سه‌ردار هێتوتى
خه‌ما به‌ره‌ڤ پێشڤەبرنا ئاستێ خوێندكاران ل ناڤه‌ندێن خواندنێ د رۆژا ئه‌ڤرۆدا، بوویه خه‌ما بێخه‌ما ل ڤى وه‌لاتى. چونكى ئه‌وا بۆ ڤى كه‌رتى دهێته‌كرن و ئه‌وا كو پێدڤییه بهێته‌كرن، ڤالاهییا وان عه‌رده‌ك و دوو ئه‌سمانن. ل كوردستانێ و ب گشتى ل عیراقێ، ئه‌ڤى كه‌رتی پاشڤه‌چوونه‌ك مه‌زن بخۆڤه دیتییه، ئه‌و وه‌لاتێن كو باشترین سیسته‌مێ په‌روه‌ردێ هه‌یه ل سه‌ر ئاستێ جیهانێ، عیراق و هه‌رێما كوردستانێ ژى دناڤدا شیان شانازیا رێزبه‌ندیا 120 یا جیهانى بده‌ستخۆڤه بینن، كو ئه‌و ژى دبیت ب ته‌نێ چه‌ند وه‌لاته‌كێن وه‌كى ئه‌فغانستانێ و سۆمالێ ل دوڤدا بهێن.
ئه‌گه‌ر ئه‌م ل كوردستانێ ڤه‌خواندنێ بۆ ڤێ ره‌وشێ بكه‌ین، دشێم ئه‌گه‌ران دڤان خالاندا رێزبكه‌م:
1ـ كێمكرنا بهایێ مامۆستایى ژلایێ حكومه‌تێڤه، ئه‌و ژى ب پێنه‌دانا مووچه‌یێ وى یێ هه‌یڤانه و ژبه‌ر هندێ مامۆستا نهشێت وه‌ك پێدڤى ئه‌ركێت خۆ بجهـ بینیت و نه‌چاره بۆ ڤه‌دیتنا پاریێ نانى، كاره‌كێ دیتر ژى بكه‌ت.
2ـ نه‌بوونا خۆلێت به‌ره‌ڤ پێشبران ئاستێ مامۆستا و چاوانیا سه‌ره‌ده‌ریكرنێ دگه‌ل سه‌رده‌مێ نوى.
3ـ ب ناڤ سیسته‌مێن نوى یێن جیهانى، ئه‌وێ كو سالانه هه‌ر وه‌زیر و سیسته‌مه‌كى بۆ دلێ خۆ دادنیت، رێك لبه‌ر قوتابیان به‌رزه بوویه.
4ـ نه‌بوونا هشیاریێ ژلایێ سه‌میانانڤه بۆ چاوانیا بكارئینانا تورێن جڤاكى.
5ـ به‌رئه‌لایى و نه‌بوونا یاسایان بۆ ده‌ست ڤێراگه‌هشتنا ئامیرێن په‌وه‌ندیێ و بكاربرنا تورێن جڤاكى.
و ژبلى ڤان خالان، هه‌ر نڤیسه‌ر و ره‌خنه‌گره‌ك دشێت هنده‌ك خالێن دیتر ژى زێده بكه‌ت، لێ هه‌ر چاوابیت هه‌ر هه‌مى خال دێ خۆ لدوور بازنێ نه‌بوون یان ژى كێمبوونا سه‌روه‌ریا یاسایا په‌روه‌رده‌هى بینن، كو ئاسانكارى د پرسیاراندا، قوتابخانێن تایبه‌ت و ئاسانكاریێن وان یێن خواندنێ، نه‌بوونا گرنگییێ ژلایێ حكومه‌تێڤه بۆ قوتابخانێن گشتى و پتریا وان به‌ره‌ڤ وێرانبوونێڤه دچن. ژلایێ نه‌بوونا سه‌خبێرییێ و نه‌بوونا پاقژكه‌ران. ب ڤى ده‌ستودارى یێ هەیی، پێدڤییە سه‌میان خه‌مێ ژ زارۆكێن خۆ بخۆن و وان نه‌هێلنه بهیڤیا حكومه‌تێ بتنێ ڤه و دڤێت پێكڤه ل هه‌می قوتابخانەیان كومێن سه‌رپه‌رهشتیاریا ئاڤاكه‌ن و خه‌مێ ژ په‌روه‌رده‌هیا زارۆكا بخۆن.
