سەردار ئەکرەم
پێداچوونەوەی: پ.ی.د.کەیفی ئەحمەد
شوێن دارستانێکی گەوره
کارەکتەرەکان
ورچ
فیل، هاوڕێی ورچ
ئاسک، پزیشکی دارستان
کەروێشک، دراوسێی وچ
دیمەنی یەکەم:
ورچ بەئازارەوه لە بەردەم ئەشکەوتەکەی دانیشتووه و دەستی لەسەردەموچاوی داناوە
ورچ : بەناڵەناڵ ئای... ئای... ددانم.... چەند ئازاری هەیه.
فیل بەپەلە دێتە لای ورچ
فیل: چی بووه هاوڕێ گیان؟ بۆچی وا دەناڵێنیت؟
ورچ: فیلی هاوڕێم، ددانم زور ئازاری هەیە ناتوانم هیچ بخۆم
فیل: ئۆهـ، ئەمه کێشەیەکی گەورەیه، دەبێت بچین بۆ لای ئاسک ئەو پزیشکی دارستانه.
ورچ: باشه، بەڵام زۆر ئازارم هەیه.
فیل یارمەتی ورچ دەدات و پێکەوە بەرەو مالی ئاسک دەڕۆن.
دیمەنی دووەم:
دارستان ورچ وفیل لەبەردەم ماڵێ ئاسکدا
فیل لەبەردەم مالی ئاسکدا
لە دەرگا دەدات: ئاسک تکایە وەرە دەرەوە، پێویستمان بەیارمەتیته.
ئاسک دەرگا دەکاتەوه: چی بووه؟
ئوه ...سڵاوتان لێبێت هاوڕێیان، ورچ چیت لیهاتووه؟
ورچ: ددانم... زۆر ئازاری هەیه.
ئاسک: ئادەی با بزانم، دەمت بکەرەوە
ئاسک سەیری دەمی ورچ دەکات
ئاسک: بەڵی ددانێکت هەوی کردووه، پێویستە چارەسەری بکەین.
فیل: چۆن دەتوانین یارمەتیی بدەین؟
ئاسک دەبێت هه ندێک بەرهەمی گیایی دارستان کە تایبەت بە ئازاری ددانە، بۆی بهێنم و لەسەر ددانەکەی دابنێین هەروەها پێویسته ورچ ماوەیەک شیرینیی نەخوات.
فیل: چ بەرهەمی گیاییەکە وا بەسودە بۆ ئازاری ددان؟
ئاسک: ئەمە گوڵی مێخەکە بەرهەمی دارستانەکەی خۆمانە.
ورچ و فیل: گوڵی مێخەک؟
ئاسک: بەڵی .. بەڵێ گوڵی مێخەک، بۆ ئازاری ددان زۆر باشە.
فیل: ئەو گوڵە چۆن بەکاردێت؟
ئاسک: زۆر ئاسانە هاوڕێیان ئێستا نیشانتان دەدەم چی دەکەم.
دیمەنی سێیەم
لە ماڵی ئاسک
ئاسک: ورچی هاوڕێم، ئەم گیای مێخەکە لەسەر ددانت دابنێ، یارمەتیت دەدات، ئازارەکەت کەم ببێتەوه.
ورچ: بەدوو دڵییەوه گیا مێخەکەکە دەوات، ئممم... تامی خوش نییه! بەڵام هەست دەکەم، باشترم و ئازارم کەمدەبێتەوە.
فیل: ئافەرین ئاسکی هاوڕێمان، بەڵام چۆن دەتوانین رێگریی لەوەبکەین، ئەم کارە دووباره روونەداتەوه؟
ئاسک: دەبێت ورچ زیاتر ئاگای له پاکوخاوینی دەمی بێت و کەمتر شیرینیی بخوات.
مام ورچ (بەغەمبارییەوە): بەڵام من حەزم لەشيرينيه.
کەروێشک: لەپر دێته ژوورەوە: سڵاو هاوڕێیان بیستم ورچ نەخوشه.
