لە ماوەی ساڵێکدا شەش کۆرپەی فڕێدراو دۆزراونەتەوە.. کوردستانی نوێ، بەدواداچوون دەکات

فڕێدانی کۆرپە لە شوێنە گشتییەكانی كەركوكدا

راپۆرتی/ هێمن ئەحمەد

لێكترازانی پەیوەندییەكانی خێزان و کۆمەڵگە دەبێتە هۆی سەرهەڵدانی گەلێك حاڵەتی نامۆ، یەكێك لەوانە فڕێدانی منداڵی تازە لەدایكبوو (کۆرپە)یە، لە شوێنە گشتیی و بەرچاوەكانی وەك نەخۆشخانە، بەردەم مزگەوت و شوێنی فڕێدانی خۆڵ و خاشاك، كە هەندێكجار هۆكارە بۆ گیانلەدەستدانی كۆرپەكە و هەندێك جاریش رزگار دەكرێت.
بەپێی ئامارێكی فەرمانگەی تەندروستی كەركوك كە دەست كوردستانی نوێ كەوتووە، لە ماوەی یەك ساڵدا لە كەركوك شەش کۆرپەی فڕێدراو دۆزراونەتەوە، دواتر لەلایەن هێزە ئەمنییەكانەوە گەیەندراونەتە نەخۆشخانەكان و باری تەندروستییان جێگیرە.
عەلی كەریم تەمەنی 60 ساڵە، دانیشتووی گەڕەكی ئیسكانە لە كەركوك بۆ کوردستانی نوێ وتی: لەمساڵدا چەند جارێك هەواڵی فڕێدانی کۆرپەمان بیستووە، كارەساتێكی دڵتەزێن و نامۆیە بۆ شارەكە، لەبەرئەوەی لە رابردوودا زۆر بە دەگمەن ئەو هەواڵانەمان دەبیست.
وتیشی: شیرازەی خێزان تێکچووە، لەم ساڵانەدا خەڵکانی نامۆ زۆر دێنە شارەکە كۆمەڵێك دابونەریتی دوور لە كۆمەڵگەیان لەگەڵ خۆیاندا هێناوە، ئەم فڕێدانی کۆرپەیەش هەر لەوێوە سەرچاوەی گرتووە.

راوێژكارێکی یاسایی بۆ کوردستانی نوێ :
كەسانێكی زۆر لە دادگای كەركوك خۆیان ناونوس كردووە، بۆ لەخۆگرتن و بەخێوكردنی منداڵی بێ سەرپەرشت

مامەڵەی ورد لە نەخۆشخانەکاندا
هەر کۆرپەیەک دەدۆزرێتەوە، دەستبەجێ هێزە ئەمنییەکان رەوانەی نەخۆشخانەكانی كەركوكی دەكەن، بۆ پشکنین و دڵنیابوونەوە لە باری تەندروستی، پاشان دۆسیەی بۆ دەكرێتەوە و بۆ لێكۆڵینەوە دۆسیەكەی رەوانەی پۆلیس دەكرێت.
چیمەن عەلی پەرستارە لە نەخۆشخانەی كەركوكی گشتیی، بە كوردستانی نوێی راگەیاند: ئەم حاڵەتانە بۆ نەخۆشخانەكان جێی مەترسییە، لەبەرئەوە دەبێت زۆر بە وریاییەوە مامەڵە لەگەڵ ئەو نەخۆشانەدا بكرێت كە بە مەبەستی منداڵبوون سەردانی نەخۆشخانەكان دەكەن، لەبەرئەوەی ئەو دایکانەی مەبەستیان خراپە هەر دوای منداڵبوون بە نهێنی دەچنە دەرەوەی نەخۆشخانە و منداڵەکە بەجێدەهێڵن، ئەمەش دەبێتە ئەركێكی قورس بەسەر ئێمەوە و تووشی کێشە و بەرپرسیارێتیمان دەکات.
چەند ساڵێك لەمەوپێش لە دوو كاتی جیاوازدا، دوای لە دایكبوون دوو کۆرپە لە نەخۆشخانەی ئازادی فێركاری لە کەرکوک لەلایەن دایکیانەوە بەجێهێڵران و تا مانگی رابردوو هەردوو منداڵەکە لەلایەن کارمەندانی نەخۆشخانەکەوە بەخێو دەکران، پزیشكی پسپۆڕی منداڵان چاودێریی دۆخی تەندروستییانی دەكرد تا ئەوکاتەی بە بڕیاری دادگا گواسترانەوە بۆ خانەی بێسەرپەرشتان لە شاری سلێمانی.
د.بەڵێن عومەر بەڕێوەبەری نەخۆشخانەی ئازادی فێركاری لە کەرکوک بە كوردستانی نوێی راگەیاند: نەخۆشخانە شوێنێكی گونجاو نییە بۆ پەروەردەكردنی منداڵ، لەبەرئەوەی لە دوارۆژدا بۆ باری دەروونی منداڵەكان خراپە.

