راپۆرت: بامەرنی
ب سەرپەرشتیا (قوباد تالەبانی) و ل ژێر درووشمێ (دیتنەكا نوی، بھێزی و پێشڤەچوون و خزمەتگوزاری)، دوهەمین دیدارا یەكێتیی نیشتمانیی كوردستان ل رۆژا 20/2/2025ێ ل دهۆكێ ھاتەبەستن، ئەڤە ژی پشتی دیدارا ئێكێ بوو ل پارێزگەھا مووسلێ و دا ژ نێزیك بزانین، گرنگیا ڤێ دیدارێ بۆ سەركردایەتییا یەكێتیی نیشتمانی و بۆ كادر و لایەنگرێن یەكێتیێ لڤێ دەڤەرێ دێ چبیت، مە ئەڤ راپۆرتە ئەنجامدایە.
ناجی باكۆزی: ئەم دگەشبینین دێ بۆچوونێن کادرێن سنورێ مەلبەندێ دهۆک لبەرچاڤ هێنە وەرگڕتن
مەبەست ژ ئەنجامدانا دیدارا ئێكەتییێ چبوو؟ ناجی باكۆزی جێگرێ مەلبەندێ چارێ دهۆكێ بەرسڤا ڤێ پرسیارێ ددەت و دبێژیت: «دیدار پێداچوونەکە بۆ وان کار و بریار و هەلویستێن یەکێتی نیشتیمانی کوردستان، یێن پشتی کونگرا پێنجێ و دیسان راوێژەکە دگەل کادڕ و بنکێ جەماوەرێ یەکێتی بۆ وەرگرتنا رەخنە و پێشنیار و هزر و بۆچوونێن نوی لسەر هەمی بیاڤ و سکتەرێن ژیانێ، وەک یێن سیاسی، ئابووری، پەیوەندی، روشنبیری، گەنجان و ژنان و هەمی تەخ و چینێن کومەلگەهێ بگشتی». لدوور گرنگیا دیدارێ بۆ دەڤەرا بادینان، ناجی باكۆزی زێدەتر گوت: «دیدار بۆ بادینان گەلەکا گرنگە، چونکە دێ ب ساناهی رەخنە و پێشنیار و پرۆژە و بەرنامێن مە بۆ گەشەکرنا رێکخستنێن یەکێتی گەهنە سەرۆک و سەرکردایەتیێ و لیژنا بلندا دیدارێ و ئەم دگەشبینین دێ بۆچوونێن کادرێن سنورێ مەلبەندێ دهۆک لبەرچاڤ هێنە وەرگڕتن و دێ بنە خالێن سەرەکی د کارناما داهاتییا سەرکردایەتیێ، ژبۆ گرنگیدان و گەشەکرنا یەکێتی لدەڤەرا بادینان».
دلدار زاخۆیی: ئەنجامێن ژ دیدارێ دەردكەڤن دێ بنە چاڤرۆھنییەك بۆ سەركردایەتییا ئێكەتییێ
دلدار زاخویی دیدارا ئێكەتیێ ل دهۆكێ ب داھێنانەكا نوی دزانیت و دبێژیت: «ئەنجامدانەكا دیدارەكا ژڤی رەنگی، كۆ تێدا هەمی تەخێن كومەلگەهی بەشدار ببن و هەر تەخەك جودا دیتن و بوچوونێن خوە گەنگەشەبكەن و ئەو دیتن و پێشنیارێن هەنێ بۆ سەركردایەتیێ بھێنە بلندكرن، ئەڤە بخوە پێشھاتەكا نوویە ئێكەتییێ ھاڤێتی و مەبەست ژێ بشێت ئەندامێن خوە و لایەنگرێن حزبا خوە بەشداری بریار و دارشتنا سیاسەتا ئێكەتیێ بكەت». دلدار زاخۆی كو جێگرێ مەلبەندێ چارێ دهۆكێ یە، زێدەتر گوت: «ئەنجامدانا ڤان دیداران و بەرچاڤ وەرگرتنا تایبەتمەندیێن هەر دەڤەرەكێ جودا، ژبەركو دەڤەرا بادینان جودایە ژ دەڤەرا گەرمیان و ھوسا و ئەنجامێن ژ دیدارێ دەردكەڤن دێ بنە چاڤرۆھنییەك بۆ سەركردایەتییا ئێكەتییێ كو پێنگڤاێن باشتر بھاڤژیت و سیاسەتەكا حەكیمانەتر بگریتە بەر، چ بۆ ناڤخوییا حزبێ بیت