پێم بڵێن ئیستا تەندروستی چۆنە؟
ورچ: باشترم سوپاس کەروێشک گیان.
کەروێشک: دەتوانم یارمەتیت بدەم، کە چۆن ددانەکانت پاک راگری، من دەتوانم فێری شوشتنی ددانەکانت بکەم بەشێوەیەکی دروست.
فیل: بیرۆکەیەکی زور باشه.
کەروێشک: هاوڕێیان، بەڵام من دەچمەوە بۆ ماڵەوە، بەجێتان دەهێڵم، لەگۆڕەپانی دارستان چاوەڕێتان دەکەم، جارێ بەنیازی دیدار( کەروێشک دەڕواتەوە بۆ ماڵەوە).
هەمویان: بەنیازی دیدار.
ئاسک: وەکو وتم مام ورچ دەبێت لەسەر رێنمایەیکانم بەردەوام بیت.
مام ورچ: زۆرباشە جێ بەجێی دەکەم، زۆرسوپاس بۆیارمەتیی دانەکەت.
ئاسک: سوپاسی ناوێت، یارمەتیی دانی یەکتر ئەرکی سەرشانمانە.
(ورچ وفیل لە ماڵێ ئاسک دێنە دەرەوە و بەرەو ناوەڕاستی دارستان دەچن، چاوەڕێی کەروێشک دەکەن)
دیمەنی چوارەم:
کەروێشک: چۆتەوەماڵ فڵچەیەکی بچوکی ددان شوشتن و هەویری ددان شوشتنی هێناوە) .
کەروێشک: سڵاو هاوڕێیان.
هەردووکیان: سڵاو هاوڕێ.
کەروێشک: چوومەوە ماڵەوە ئەم دیارییە بچوکەم بۆهێنای، تا پێشکەشتی بکەم.
مام ورچ: زۆرسوپاس، خۆشحاڵم بەهێنانی دیارییەکەت، بەڵام ئەوە چییە؟
کەروێشک: ئەمە فڵچە و هەویری ددان شوشتنە، بۆپاککردنەوەی ددانەکان بەکاردێت.
فیل: چۆن بەکاردێت؟
کەروێشک: کەمێک هەویری ددان شوشتنەکە دەخەیتە سەرفڵچەکە، ئینجا دەخیتە ناودەمت و بە هێمنیی بەددانەکانتیا دەهێنیت، دواتر بەئاو ناودەمت پاکدەکەیتەوە، ئینجا فڵچەکە پاکدەکەیتەوە و لەشوێنێکی خاوێندا دادەنێیت بۆ رۆژێکی تر.
مام ورچ: رۆژانە چەند جار بەکاری دەهێنی؟
کەروێشک: واباشە دووجار.
فیل:چ کاتێک؟
کەروێشک: بەیانیان دوای نانی بەیانی .
مام ورچ: ئەی کاتەکانیتر.
کەروێشک: شەوان پێش خەوتن.
هەردووکیان: زۆرباشە هاوڕێ گیان، هەوڵدەدەم بەکاری بهێنم، زۆر سپاس بۆدیارییە بەنرخەکەت.
کەروێشک: سوپاسی ناوێت هاوڕێ گیان.
ورچ بەخۆشحاڵییەوە: سوپاسی هە مووتان دەکەم، ئیستا زور باشترم و فێر بووم چون ئاگام لە ددانەکانم بێت.
فیل: کەواتە هەموومان باگۆرانیی پارستنی ددانەکانمان بڵێین بەیەکەوە.(هەموویان بەیەکەوە گۆرانییەکە دەڵێن):
دەیپارێزین.... دەیپارێزین ددانەکانمان دەپارێزین.
لە خواردنی رەق، لە خواردنی شیرین.
لە خواردنی سارد، لە خواردنی گەرم
لە ئاوی سارد، لە شیروچای گەرم.
لە میکرۆب و بەکتریای زیان بەخش.
دەیپارێزین..دەیپارێزین ددانەکانمان دەپارێزین.
هەموویان تێکڕا پێدەکەنن و باوەش بەیەکتردا دەکەن.