لەخۆگرتنی منداڵ بەپێی یاسا
بەپێی یاسا ئەو منداڵانەی بێ سەرپەرشتن بە بڕیاری دادگا دەدرێنە ئەو خێزانانەی منداڵیان نییە و داوا دەکەن ئەرکی بەخێوکردنیان لە ئەستۆ بگرن.
سرود محەمەد بەڕێوەبەری كۆمەڵگەی هیوا بۆ داڵدەدان بە كوردستانی نوێی راگەیاند: تەنها لە دوو مانگی رابردوودا لە کەرکوک سێ کۆرپەی فڕێدراو دۆزراونەتەوە و لەلایەن هێزەكانی پۆلیسەوە گەیەندراونەتە نەخۆشخانەكان، بەڵام ئەوەی جێی داخە هەندێكجار منداڵەكان دوور لە چاوی یاسا هەڵدەگیرێنەوە، ئەمەش كارەساتە، لەبەرئەوەی دوای گەورەکردن كاری نەشیاویان پێدەكەن.
وتیشی: هەر کۆرپەیەکی دۆزراوە بە عیراقی هەژمار دەكرێت و پێویستە لەسەر حكومەت لە ئەستۆی بگرێت، یان لە رێگەی دادگاوە دەدرێت بەو خێزانانەی داوای دەكەن و ئەركی بەخێوكردنیان لە ئەستۆ دەگرن، لە ماوەی رابردوودا چەند حاڵەتێكی لەو شێوەیەمان هەبووە و رادەستی خێزانێكمان كردووە، ماوە ماوە سەردانیان دەكەین و لە بارودۆخی منداڵەكە دەكۆڵینەوە، هەروەها پەیوەندییەكی باشمان لەگەڵ ئەو خێزانانەدا دروستكردووە.

پەرستارێک بۆ کوردستانی نوێ :

دەبێت لە نەخۆشخانەکاندا زۆر بە وریاییەوە مامەڵە لەگەڵ ئەو نەخۆشانەدا بكرێت كە بە مەبەستی منداڵبوون سەردان دەكەن

داواکاریی بەخێوکردنی منداڵی بێ سەرپەرشت
ئەو خێزانانەی لەسەر داواکاری خۆیان ئەرکی بەخێوکردنی منداڵی بێ سەرپەرشت دەگرنە ئەستۆ، پێویستە ئەو مەرجانەیان تێدابێت کە یاسا بۆی دیاری کردون، پاشان منداڵەکەیان پێ دەدرێت.
سەردار حەیدەر راوێژكاری یاسایی، بۆ كوردستانی نوێ وتی: كەسانێكی زۆر لە دادگای كەركوك خۆیان ناونووس كردووە، بۆ لەخۆگرتن و بەخێوكردنی ئەو منداڵە بێ سەرپەرشتانەی ناسنامەیان دیار نییە و بە کۆرپەیی لە شوێنە گشتییەكاندا فڕێدراون.
وتیشی: بەشێک لە مەرجەکان ئەمانەن، خێزانەکە سەرچاوەیەكی دیاریكراوی بژێویی هەبێت، یان بەخێوکەر فەرمانبەر بێت بۆ ئەوەی بتوانێت بژێوی ژیانی خۆی و منداڵەكە دابین بكات، هەروەها پێویستە وەرگر پابەندبێت بەوەی هیچ کارێکی نەشیاو بە منداڵەکە نەکات و شوێنێكی وەك خانوو یان داڵدەی هەبێت بۆ نیشتەجێ بوون، ژن و پیاوەكە پابەندی رەوشتی منداڵەكەبن و كاری نەشیاوی بەرامبەر نەكرێت، بەخێوکەر هیچ جۆرە سزایەكی بەسەردا نەسەپێنرابێت و بەهیچ هۆكارێكی یاسایی بەند نەكرابێت، پاشان خێزانەکەی منداڵەکە لەخۆ دەگرێت بەپێی یاسا لەلایەن پۆلیسەوە چاودێری دەكرێت.