سیلاڤ بازێرکی
وەك دیار، ب شێوەیەکێ بەرچاڤ هژمارا خواندەڤان و حەزژێکەرێن پەرتووکێ بەرەڤ زێدەبونێ یە، لێ پرسیارەك لڤێرە دروست دبیت، ئەرێ بوچی خواندەڤا د نۆكەدا زێدە بووینە، ئەرێ ما وێنەیێ پەرتووكێ دگەل کۆپەکێ قەهوێ بوویە تڕێندەکا توڕێن جڤاکی؟ راستە وێنەیێ پەرتووکێ دگەل کوپەکێ قەهوێ وێنەیەکێ جوانە، لێ د ڕاستیدا نە قەهوە ب گەرمی دهێتە ڤەخوارن و نەژی پەرتووك ب دروستی دهێتە خواندن یان ژی ب ڕاستی هژمارا خواندەڤانێت پەرتووكێ بەرەڤ زێدەبونێ یە، لێ کیژ خواندەڤان؟ هندەك ژ خواندەڤانان ب ڕاستی نە حەزژێکەرێن پەرتووكێ نە! حەزژێکەرێن شێوێ پەرتووكێ نە یان ژی خوە ب حەزژێکەرێن پەرتووكێ ددەنە دیارکرن، بتنێ داکو جڤاك ب چاڤێ رێزگرتنێ تەماشەی وان بکەت! ئانکو پەرتووكێ وەکی جورەکێ نمایشكرنێ بکار دئینن!
هندەك خواندەڤا ژی یێ هەی، بتنێ پەرتووكێ د خوینیت و لاپەران د قولپینیت، بێی کۆ ب کویری هزر د ناڤەڕۆکا بابەتاندا بکەت، ئها ئەڤ جورە دکەڤیتە دبن ناڤ و نیشانێ “خواندەڤانێ خواپینەر دا!” ئەرێ ما چ مفا د خواندنەکا بێی هزرکرندا هەیە، ب خواندنا پەرتووكەکا ٢٠٠ لاپەر یا بەر ئەقل نینە تە هیچ بۆچوون و رەخنەیەك ل سەر نەبیت! گەلەك جاران دەمێ نڤیسەرەك پەرتووكا خوە پێشکێشی خواندەڤانەکی دکەت، خواندەڤا بتنێ دێ بێژیت (زور سوپاس، دەست خۆش)، ئەرێ نڤیسەر چ ل دەستخۆشییا تەیا ب ترسی بکەت؟ لجهێ سوپاسی و دەستخۆشییێ، تۆ وەك خواندەڤا پەرتووكا نڤیسەری ب ئەقلەکێ ڤەکری ب خوینی و بوچوون و رەخنەیێن خوە ب شێوەیەکێ ئەکادیمی بۆ بدەیە دیارکرن، دێ پتر بیتە جهێ مفای و دلخوەشیێ ژ بۆ نڤیسەری و خواندەڤای ژی. ئانکۆ ب کورتی، خواندەڤایێ خواپینەر ئەوە، یێ ئەقلێ خوە د خواندنا پەرتووكێدا ب کار نەئینیت بتنێ ب چاڤان پەرتووكێ د خوینیت، ئەڤ خواندەڤایێ خواپینەر تا ڕاددەیەکی نڤیسەران زێدە دکەت ب رێکا دەستخۆشیان، لێ وان جورە نڤیسەران یێ ل سەر شاشیێن خوە بەردەوام هەروەسا جورەکێ دیێ خواندەڤا یێ هەی د بێژنێ (خواندەڤانێ ب ترس)، ب تەمامی بەرۆڤاژی خواندەڤانێ خواپینەرە، هند ب هشیاری و هزرەکا ڤەکری و چاڤێ رەخنەیێ پەرتووكێ د خوینیت، هەتا وی ڕاددەی دبیت گەلەك جاران نڤیسەر ب ترسیت کۆ پەرتووكا وی بکەڤیتە ناڤ دەستێ ئەڤی جورێ خواندەڤانان ولێ ئێکا هند ژ نڤیسەری چێدکەت، کۆ شاشیێن خوە راستڤەبکەت و ئەڤ جورێ خواندەڤایی ب خواندەڤایێ زیرەك دھێتەناسكرن.
