۆخە دەكەم و چی بە ئێمە بكرێت کەمتەرخەمی ناكەین، هەرچەند بۆ حكومەت كارێكی قورس نییە، سیستمێكی ئەلەكترۆنی و بینا و چەند فەرمانبەرێكی دەوێت، لەچاو سەختی و دژواریی رێگەوبان و هاتوچۆی ئەو هاووڵاتیانەدا جێبەجێکردنی داواکەیان هیچ نییە.
