ئا: هێدی گەڵاڵی
دوای كۆچی مام، خەمخۆرێكی جدی نییە ئاوڕمان لێ بداتەوە، بۆیە دوای كۆچی مام ئێمەش بێناز ماوینەتەوە!
راپەڕینی ئازاری 1991 وەرچەرخانێكی مێژوویی و گرنگ بوو لە خەباتی رزگارییخوازیی گەلی كوردستاندا، لەو رۆژەدا، هێزی پێشمەرگەی كوردستان بە پاڵپشتیی جەماوەر، توانیان زۆربەی خاكی هەرێمی كوردستان لە ژێر دەستیی و زوڵم و زۆردارییدا رزگار بكەن، ئەو دەستكەوتەش بەخوێنی سەدان پێشمەرگە و جەماوەری خەڵكی كوردستان هاتەدی، بەشێكیان ئێستا وەك كەمئەندام و شەهیدی زیندوو درێژە بە ژیان دەدەن.
نەسرەدین حەمەد ئەمین جێگری كۆمەڵەی پێشمەرگە كەمئەندامبووەكانی سەنگەر بۆ كوردستانی نوێ دەڵێت: كەمئەندامانی سەنگەر، شان بە شانی پێشمەرگە و جەماوەری راپەڕییوی شاری هەولێر، رۆڵی گرنگیان لە ئازادكردنی شارەكەیان گێڕا و بەشێك لە جەستەی خۆیان پێشكەش بە ئازادیی كرد و زۆربەیان لە كەناری مەرگ گەڕاونەتەوە.
وتیشی: پێشمەرگە كەمئەندامبووەكانی سەنگەر نەك هەر لە راپەڕیندا، بەڵكو لە بوارەكانی تری ژیاندا، توانیوویانە بوونیان بسەلمێنن و لە كۆمەڵگا دانەبڕێن و بەشدار بن لە پێشخستنی شارەكەیان و بەرگرییكردن لێی. هەروەك لە ئازادكردنی شاری هەولێردا زۆرترین قوربانیان داوە و لە هێرشكردنە سەر دامودەزگا داپڵۆسێنەرەكانی بەعس، سڵیان نەكردۆتەوە و لەگەڵ جەماوەر و خەڵكی ستەمدیدە بەشداریی كارایان لە ئازادكردنی هەولێردا كردووە.
جێگری سەرۆكی كۆمەڵەی پێشمەرگە كەمئەندامبووەكانی سەنگەر، لەبارەی ماف و داخوازییەكانی كەمئەندامانی سەنگەر، كە خۆی لە یاسای 34ی ساڵی 2007ی پەرلەمانی كوردستان دەبینێتەوە و رایدەگەیەنێت: هەرچەندە یاسای 34ی تایبەت بە ماف و ئیمتیازاتی كەمئەندامان بڕگە و خاڵی باش و گرنگی تێدایە، بەڵام وەك خۆی جێبەجێنەكراوە، لەكاتێكدا بە جێبەجێكردنی ئەو یاسایە زۆربەی كێشە و گرفتی كەمئەندامان چارەسەر دەبێت.
ئاماژەی بەوەشكرد: بڕگەی موچەی لێدەربچێت، لە یاساكەدا هیچی تریان بۆ جێبەجێ نەكردووین، لەوبارەیەوە حكومەت و لایەنی پەیوەندییداریش خۆیان لە جێبەجێكردنی ئەو یاسایە و رێنمایی و پەیڕەوەكەی دەدزنەوە. بە بیانووی جیا جیا، هیچ حسابێكیش بۆ دەنگی گەل و پەرلەمان ناكەن كە پێش 18ساڵ ئەو یاسایەی لێدەرچووە.
باس لەوەشدەكات: هەتا رەوانشاد سەرۆك مام جەلال لە ژیاندا بوو. بەشێكی زۆر لە كێشەكانی بۆ چارەسەر دەكردین تەنانەت هەر مام جەلال بوو، نازناوی شەهیدی زیندووی بە كەمئەندامانی سەنگەر بەخشی، دوای كۆچی مام، خەمخۆرێكی جدی نییە ئاوڕمان لێ بداتەوە، بۆیە دوای كۆچی مام ئێمەش بێناز ماوینەتەوە!