و چ ژی بۆ پێكئینانا حكومەتێ و چ بۆ دارشتنا سیاسەتا خوە یا ئایندەیی بیت». لدوور دیدارێ بخوە و كەنگی بریار ژ بەستنا وێ ھاتیە دان، دلداری گوت: «بەری كونگرێ پێنجێ بھێتەگرێدان، ل سالا 2022ێ یەكەم دیدار ل سەر پێشنیارا بەرێز قوباد تالەبانی ھاتبو ئەنجامدان و دیارە ئەو دیدارە ئەزموونەكا باش بوو و مفا ژ ئەنجامێن وێ ھاتییە وەرگرتن، بوویە د كونگرەیدا بریار ل سەر ھاتەدان، كو دڤێت ئەڤ دیدارێن هەنێ د بەردەوام بن و خالەكا دی ژی، رەنگە دناڤ كونگرەیدا یان بەستنا پلنیومان دانوستاندنەكا پێدڤی یا گشتگیر نەھێتە ئەنجامدان، لێ ل دیدارێن ژڤی رەنگی، دەرفەت زێدەتر یا هەی و ئەڤە مافێ ئەندام و لایەنگرێن ئێكەتیێ بخوە یە ژی، كو ئەوان ژی مافێ بەشداریكرنێ د دارشتنا سیاسەتا ئێكەتیێ دا هەبیت و حزبێن سەركەفتی ژی هەر ئەون یێن جەماوەرێ خوە بەشداری بریارا سیاسی دكەن»
ئەمین شێخكی: دێ پەیاما كادر و لایەنگرێن ئێكەتیێ، رەخنە باشتر و رۆھنتر گەھنە بەر دەستێ سەركردایەتیێ
بۆچی سەركردایەتیا ئێكەتیێ دەستپێكا ئەنجامدانا دیدارێن خوە ژ دەڤەرا بادینان دەستپێكر؟ ئەڤە ئەو پرسیار بوو، یا مە ژ بەرپرسێ بەشێ بیرۆھشیاریێ مەلبەندێ چار كری، گوت: «ژبەر گرنگیا دەڤەرا بادینان بۆ سەركردایەتیا یەكێتیێ و ب تایبەت بۆ سەرۆك بافلی، ئێكەمین دیدار ل مووسلێ بوو و دیدارا دوویێ ل 20/2/2025ێ ل دهۆكێ ھاتە ئەنجادان و تێدا لیژنەكا بلندا سەركردایەتیا یەكێتی نیشتیمانی بەشداربوو و بێگومان ئەڤ جورە دیدارە زور گرنگن بۆ هەلسەنگاندنا سیاسەتا یەكێتی نیشتیمانی و ب تایبەت ئەو ئاستەنگێن دكەڤنە درێیا كادرێن یەكێتی لڤێ دەڤەرێ و چاوانیا لادانا وان». لدوور ئەڤ كەسێن مافێ بەشداریكرنێ دڤێ دیدارێدا هەین، ئەمین شێخكی گوت: «دیدارا دوویێ ل سەر ئاستێ مەلبەندێ چارێ دهۆكێ بوو و هەر كەسی مافێ بەشداریێ هەبوو، چ ئەندامێ رێكخستنێ بیت یان لایەنگرێ یەكێتی نیشتیمانی بیت و دیدار ل سەر لیژنان ھاتبوو پارڤەكرن و هەر لیژنەیەكێ تەخەك ڤەگرتبوو و چ یا راگەھاندنێ بیت یان یا رێكخراوان بیت یان یا گەنجان بی و ئەڤ لیژنێن دی، نڤیسەر و رۆژنامەڤان و گەنج و ژن و رێكخستیێن دێرین و پێشمەرگە و كەساتیێن دەڤەرێ و كەسێن بسپور تێدا د بەشدار بوون و هەر كەسەكی ب ئازادانە دیتن و بۆچوونێن خوە ددانە لیژنێ. ل دووماهیێ ژی ئەڤ دیتنێن هەنێ هەمی دێ بۆ لیژنا بلندا دیدارێ ھێنە بلندكرن و دێ بنە چاڤرۆنییەك بۆ یەكێتی نیشتیمانی و تێدا دێ پەیاما كادر و لایەنگرێن یەكێتیێ، رەخنە و پێشنیارێن وان ب شێوەیەكێ باشتر و رۆھنتر گەھنە بەر دەستێ سەركردایەتیێ».
