دیدار: كەڤرین
مالباتا زارۆكی و تایبەتی دەیك و بابێن زارۆكی گەلەك كارتێكرنا خوە یا ھەی، كا زارۆكێن وان كوردییا خوە ژبیر بكەن یان نە. ئەڤجا ئەگەر دایک و باب د خەمسار بن و خودان بڕیار نەبن، ئێدی زمانێ وی زاڕۆکی بەر ب لاوازبوونێ ڤە دچیت و زمانێن دن ل سەر
زال دبن
سەدان خێزانێن كورد ل دەرڤەی وەلاتی دژین و مەترسیا ل سەر زارۆكێن وان ھەی، كوردیا خوە ژ دەستبدەن، ئەڤە بابەتێ دیدارەكێ یە دگەل ئێك ژ ماموستایێن زمانێ كوردی ل وەلاتێ سوید.
كوردستانی نوێی بادینان: كورد ل چەندین وەلاتێن جیهەنێ بلاڤەبووینە و ئایا ئەم دشێین بێژین، مەترسییا نەمانا زمانێ كوردی ل سەر وان ھەیە؟
نیشان بامەرنی: ب ڕاستی مەترسییەکا مەزن ل سەر زاڕۆکێن کورد ھەیە، ژبەركو دەما زارۆك ژ چاند و زمان و وەلاتێ خوە دوور دكەڤیت، هەلبەت باندۆرەکا مەزن ل سەر دھێتەکرن، ب تایبەت دەما دبستان دەست پێدکەت و هەڤالینییا ژ دەرڤەی کوردان دگەل چێدبت، ئێدی زمانێ زاڕۆکان یێ سەرەکی دبیتە زمانێ وی وەلاتی و ژبلی وێ ژی، زمانێ ئینگلیزی دەرسەکا بنگەهینە دڤیا فێر ببن. هەروەسان دڤیا زمانەکێ دن ژی هەلبژێریت و فێر ببیت ژ بلی هەموو وانەیێن دن. ئێدی ئەو زاڕۆک ژی وەسان هەست دکەت، کو زمانێ وی یێ کوردی هند یێ گرنگ نینە بۆ وی.
كوردستانی نوێی بادینان: رۆلێ مالباتێن ڤان زارۆكان، لڤێرە چییە؟
نیشان بامەرنی: مالباتا زارۆكی و تایبەتی دەیك و بابێن زارۆكی گەلەك كارتێكرنا خوە یا ھەی، كا زارۆكێن وان بچیتە خواندنا كوردی یان نە. ئەڤجا ئەگەر دایک و باب د خەمسار بن و خودان بڕیار نەبن، ئێدی زمانێ وی زاڕۆکی بەر ب لاوازبوونێ ڤە دچیت و زمانێن دن ل سەر زال دبن. ئەڤە ژی دبتە مەترسییەکا مەزن کو باوەریا زاڕۆکی ب زمانێ کوردی نەمینیت و ل ڤێرە من دڤێت بێمە سەر مالباتا زاڕۆکی و ب تایبەت دایک و بابان. د سەریدا گەلەک یا گرنگە د مالباتێدا ژینگەهەکا کوردەواری و کوردپەروەری هەبیتن. یا دویێ ژی دایک و باب بڕیارێ ددەن کا زاڕۆکێ وان بچیتە خواندنا کوردی یان نە؟
كوردستانی نوێی بادینان: تو ل وەلاتێ سوید ماموستایێ زمانێ كوردی، بۆ مە دیمەنەكی ل سەر زارۆكێ كورد بەرچاڤ بكە؟
نیشان بامەرنی: بەری هەر تشتەکی، ئەو کەسانێن بیروبۆچوون و ڕوحا وان ب مەژیەکێ کوردەواری و کوردپەروەری ڤە هاتیە گرێدان، گرنگییەکا مەزن ددەنە زمان و چاند و کوردەوارییا خوە. هەلبەت ئەڤ جورێ کوردان، ئەز ب ڕێیا زاڕۆکێن وان دزانم دەما ب کوردییەکا ڕەهوان د دەرسێدا بەشدارییێ دکن و ب ساناهی هەموو ئەرکێن خوە جێبەجێ دکن. ھەتا سەرەدەرییا وان ژی کوردایەتییا پێڤە دیارە. ئەڤە ژی وێ یەکێ نیشان ددەت، کو مالبات بنگەهێ هەر زاڕۆکۆکەکی یە، کو ب باشی فێری زمانێ خوە ببیتن ل هەندەران. ژ بلی وێ ژی موخابن، ئەو سازیێن کورد یێن ل هەندەران هەین، وەکە: کومەلێن کوردی، ئێکەتیا نڤیسەران و یا ماموستایان و فیدراسیون و هەتا دوماهیکێ، وەک پێدڤی گرنگییێ نادەنە زاڕۆکێن کورد د وارێ زمانی دا، بۆ نموونە هندەک چالاکیان بۆ چێبکەن. ئەگەرێ وێ یێ سەرەکی ژی ڤەدگەریێتە ناکوکیێن حزبێن کوردان و باندوورا وان ل سەر مالباتێن زاڕۆکان، کو ژ ئێک و دو دووربکەڤن.
كوردستانی نوێی بادینان: ئەگەر بێژینە تە چاڤرۆھنیەكێ ل سەر قوتابخانێن دەرڤەی وەلاتی بدەمە؟
نیشان بامەرنی: ئەز دێ وەلاتێ سوید كەمە نموونە، ژبەركو ئەو ئێكەمینە ل ئەوروپا و دەرڤەی ئەوروپا گرنگییێ ب زمانێ دایكێ ددەت، وەکە مافەکێ وان یێ ڕەوا و قانونی و فەرمی ل دەولەتێ. سیستەمێ وان بڤی رەنگییە ل هەر دبستانەکێ کو ژ پێنج زاڕۆکان زێدەتر هەبن دکەنە گرۆپەک و ماموستایەک ل وێ دبستانێ دەرسان ددەت. ئەڤجا هندەک دبستان هەنە دو سێ گروپ یێن لێ هەین و ماموستا دچیتە وێرێ دەرسێن زمانێ کوردی ددەت. لێ گەلەک زاڕۆک ژی یێن هەین، گرۆپێ وان تێهەل ناهێت. ئەگەر ل پولا ژ چارێ کێمتر بن، شارەدەری بۆ تەکسیان کرێ دکەن و دبەنە وان دبستانێن گروپەکێ کوردی لێ هەی. يئەگەر خوەندەکار ژ پولا چارێ و پێهەل بت و ڕێیا ون ژ چار کیلومەتران درێژتر بیت، وی دەمی کارتا ئۆتۆبوسێ بۆ دابین دکەن. بۆ زانین من ب خوە هەر سال کێم یان زێدەتری سەد خوەندەکاران یێن هەی، هەما بێژە دبنە دهە پازدە گرۆپ و هەر هەفتیێ جارەکێ ئەز دەرسێ ددەمە وان گرۆپان.