هەرلەیادی راپەڕین و مافی كەمئەندامانی سەنگەر عارف سەلیم، پێشمەرگەی دێرین و كەمئەندامی سەنگەر دەڵێت: تامەزرۆبوون بۆ ئازادیی و رزگاربوون لە ژێر دەستەیی رژێمی بەعس، وایكرد پێشمەرگەكانی یەكێتیی نیشتمانیی كوردستان بە هاوكاریی كۆمەڵانی خەڵكی كوردستان، بە بەرنامەڕێژیی و بە شێوەیەكی كاریگەر رۆڵی بەرچاو بگێڕن لە ئازادكردنی شارەكان، بە تایبەتیش لە ئازادكردنی هەولێردا كەمئەندامان بەشداریی كارایان هەبووە، هەر لەو پێناوەشدا قوربانیان بە جەستەی خۆیان داوە و بوونە شەهیدی زیندوو.
وتیشی: گللەییمان لە حكومەتی هەرێم هەیە، كە یاسای 34ی تایبەت بە ماف ئیمتیازاتی كەمئەندامانی جێبەجێ نەكردووە، بۆیە لەو یادەدا داواكارم لایەنە پەیوەندییدارەكان لە حكومەتی هەرێم، تەواوی بڕگەكانی ئەو یاسایەمان بۆ جێبەجێ بكات.
هەر لەبارەی رۆڵی پێشمەرگەی كەمئەندامیی سەنگەر لە راپەڕینی شاری هەولێردا، هاوار گەڵاڵی پێشمەرگەی دێرین و كەمئەندامی سەنگەر دەڵێت: سەعات پێنجی سەر لە بەیانی 11/3/1991 یەكەم چەخماخەی راپەڕین لەگەڕەكی7ی نیسان لەسەردەستی پێشمەرگەكانی یەكێتیی نیشتمانیی كوردستان لێدرا، سەرەتا لە بنكەی پۆلیسی فاروق دەستمان پێكرد و دواتر بۆ ناوشار، بە هاوكاریی جەماوەریی راپەرییوی شار، هێرشمان كرد و تا سەعات 3 ی عەسر، هەولێر لە بەعسییەكان پاك كرایەوە و ئازاد كرا.
وتیشی: ئەو سەركەوتنە بە خوێنی چەندین شەهید و بریندار هاتەدی، كە بەشێكیان وەك ئێمە كەمئەندام بوون و نیوەی جەستەمان لە پێناوی ئازادیی و چەسپاندنی حكومەتی هەرێم بەخشی، بەڵام مافی خۆشمانە لەو دەستكەوتانەی لە دوای بەرهەم هاتووە، لێی بێبەش نەبین و لە هەموو بوارەكانی ژیاندا گرنگییمان پێ بدەن.
كامەران محەمەد، یەكێكی ترە لەو پێشمەرگە دێرینانەی كە بەشداریی كارای هەبووە لە ئازادكردنی هەولێر پێیڕاگەیاندین: ئێمە لە رۆژی ئازادكردنی هەولێر پەیوەندییمان هەبوو بە شانە چەكدارەكانی ناو شار، لەگەڵ یەكەم تەقەی هێزی پێشمەرگە، لە شارۆچكەی شاوێس و ملا ئۆمەر سەعات 7ی بەیانی بە پاڵپشتیی جەماوەری كوردستان، هێرشمان برد بۆ مۆڵگەی سەربازی فەیلەق و فەرمانگەكانی رژێم، توانیمان تا سەعات 3ی ئێوارە هەولێر ئازاد بكەین، كە رۆژێكی مێژوویی و وەرچەرخانێك بوو لە ژێر دەستەییەوە بەرەو ئازادی.
ئەو پێشمەرگە دێرینە، ئێستا كەمئەندامی سەنگەرە و شانازیی دەكات بەوەی لە پێناو خاك و نیشتمان و ئازادییدا، خوێنی بەخشیوەو زامدارە و دەڵێت: كەمئەندامیی سەنگەر، بە گشتی لە ژیاندا مەغدورن و وەك پێویست لەلایەن حكومەتی هەرێم و لایەنە پەیوەندییدارەكان ئاوڕیان لێ نەدراوەتەوە، بەجۆرێك هاوكارییەكی ئەوتۆیان بۆ فەراهەم نەكراوە كە دڵیان پێی خۆشبێت.
