بوچی گرنگە ژن بنڤیسیت؟
ئیمان سۆزمان
جڤاک پێدڤی ب کەسەکییە دەنگێ ژنێ بگەهینیت، ئەڤەژی دێ باشتر بیت کو ژن بخۆ بڤی رۆلی رابیت، ژبەرکۆ ژن پتر د ژنێ دگەهیت و دزانیت دێ چاوا دەربرینێ ژ وان ئاستەنگی و ئێش و ئازاران کەت یێن رۆژانە دكەڤنە بەرسینگا وێ
ئەگەر ل رۆژنامە و گوڤارێن خوە بنێرین، نڤیسەرێن زەلام زێدەتر ژ نڤیسەرێن ژن دكەڤنە بەرچاڤ و ژ نەبوونا نڤیسەرێن ژن، زەلام پێش ژنان ژیڤە دنڤیسین و دەربرینێ دكەن. لێ ئایا ئەو دشێن هەمان دەربرین بكەن، چ ژلایەنێ پەروەردێ ڤە بیت یان ژ لایەنێ ئابوری ڤە بیت وەك خێزان و مەزاختن یان لایەنێ رەوشەنبیری، داهێنانێن ئەدەبی؟ پێنەڤێت دێ بەرسڤ نەخێر بیت. بمخابنی ڤە رێژا ژنێن نڤیسەر لناڤ مەدا گەلەکا کێمە، کو ئەم دشێین ب تبلێن دەستان بهژمێرین و ئەڤێ ژی رەنگە ھندەك ئەگەرێن خوە هەبن، كو دێ ئاماژێ بۆ ھندەكان دەین و ئەڤە د دەمەکیدایە، جڤاک پێدڤی ب کەسەکییە دەنگێ ژنێ بگەهینیت، ئەڤەژی دێ باشتر بیت کو ژن بخۆ بڤی رۆلی رابیت، ژبەرکۆ ژن پتر د ژنێ دگەهیت و دزانیت دێ چاوا دەربرینێ ژ وان ئاستەنگی و ئێش و ئازاران کەت یێن رۆژانە دكەڤنە بەرسینگا وێ. هەروەسا دەما ژن ب رۆلێ پەروەردەکرنا زارۆکی رادبیت و خێزانێ برێڤە دبەت، وەك پەروەردەیا زارۆكان بیت یان مەزاختنا داھاتێ خێزانێ بیت، كو پرانیا جاران ژن ژێ بەرپرسە، ئەگەر ژن شییا رۆلێ خوە یێ دروست بگێریت و ئەو باوەریە بۆ دروست بوو، كو ئەڤ چەندە ئێكەم جار بەرپرساتییا وێنە، ئێدی ئەو بخوە دێ رۆلێ خوە گێریت و ئەڤە ژبلی ڤەگێرانا نموونێن ژنێن سەركەفتی د هەمی بوارەكیدا، كو بابەتێ مە ل سەر نڤیسینێ یە، دێ بینین مە چەندین نموونێن ژنێن سەرکەفتی و خودان شیان د بوارێ نڤیسینێ و بوارێن دیدا هەنە، کو بەردەوام دەنگێ ژنێ دگەهینن و بەرەڤانییێ ژ مافێن وێ دکەن و دیسان برێكا نڤیسینێ بەرھرەیێن خوە دئینە پێش و ب دەربرینێن جوان، نڤیسینێن خوە بەرچاڤ دكەن. لڤێرە ژی دبیت گەلەک ژنان حەز و شیانێن نڤێسینێ ل دەف هەبن، لێ هندەک تشت دبنە رێگر کو وەک پێدڤی نەشێت بهێتە دناڤ مەیدانێ دا و دەربرینێ ژ هندەک بابەتان بکەت. لەوما یا پێدڤییە پشتەڤانیا ژنێ بهێتە کرن و پتر بهێتە هاندان بۆ بەشداریکرنێ د خولێن پەروەردەی و گەشەپێدانێ و خولێن رەوشەنبیری و جڤاکی و هتد، داکو باشتر خۆ بنیاسیت و ئەو وێرەکییە بۆ چێببیت کۆ د هەر بارودوخەکیدا خودان دەنگ و هەلویست بیت.
من بخۆ گەلەک بابەت و نڤێسینێن جوان دیتینە ژ لایێ ژنان ڤە هاتینە نڤێسین، لێ هەر دەما ئەڤ نڤێسینە هاتینە بەلاڤکرن د تورێن جڤاکیدا رووبروی گەلەک ئاریشان بوینە و ژوان ژی، کومێنتێن نە جوان ژ لایێ خوێنەریڤە و خەلەت تێگەهشتنا وان ل سەر بابەتی بێی هزرکرن، دیسان بێزارکرنا نڤێسەرێ ب رێیا هنارتنا نامەیێن تایبەت و داخوازکرنا پەیوەندیێن بێ مفا. لەوما ژی نڤێسەرێن مە دڤێت د هاریکار بن دگەل ژنێ و پالپشتیاوێ بهێتە کرن، داکو بشێت بەردەوام بیت لسەر نڤێسینێ.
#بادینان
