ژ چالاكیێن گرۆپێ پشتەڤانێن خواندنا پەرتووكان، ئێڤاریەك بۆ نڤیسەر (جەمیل شێلازی) هاتبوو تەرخانكرن لدوور پەرتووكا وی یا ب ناڤێ (گوندێ شێلازا) و دناڤ ڤێ چالاكیێدا، كوردستانی نوێی بادینان ژی یا بەرھەڤبوو و لدەستپێكێ و پشتی ناساندنا نڤیسەری بۆ ئەندامێن گرۆپی، نڤیسەری بەحسا پەرتووكا خوە كر و دەرگەھێ دانوستاندنێ بۆ بەرھەڤبوویان هاتەڤەكرنێ و نڤیسەر و پەرتووكا وی رەخنەكرن، رەخنەكرن ژی ب مەبەستا، ئەو لایەنێ بەرھەڤبوویان پرسیار و دیتن و كومێنتێن خوە ھەین ل سەر پەرتووكێ و ژبۆ وێ چەندێ بزانین گرنگییا پەرتووكێن گوندان د چ دایە، جەمیل شێلازی گوت: «نڤیسینا ڤان جورە پەرتووكان گەلەكا گرنگە، ھەر كەسەك ژ گوندێ خوە دەستپێبكەت، ژبەركو ئەو دێ باشتر دیڤچوونێ بۆ كەت ژرویێ شینواری و كەلتوری و مێژووی ڤە و ئەڤە دێ بنە بەشەك ژ مێژوویا مە و فەرە زانكویێن مە خویندكارێن خوە هانبدەن ڤەكولینێن خوە یێن دەرچوونێ ژی ل سەر گوندان بكەن». لدوور پەرتووكا خوە ژی گوت: «ئەڤە پەرتووكە ل سالا 2012ێ من چاپكرییە و ھەمی لایەنان بخوەڤە دگریت، لایەنێ ئابووری، جڤاكی، رامیاری و ھەر تشتێ ب گوندی ڤە گرێدای، گوند ژ چەند بنەمالان پێكهاتیە و مێژوویا ھەر بنەمالەكێ و كانێ ئەو بنەمال ژكیڤە هاتییە و برێكا ڤێ پەرتووكێ، كۆمەكا پێزانینان و داتایان دەڤنە بەر دەستێ مە، نە بتنێ بۆ جیلێ ئەڤرۆ بەلكو بۆ یێن داھی ژی دێ پێزانینێن گرنگ بن».
