ھاشم مزیری
پەیاما منە بۆ دەیك و بابان كۆ چ جارەكێ بۆ زارۆكێن خوە یێن پەككەفتی نەبنە رێگر بۆ ئارەزوویێن وان و دەرفەتێ بۆ پەیدا بكەن، كو بشێن بەشداریێ د وان چالاكیاندا بكەن، یێن ب ئەو حەژێدكەن
خودان پێدڤیێن تایبەت، تەخەکا ڤی چڤاکی نە و ئەڤ تەخە ژ گەلەك روویانڤە ھاتینە پشتگوھـ ھاڤێتن، چ ژلایێ كەرتێ حكومی ڤە بیت یان ژی كەرتێ تایبەت. دەما دبێژین ئەو یێن ھاتینە پێشتگوھـ ھاڤێتن، ئەز نابێژم ب ئێكجاری رۆل بوان ناهێتەدان، لێ دڤێت تایبەتمەندیەكا زێدەتر ب وان بهێتەدانێ، ژبەركو ئەو وەك كەسێن ئاسایی نینن، كو بشێن خوە دگەل هەمی كاران بگونجینن، بەلێ وان شیانێن دیتر یێن هەین، ژلایێ ھزریڤە د ساخلەمن و دشێن گەلەك كاران بكەن، كو رەنگە كەسێن ئاسایی ئەو شیان نەبن و نابیت ئەم وان ژبیربكەین و گرنگییێ ب وان نەدەین و ئەو پێدڤی هەر جورەكێ تێكەلیێ نە و ئەز بەحسا ھندەك گللەیی و گازندەیێن وان بكەم:
ژلایێ مووچەیێ ڤەبری یێ وانڤە، پێدڤییە وەزارەتا كارو كارۆبارێن جڤاكی و خودان پێدڤیێن تایبەت، خەمەكا زێدەتر ژ مووچێن وان بخۆن، ژبەركو ئەگەر بەراورد بكەین گەلەكان مووچێ وان بتنێ تێرا دەرمان و چارەسەریێن وان ناكەت. ل كەرتێ ھاتنووچۆنێ ژی، پێدڤییە ئاسانكاری بۆ بهێتەكرنێ، دەما ترۆمبێلێن خوە دبەنە ناڤ بازاری و بڤێن ل جهێن بۆ ھاتینە دەستنیشانكرن راوەستن، ئەو نەشێن ڤێ چەندێ بكەن، راستە كوفكێن تایبەت ھاتینە دانان دا ترۆمبێلێن دی راوەستن، لێ دێ بینی ترۆمبێل ل بەر وان كوفكا ژی راوەسیاینە و رێك ل وان ھاتییە گرتنێ و ئەگەر ل كەرتێ پەروەردێ ژی بنێرین، پێدڤییە وەرگرتنا قوتابی و خویندكاران لدویڤ جورێ پەكەفتنێ سەرەدەری دگەلدا بهێتەكرنێ، ژبەركو وی شیانێن ب سەركەفتنا دەرەچكان نینن و رەنگە عەرەبانەیە و دبیت ل بەر دەرگەهێ چوونا ژوورا قوتابخانێ رەمپە بۆ ب ئاسان ب سەركەفتنا عەرەبانێ نەھاتبیتە دروستكرنێ. ئەڤە ژبلی جهێن دەستشووشتنێ چ ل قوتابخانێ بیت یان گەلەك جهێن دی و ئەڤ بەژن كۆرت نەشێن ڤان دەستشوویان بكار بینن و هەر ل كەرتێ پەروەردێ و خواندنێن بلند وەك پەیمانگەھـ و زانینگەهێ داشكاندن ل سەر بهایێ وەرگرتنا خوێندكاران هەبیت، هەر چنە بیت ئەو بهایە كێمتر بیت ژ كەسێن ئاسایی و ئەڤە ژبلی سەندیكا و كۆمەل و جهێن دی، ئەڤێن خودان پێدڤیێن تایبەت حەزدكەن شیانێن خوە لێ بەرچاڤ بكەن و رێگرییێ ل هەر جورە سڤكاتیەكێ بهێتە كرن بڤان كەسان و یا ژ هەمیێ گرنگتر من دڤێت بەحس ژێ بكەم، ئەو ژی پەیاما منە بۆ دەیك و بابان كۆ چ جارەكێ بۆ زارۆكێن خوە یێن پەككەفتی نەبنە رێگر بۆ ئارەزوویێن وان و دەرفەتێ بۆ پەیدا بكەن، كو بشێن بەشداریێ د وان چالاكیاندا بكەن، یێن ب ئەو حەژێدكەن و لدویڤ ھزر و بوچوونێن وان دگونجایی بن.
